နေပြည်တော်၊ ဒီဇင်ဘာ ၄-၅

SASEC တွင် ဘင်္ဂလားဒေ့ရှ်နိုင်ငံ၊ ဘူတန်နိုင်ငံ၊ အိန္ဒိယနိုင်ငံ၊ မြန်မာနိုင်ငံ၊ မော်လ်ဒိုက်နိုင်ငံ၊ နီပေါနိုင်ငံနှင့် သီရီလင်္ကာနိုင်ငံ စုစုပေါင်း (၇) နိုင်ငံပါဝင်ပြီး မြန်မာနိုင်ငံအနေဖြင့် ၂၀၁၇ ခုနှစ်၊ ဖေဖော်ဝါရီလတွင် အဖွဲ့ဝင်အဖြစ် ဝင်ရောက်ခဲ့ပါသည်။ SASEC Nodal Official အဖြစ် ငွေတိုက်ဦးစီးဌာန၊ ညွှန်ကြားရေးမှူးချုပ်က ၂၀၂၀ ပြည့်နှစ် စက်တင်ဘာလမှစ၍ တာဝန်ယူဆောင်ရွက်ပါသည်။ ၂၀၂၃ ခုနှစ်အတွက် SASEC Senior Officials Meeting အား အိန္ဒိယနိုင်ငံ၊ ဘဏ္ဍာရေးဝန်ကြီးဌာနနှင့် အာရှဖွံ့ဖြိုးရေးဘဏ် (Asian Development Bank) တို့ပူးပေါင်း၍ ၄−၁၂−၂၀၂၃ ရက်နေ့ မြန်မာစံတော်ချိန် နံနက် ၁၀:၃၀ နာရီမှ ညနေ ၆ နာရီ အထိနှင့် ၅−၁၂−၂၀၂၃ ရက်နေ့ မြန်မာစံတော်ချိန် နံနက် ၁၀:၃၀ နာရီမှ နေ့လည် ၂:၃၀ နာရီ အထိ (၂) ရက်ကြာ အိန္ဒိယနိုင်ငံ၊ နယူးဒေလီမြို့၌ ကျင်းပပြုလုပ်ခဲ့ရာ ၎င်းအစည်းအဝေးသို့ မြန်မာနိုင်ငံမှ ကိုယ်စားလှယ် (၁၀) ဦးက Online ဖြင့် တက်ရောက်ခဲ့ပါသည်။

အဆိုပါအစည်းအဝေးတွင် ယခင် Senior Officials Meeting (SoM) အတွင်း သဘောတူခဲ့သည့် ကိစ္စရပ်များ၏ တိုးတက်မှုကို အစီရင်ခံတင်ပြခြင်း၊ Working Group များ အလိုက် အမျိုးမျိုးသော စီမံကိန်းလုပ်ငန်းများ၏တိုးတက်မှုအခြေအနေများကို ပြန်လည်သုံးသပ်တင်ပြခြင်းနှင့် Economic Corridor Development အတွက် လုပ်ငန်းအဖွဲ့သစ်တစ်ခု ဖွဲ့စည်းခြင်းတို့ကိုလည်းကောင်း၊ SASEC ၏ Action plan ကို ပြန်လည်သုံးသပ်၍ SASEC ၏ Action plan (၂၀၂၃−၂၀၂၅) တွင် ဆောင်ရွက်ဆဲ၊ ဆောင်ရွက်လိုသည့် စီမံကိန်းများကိုလည်းကောင်း ဆွေးနွေးခဲ့ကြပါသည်။

အဆိုပါအစည်းအဝေးသို့ မြန်မာနိုင်ငံ၏ SASEC Nodal Official ဖြစ်သူ ငွေတိုက်ဦးစီးဌာန ညွှန်ကြားရေးမှူးချုပ် ဦးဆောင်၍ စီမံကိန်းနှင့်ဘဏ္ဍာရေးဝန်ကြီးဌာန၊ ပို့ဆောင်ရေးနှင့်ဆက်သွယ်ရေးဝန်ကြီးဌာန၊ လျှပ်စစ်စွမ်းအားဝန်ကြီးဌာန၊  ဆောက်လုပ်ရေးဝန်ကြီးဌာန၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာနတို့မှ SASEC လုပ်ငန်းအဖွဲ့ဝင်များက Virtual ဖြင့် တက်ရောက်ခဲ့ကြပါသည်။