နေပြည်တော် ၊ ဩဂုတ်လ ၁၁  

ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်မှကြီးမှူး၍ ရန်ကုန်စတော့ အိပ်ချိန်းနှင့် ပူးပေါင်းကျင်းပသော အစုရှယ်ယာရှင်(၁၀၀) ဦးနှင့်အထက်ရှိသည့် အများနှင့်သက်ဆိုင် သော ကုမ္ပဏီများနှင့်စပ်လျဉ်း၍ စဉ်ဆက်မပြတ်ဖွင့်ဟထုတ်ဖော်ခြင်း၊ ကော်ပိုရိတ်စီမံအုပ်ချုပ်မှုနှင့် ရန်ကုန်စတော့အိပ်ချိန်း၏ စာရင်းဝင်အကြိုဈေးကွက်(Pre Listing Board – PLB) နှင့်စပ်လျဉ်းသည့် ရှင်းလင်းဆွေးနွေးပွဲကို ယနေ့ နံနက် ၈:၃၀ နာရီတွင် အမှတ်၊ ၂၄-၂၆၊ ဆူးလေဘုရားလမ်းရှိ ရန်ကုန် စတော့အိပ်ချိန်းခန်းမ၌ ကျင်းပရာ စီမံကိန်းနှင့်ဘဏ္ဍာရေးဝန်ကြီးဌာန ၊ ဒုတိယဝန်ကြီး၊ ငွေချေး သက်သေခံလက်မှတ်လုပ်ငန်း ကြီးကြပ်ရေးကော်မရှင်ဥက္ကဋ္ဌ ဦးမောင်မောင်ဝင်း တက်ရောက် အမှာ စကား ပြောကြား၍ ဖွင့်လှစ်ပေးသည်။
ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်ဥက္ကဋ္ဌ၊ ဒုတိယဝန်ကြီး၊ ဦးမောင်မောင်ဝင်းက အများပိုင်ကုမ္ပဏီများအနေဖြင့် လုပ်ငန်းတိုးချဲ့ရန် လိုအပ်သည့် အရင်းအနှီးများ ကို အရင်းအနှီးဈေးကွက်မှတစ်ဆင့် စုစည်းရယူနိုင်ရန် နိုင်ငံတကာကဲ့သို့ ယခုအခါ ရန်ကုန်စတော့ အိပ်ချိန်းတွင် စာရင်းဝင်ဈေးကွက်အပြင် စာရင်းဝင်လိုသော်လည်း စာရင်းဝင်စံနှုန်းပြည့်မီရန် လိုအပ် သည့် အများနှင့်သက်ဆိုင်သောကုမ္ပဏီများအတွက် သီးခြားစံနှုန်းများသတ်မှတ်၍ စာရင်းဝင်အကြို ဈေးကွက် (Pre Listing Board – PLB) အဖြစ် တည်ထောင်ထားပြီးဖြစ်ရာ ကုမ္ပဏီများအနေဖြင့် လိုအပ်သည့် အရင်းအနှီးများကို စုစည်းရယူနိုင်သည့် အခွင့်အလမ်းများ ရရှိစေမည်ဖြစ်ကြောင်း၊ ယင်း သို့ရယူနိုင်ရန် သက်ဆိုင်ရာ ဥပဒေ၊ နည်းဥပဒေများနှင့် ကော်မရှင်မှထုတ်ပြန်ထားသည့် အမိန့် ကြော်ငြာစာ၊ လုပ်ထုံးလုပ်နည်းများနှင့်   အနိမ့်ဆုံးရှိရမည့် စံသတ်မှတ်ချက်များကို လိုက်နာ ဆောင်ရွက်ရန် လိုအပ်မည်ဖြစ်ကြောင်း၊ ယနေ့ဆွေးနွေးပွဲတွင် အများနှင့်သက်ဆိုင်သောကုမ္ပဏီများက စဉ်ဆက်မပြတ်ဖွင့်ဟထုတ်ဖော်ခြင်း၊ ကော်ပိုရိတ်စီမံအုပ်ချုပ်မှုဆိုင်ရာ ကိစ္စရပ်များနှင့် စာရင်းဝင် အကြို ဈေးကွက် (Pre listing Board-PLB) ကိစ္စရပ်များကို  ရှင်းလင်းဆွေးနွေး ပြောကြားမည်ဖြစ်ရာ သိရှိလိုသည်များကို ပွင့်ပွင့်လင်းလင်းဆွေးနွေးမေးမြန်းကြရန် ဖြစ်ကြောင်း ပြောကြားသည်။ 
