ပြည်ထောင်စုဝန်ကြီးဦးကျော်ဝင်း သည်ဧရာဝတီတိုင်းဒေသကြီးအတွင်းမှ စိုက်ပျိုး/မွေးမြူရေးနှင့် အသေးစားအလတ်စား စီးပွားရေးကဏ္ဍတို့အား ထိရောက်လျင်မြန်စွာ ချေးငွေများ ထုတ်ချေးပေးနိုင်ရေးအတွက် ကွင်းဆင်းကြည့်ရှု

စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးကျော်ဝင်းသည် (၂၄.၁၂.၂၀၁၇) ရက်နေ့တွင် တာဝန်ရှိသူများလိုက်ပါလျှက် ဧရာဝတီတိုင်းဒေသကြီးအတွင်းရှိ ငရုတ်ကောင်း ဒေသနှင့် ဂေါ်ရင်ဂျီကျွန်းဒေသတို့သို့ သွားရောက်ခဲ့ပြီး တိုင်းဒေသကြီး၊ ခရိုင်၊ မြို့နယ်ဌာန ဆိုင်ရာတာဝန်ရှိသူများအား ဂေါ်ရင်ဂျီကျွန်းဒေသသည် ပြည်တွင်းပြည်ပရင်းနှီးမြုပ်နှံမှု အခွင့် အလမ်းများစွာ ရှိနေသည့်အတွက် လမ်းပန်းဆက်သွယ်ရေးကောင်းမွန်စေရေး၊ မြေအသုံးချမှု များအား ဥပဒေလုပ်ထုံးလုပ်နည်းနှင့်အညီဖြစ်စေရေး၊ ခရီးသွားလုပ်ငန်းများ ဖွံ့ဖြိုးတိုးတက်စေ ရေးနှင့် သဘာဝပတ်ဝန်းကျင်ထိန်းသိမ်းရေးကိစ္စတို့အား အလေးထားဆောင်ရွက်သွားရန် ဆွေးနွေးခဲ့ပါသည်။

ဆက်လက်၍ (၂၅.၁၂.၂၀၁၇) ရက်နေ့တွင် ပုသိမ်မြို့ရှိ အောင်ပြည့်ဆန်စက်၊ စက်အမှတ် (၁၂၁၅)၊ အောင်ရတနာသိန်းဆန်စက်၊ စက်အမှတ် (၁၀၇၇) တို့အား သွားရောက်ကြည့်ရှုခဲ့ပြီး ပုသိမ်မြို့၊ ဆန်လုပ်ငန်းရှင်များနှင့်တွေ့ဆုံ၍ လိုအပ်သည့်စက်ကိရိယာများ၊ အခြောက်ခံစက်၊ ပေါင်းခံစက်တို့အား အဆင့်မီ အရည်အသွေးမြင့်ဆန်စက်များ တည်ဆောက်နိုင်ရေး၊ ခေတ်မီ သိုလှောင်ရုံများ တည်ဆောက်ရန်တို့အတွက်လည်းကောင်း၊ ဘဏ္ဍာရေးရင်းနှီးမြုပ်နှံမှု လိုအပ်ချက် များအတွက် ချေးငွေများ ထုတ်ချေးမည့် အစီအစဉ်နှင့် လယ်ယာလုပ် တောင်သူများအနေဖြင့် စိုက်ပျိုးရေးအပြင် မွေးမြူရေးလုပ်ငန်းများကို တွဲဖက်လုပ်ကိုင်နိုင်ရေးတို့အား ဆွေးနွေးခဲ့ပါကြောင်း သတင်းရရှိပါသည်။