နေပြည်တော်၊ ဇူလိုင် ၃၀

မြန်မာနိုင်ငံအနေဖြင့်  အက်ခ်မက်အလှည့်ကျ ဥက္ကဋ္ဌတာဝန် ထမ်းဆောင်ရမည့် ၂၀၂၅ ခုနှစ် နှင့် ၂၀၂၆ ခုနှစ် ကာလအတွင်း ဆောင်ရွက်ရမည့် အစည်းအဝေးများအနက် စီမံကိန်းနှင့်ဘဏ္ဍာရေးဝန်ကြီးဌာနမှ အက်ခ်မက်ဘဏ္ဍာရေးဆိုင်ရာ အလှည့်ကျဥက္ကဋ္ဌအဖြစ် ဦးဆောင်ကျင်းပရမည့် ၇ ကြိမ်မြောက် အက်ခ်မက်ဘဏ္ဍာရေးဆိုင်ရာ အဆင့်မြင့်အရာရှိကြီးများ အစည်းအဝေး  ( 7th ACMECS Senior Finance Officials’ Meeting-SFOM )အား Virtual ဖြင့် ၃၀-၇-၂၀၂၅ ရက်နေ့ နံနက် ၉:၃၀ နာရီတွင် ငွေတိုက်ဦးစီးဌာန၊ ရုံးအမှတ် (၃၄)၊ စီမံကိန်းနှင့်ဘဏ္ဍာရေးဝန်ကြီးဌာန၌ ကျင်းပခဲ့ပါသည်။

အဆိုပါအစည်းအဝေးအား အက်ခ်မက်ဘဏ္ဍာရေးဆိုင်ရာ အလှည့်ကျဥက္ကဋ္ဌအဖြစ် မြန်မာနိုင်ငံက တာဝန်ယူဆောင်ရွက်ရမည်ဖြစ်ရာ ငွေတိုက်ဦးစီးဌာန၊ ညွှန်ကြားရေးမှူးချုပ် ဒေါ်စီစီပြုံးက ဥက္ကဋ္ဌအဖြစ် ဦးဆောင်၍ ကျင်းပခဲ့ပါသည်။ အစည်းအဝေးသို့ အဖွဲ့ဝင်(၅)နိုင်ငံမှ ကိုယ်စားလှယ်များက Virtual ဖြင့်လည်းကောင်း၊ မြန်မာနိုင်ငံ၊ နိုင်ငံခြားရေးဝန်ကြီးဌာနမှ တာဝန်ရှိသူ (၂)ဦးက လူကိုယ်တိုင်လည်းကောင်း စုစုပေါင်း (၁၅)ဦး တက်ရောက်ခဲ့ပါသည်။

ဦးစွာ Senior Finance Officials’ Meeting-SFOM ဥက္ကဋ္ဌတာဝန်ထမ်းဆောင်သည့် ငွေတိုက်ဦးစီးဌာန၊ ညွှန်ကြားရေးမှူးချုပ်က အဖွင့်အမှာစကား ပြောကြားပြီးနောက် အစီအစဉ်အတိုင်း အစည်းအဝေးကျင်းပခဲ့ရာ ယခင်ဆဋ္ဌမအကြိမ်မြောက် အက်ခ်မက်ဘဏ္ဍာရေးဆိုင်ရာ အဆင့်မြင့်အရာရှိကြီးများ အစည်းအဝေးတွင် ဥက္ကဋ္ဌအဖြစ် တာဝန်ယူခဲ့သည့် လာအိုနိုင်ငံ၊ ဘဏ္ဍာရေး ဝန်ကြီးဌာနမှ ကိုယ်စားလှယ်က ACMECS Development Fund (ACMDF) တည်ထောင်ခြင်းနှင့် စပ်လျဉ်း၍ နောက်ဆုံးအခြေအနေအားလည်းကောင်း၊ ထိုင်းနိုင်ငံ၊ ဘဏ္ဍာရေးဝန်ကြီးဌာနမှ ကိုယ်စားလှယ်က ACMDF တည်ထောင်ရန်အတွက် ဘဏ္ဍာရေးဆိုင်ရာ ဆောင်ရွက်မည့် အစီအစဉ်များနှင့်စပ်လျဉ်း၍လည်းကောင်း၊ Mekong Institutes မှ တာဝန်ရှိသူက ACMDF စီမံခန့်ခွဲမှုနှင့်စပ်လျဉ်း၍ အဆိုပြုချက်ကို လည်းကောင်း ဆွေးနွေးတင်ပြခဲ့ရာ တက်ရောက်လာသည့် အဖွဲ့ဝင်နိုင်ငံများမှ ကိုယ်စားလှယ်များက သိရှိလိုသည်များ မေးမြန်းခြင်း၊ လိုအပ်သည်များ ဖြည့်စွက်အကြံပြုခြင်းဖြင့် ACMDF တည်ထောင်နိုင်ရေးအတွက် တက်ကြွစွာ ပါဝင်ဆွေးနွေးခဲ့ကြပါသည်။

၂၀၀၃ ခုနှစ်တွင် မဲခေါင်ဒေသအတွင်း ဘက်ညီဖွံ့ဖြိုးတိုးတက်မှုကို မြှင့်တင်ရန်၊ စီးပွားရေးကွာဟမှု လျော့ချရန်နှင့် ရေရှည်တည်တံ့သော အောင်မြင်မှုများ ရရှိစေရန် ရည်ရွယ်၍ ဧရာဝတီ - ကျောက်ဖရား - မဲခေါင် စီးပွားရေးပူးပေါင်းဆောင်ရွက်မှုမဟာဗျူဟာ ( Ayeyawady - Chao Phraya - Mekong Economic Cooperation Strategy - ACMECS ) ကို စတင်ထူထောင်ခဲ့ပါသည်။ အဖွဲ့ဝင် (၅)နိုင်ငံပါဝင်ပြီး ကမ္ဘောဒီးယားနိုင်ငံ၊ လာအိုနိုင်ငံ၊ မြန်မာနိုင်ငံ၊ ထိုင်းနိုင်ငံနှင့် ဗီယက်နမ်နိုင်ငံတို့ ဖြစ်ပါသည်။ အဖွဲ့ဝင်နိုင်ငံများနှင့် ဖွံ့ဖြိုးမှုအဖွဲ့အစည်းများ၏ အရင်းအမြစ်များစုစည်း၍ စီမံကိန်းများအတွက် (အထူးသဖြင့် အခြေခံအဆောက်အအုံဖွံ့ဖြိုးတိုးတက်မှုနှင့် ဒေသတွင်းဆက်သွယ်မှု ကဲ့သို့သော နယ်ပယ်များအတွက်) ဘဏ္ဍာငွေပံ့ပိုးပေးရန် ရည်ရွယ်၍ ACMECS Development Fund (ACMDF) တည်ထောင်မည်ဖြစ်ပါသည်။