ဆက်လက်၍ ကော်မရှင်ရုံး ညွှန်ကြားရေးမှူး ဒေါ်ကြည်ကြည်ခင်ဆွေက စဉ်ဆက်မပြတ် ဖွင့်ဟ ထုတ်ဖော်ခြင်းဆိုင်ရာကိစ္စများ၊ ညွှန်ကြားရေးမှူးဒေါ်အိစိန်စိန်ကြွယ်က ကော်ပိုရိတ်စီမံ အုပ်ချုပ်မှု ဆိုင်ရာကိစ္စများ၊ ရန်ကုန်စတော့အိပ်ချိန်း အကြီးတန်းအမှုဆောင်မန်နေဂျာ ဦးသက်ထွန်းဦးက စာရင်းဝင်အကြိုဈေးကွက် (Pre Listing Board-PLB)  ဆိုင်ရာ စံသတ်မှတ်ချက်များကို ရှင်းလင်းတင်ပြပြီးနောက်  ၃-၇-၂၀၂၃ ရက်နေ့တွင် ရန်ကုန်စတော့အိပ်ချိန်းသို့ အဌမမြောက် စာရင်းဝင်ကုမ္ပဏီ အဖြစ်ဝင်ရောက်ခဲ့သည့် မြန်မာအက်ဂရိုအိတ်(စ်)ချိန်း အများနှင့်သက်ဆိုင်သောကုမ္ပဏီလီမိတက် (Myanmar Agro Exchange Public Co., Ltd) ဒါရိုက်တာ ဦးသူရိန်အောင်က အများနှင့် သက်ဆိုင်သောကုမ္ပဏီများအနေဖြင့် ရန်ကုန်စတော့အိပ်ချိန်းတွင် စာရင်းဝင်ရောက်ခြင်းဆိုင်ရာ အတွေ့အကြုံများကို ရှင်းလင်းတင်ပြသည်။ 
ထို့နောက် အစုရှယ်ယာရှင် (၁၀၀) နှင့်အထက်ရှိသော အများနှင့်သက်ဆိုင်သော ကုမ္ပဏီများမှ တာဝန်ရှိသူများက သိရှိလိုသည်များ မေးမြန်းခြင်းအပေါ် သက်ဆိုင်ရာတာဝန်ရှိသူများက ပြန်လည် ရှင်းလင်းဖြေကြားပြီးနောက် ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်ဥက္ကဋ္ဌက နိဂုံးချုပ်အမှာစကားပြောကြားကာ မွန်းလွဲပိုင်းတွင် ဆွေးနွေးပွဲကိုရုပ်သိမ်းလိုက်သည်။
အဆိုပါဆွေးနွေးပွဲသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးနှင့် ငွေချေးသက်သေခံ လက်မှတ်လုပ်ငန်းကြီးကြပ်ရေးကော်မရှင်ဥက္ကဋ္ဌ၊ အတွင်းရေးမှူးနှင့်ကော်မရှင်အဖွဲ့ဝင်များ၊ စီမံကိန်းနှင့် ဘဏ္ဍာရေးဝန်ကြီးဌာနမှ ဦးဆောင်ညွှန်ကြားရေးမှူးများနှင့် ညွှန်ကြားရေးမှူးချုပ်များ၊ ကော်မရှင်ရုံးမှ တာဝန်ရှိသူများ၊ ရန်ကုန်စတော့အိတ်(စ်)ချိန်း၊ ငွေချေးသက်သေခံလက်မှတ်ကုမ္ပဏီများနှင့် အစု ရှယ်ယာရှင် ၁၀၀ ဦးအထက်ရှိသည့် အများနှင့်သက်ဆိုင်သောကုမ္ပဏီများမှ တာဝန်ရှိသူများ တက်ရောက်ကြပါသည်။
ဆက်လက်၍ ဒုတိယဝန်ကြီးနှင့်ကော်မရှင် ဥက္ကဋ္ဌ သည် မွန်းလွဲပိုင်းတွင် ကော်မရှင်ရုံး၌ ကျင်းပ သည့် ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်၏ (၇/၂၀၂၃) ကြိမ်မြောက် အစည်း အဝေးသို့တက်ရောက်၍ အရင်းအနှီးဈေးကွက် ဖွံ့ဖြိုးတိုးတက်ရေးဆိုင်ရာကိစ္စများအား ဆွေးနွေး မှာကြားသည်။
ရန်ကုန်စတော့အိပ်ချိန်းတွင် စာရင်းဝင်ကုမ္ပဏီများ၏ ရှယ်ယာများအား နေ့စဉ်ရောင်းဝယ် လျက်ရှိရာ ၂၀၂၃-၂၀၂၄ ဘဏ္ဍာရေးနှစ်၊ ဇူလိုင်လ ၃၁ ရက်နေ့အထိ ရင်းနှီးမြှုပ်နှံသူဦးရေ(၄၅၆၉၉)ဦး ရှိပြီး ၂၀၂၃-၂၀၂၄ ဘဏ္ဍာနှစ်အတွင်း စာရင်းဝင်ကုမ္ပဏီ(၈)ခု၏ ရှယ်ယာစုစုပေါင်း (၁.၄၃၅)သန်း၊ တန်ဖိုးကျပ် ၃.၄၄၆ ဘီလီယံ အရောင်းအဝယ်ဖြစ်ခဲ့ပြီး ဈေးကွက်ရင်းနှီးမြှုပ်နှံမှုတန်ဖိုး  ကျပ် ၆၉၂.၄၃ ဘီလီယံ ရှိကြောင်းသိရသည်။
သတင်းစဉ်