“ရုံးဌာန မီးဘေးလုံခြုံရေးအတွက် ဆင့်ပွားသင်တန်း” ဒုတိယအကြိမ် ကျင်းပခြင်း

နေပြည်တော်၊ ဇန်နဝါရီ ၂၄

ပြည်ထဲရေးဝန်ကြီးဌာန၊  မီးသတ်ဦးစီးဌာန၊ နေပြည်တော်ဇမ္ဗူသီရိမြို့နယ် မီးသတ်စခန်း တွင် ၂၅-၇-၂၀၂၂  မှ ၁၂-၈-၂၀၂၂ ရက်နေ့အထိ ဖွင့်လှစ်ပို့ချခဲ့သည့် “မီးဘေးလုံခြုံရေးစီမံခန့်ခွဲမှုသင်တန်း (Course on Fire Safety Management for Government Officials) အမှတ်စဉ်(၂)” သို့ တက်ရောက်ခဲ့သည့် ငွေတိုက်ဦးစီးဌာန၊ စီမံရေးရာနှင့်ငွေစာရင်းဌာနခွဲမှ ဒုတိယညွှန်ကြားရေးမှူး၊ ဦးအောင်မင်းဦးက မီးဘေးလုံခြုံရေးစီမံခန့်ခွဲမှုဆိုင်ရာ ဗဟုသုတများအား ပြန်လည်မျှဝေသည့် ဆင့်ပွားသင်တန်း (ဒုတိယအကြိမ်) အား စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၄) ၊ စုပေါင်းခန်းမ၌ ယနေ့ ၂၄-၁-၂၀၂၃ ရက်နေ့ နံနက် (၁၀:၀၀) နာရီတွင် ကျင်းပပြုလုပ်ခဲ့ပါသည်။ ပထမအကြိမ်သင်တန်းကို ၈-၁၂-၂၀၂၂ ရက်နေ့တွင် ကျင်းပပြုလုပ်ခဲ့ပြီး ဖြစ်ပါသည်။ အဆိုပါသင်တန်းသို့ ဒုတိယညွှန်ကြားရေးမှူးချုပ်များ၊ ဒုတိယညွှန်ကြားရေးမှူးများနှင့် အရာထမ်း၊ အမှုထမ်း (၉၃) ဦး တက်ရောက်ခဲ့ကြပါသည်။

အဆိုပါသင်တန်းတွင် မီးဘေးအန္တရာယ်နှင့်ပတ်သက်၍ မီးလောင်မှု အခြေခံသဘောတရားများ၊ မီးလောင်ကျွမ်းမှု ပုံသဏ္ဌာန်အမျိုးအစားများ၊ အခြေခံမီးငြှိမ်းသတ်ရေးနည်းလမ်းများနှင့် မီးအတန်းအစားခွဲခြားပြီး မီးအတန်းအစားအလိုက်မီးငြှိမ်းသတ်နည်းများကို ရှင်းလင်း ပို့ချပြီး သင်တန်းတက်ရောက်သူများနှင့်အတူ မီးငြှိမ်းသတ်ခြင်းကို လက်တွေ့သရုပ်ပြဆောင်ရွက်ခဲ့ပါသည်။ အဆိုပါ သင်တန်းကို နံနက် (၁၁:၃၀) နာရီတွင် ရုပ်သိမ်းခဲ့ပါသည်။