ပြည်ထောင်စုသမ္မတ မြန်မာနိုင်ငံတော် အစိုးရသို့ ဂျပန်နိုင်ငံအစိုးရမှ အကူအညီပေးရေးဆိုင်ရာ စာချွန်လွှာ(၃)ခု လက်မှတ်ရေးထိုးလဲလှယ်ပွဲကျင်းပ

, ,

ပြည်ထောင်စုသမ္မတ မြန်မာနိုင်ငံတော် အစိုးရသို့ ဂျပန်နိုင်ငံအစိုးရမှ အကူအညီပေးရေး ဆိုင်ရာ စာချွန်လွှာ(၃)ခု လက်မှတ်ရေးထိုးလဲလှယ်ခြင်း အခမ်းအနားကို မတ်လ ၂၂ရက်နေ့ မွန်းလွဲ ၂ နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၁)အစည်းအဝေးခန်းမ၌ ကျင်းပခဲ့ပါသည်။

အခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီးဦးဆက်အောင်၊ ပို့ဆောင်ရေး နှင့်ဆက်သွယ်ရေးဝန်ကြီးဌာနမှ ဒုတိယဝန်ကြီး ဦးကျော်မျိုး ၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ Ms. Tomoko YOSHIHIRO, Charge d’ Affaires ad interim of the Embassy of Japan နှင့် ဂျပန်သံရုံးမှ တာဝန်ရှိသူများ တက်ရောက်ခဲ့ကြပါသည်။

အခမ်းအနားတွင် စီးပွားရေးနှင့် လူမှုရေးဖွံ့ဖြိုးတိုးတက်မှုစီမံချက် အတွက် ဂျပန်ယန်းသန်း (၁၀၀၀)၊ ရန်ကုန်အထူးကုဆေးရုံသစ် တည်ဆောက်ရေးစီမံချက် အတွက် ဂျပန်ယန်း(၈၆၆၁)သန်း နှင့်မန္တလေးဆိပ်ကမ်းဖွံ့ဖြိုးတိုးတက်ရေးစီမံချက်အတွက် ဂျပန်ယန်း(၆၀၃၃)သန်းအကူအညီပေးရေး ဆိုင်ရာစာချွန်လွှာများကို ပြည်ထောင်စုသမ္မတမြန်မာနိုင်ငံတော်အစိုးရ ကိုယ်စား စီမံကိန်းနှင့်ဘဏ္ဍာ ရေး၀န်ကြီးဌာန၊ ဒုတိယဝန်ကြီး ဦးဆက်အောင်နှင့် ဂျပန်နိုင်ငံအစိုးရကိုယ်စား Ms. Tomoko YOSHIHIRO, Charge d’ Affaires ad interim of  the Embassy of Japan တို့က လက်မှတ်ရေးထိုးလဲလှယ်ခဲ့ကြပါသည်။

အဆိုပါစာချွန်လွှာများ လက်မှတ်ရေးထိုးလဲလှယ်ခြင်းဖြင့် မြန်မာ-ဂျပန် နှစ်နိုင်ငံအကြား   ချစ်ကြည်ရင်းနှီးမှု ပိုမိုတိုးတက်လာမည်ဖြစ်ပြီး ပြည်သူများ၏ ကျန်းမာရေးစောင့်ရှောက်မှုလုပ်ငန်း များနှင့် ပို့ဆောင်ဆက်သွယ်ရေးကဏ္ဍအတွက် အထောက်အကူများရရှိနိုင်မည်ဖြစ်ပါသည်။