စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် ကမ္ဘာ့ဘဏ်တို့ ပူးပေါင်း ဆောင်ရွက်သည့် စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ အကောင်အထည် ဖော်ဆောင်ရေးစီမံကိန်းနှင့် စပ်လျဉ်းသည့် ဆွေးနွေးညှိနှိုင်းပွဲ“Stakeholders’ Consultation Workshop on the National Strategy for Development of Statistics Implementation Action Plan” ကို ၂၀၁၈ ခုနှစ် အောက်တိုဘာလ (၁)ရက်နေ့တွင် Royal President Hotel၊ နေပြည်တော်၌ ကျင်းပပြုလုပ်ခဲ့ရာ ဗဟိုစာရင်းအင်းအဖွဲ့ ညွှန်ကြားရေး မှူးချုပ် ဒေါက်တာဝါဝါမောင် နှင့် ကမ္ဘာ့ဘဏ်မှ Senior Economist ဖြစ်သူ Mr.Sjamsu Rahardja တို့မှ အဖွင့်အမှာစကား အသီးသီး ပြောကြားခဲ့ပါသည်။ ဆက်လက်၍ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ စာရင်းအင်းဆိုင်ရာ ဖွံ့ဖြိုးမှုအမျိုးသားအဆင့်မဟာဗျူဟာ အကောင်အထည်ဖော် ဆောင်ရွက် နေသည့် လုပ်ငန်းစဉ်များအား လည်းကောင်း၊ ပူးပေါင်းဆောင်ရွက်မှု ယန္တရားနှင့် ၅ နှစ် အတွင်း ဆောင်ရွက်မည့် လုပ်ငန်းများနှင့် စပ်လျဉ်း၍လည်းကောင်း၊ ကမ္ဘာ့ဘဏ်မှ Senior Statistician/ Economist ဖြစ်သူ Mr.Clarence Tsimpo Nkengne မှ စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ(NSDS) အောင်မြင်စွာအကောင်အထည်ဖော် ဆောင်ရွက်နိုင်ရန် အတွက် လိုအပ်သည့် အချက်အလက်များနှင့် စပ်လျဉ်း၍ လည်းကောင်း ရှင်းလင်း တင်ပြခဲ့ပါသည်။ ထို့နောက် ဆွေးနွေးပွဲတက်ရောက်လာသူများမှ အုပ်စု(၅)စုခွဲကာ ဆွေးနွေးခဲ့ကြပြီး မိမိတို့ ဆွေးနွေးခဲ့သည့် ရလဒ်များအား အုပ်စုတစ်ခုချင်းစီမှ ပြန်လည်တင်ပြဆွေးနွေးခဲ့ရာ တက်ရောက် လာသူများမှ သိရှိလိုသည်များနှင့် ထည့်သွင်းဖြည့်စွက်လိုသည့်လုပ်ငန်းများကို ဖြည့်စွက် ဆွေးနွေးခဲ့ကြပါသည်။ ထို့နောက် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင် မှ စာရင်း အင်းဆိုင်ရာ ဖွံ့ဖြိုးမှု အမျိုးသားအဆင့် မဟာဗျူဟာ အောင်မြင်စွာ အကောင်အထည် ဖော်ဆောင် ရွက်နိုင်ရန်အတွက် ရှေ့ဆက်ဆောင်ရွက်မည့် လုပ်ငန်းစဉ်တို့နှင့် စပ်လျဉ်း၍ ရှင်းလင်းတင်ပြခဲ့ ပါသည်။ အဆိုပါဆွေးနွေးပွဲသည် မြန်မာနိုင်ငံ၏ အမျိုးသားစာရင်းအင်းစနစ် တိုးတက်လာစေရန် နှင့် နိုင်ငံတော်အစိုးရမှ မူဝါဒများချမှတ်ရာတွင် အထောက်အကူဖြစ်စေမည့် စာရင်းအင်းများ ပံ့ပိုးနိုင်စေရန်အတွက် ဗဟိုစာရင်းအင်းအဖွဲ့နှင့် ကမ္ဘာ့ဘဏ်တို့ ပူးပေါင်းရေးဆွဲလျက်ရှိသည့် စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ အကောင်အထည်ဖော်ဆောင်ရေး စီမံကိန်း(မူကြမ်း)အပေါ် အကြံပြုဆွေးနွေးညှိနှိုင်းနိုင်ရန်နှင့် ဖြည့်စွက်ထည့်သွင်းသင့်သည့် အချက်အလက်များအား ဆွေးနွေးနိုင်စေရန် အတွက် ရည်ရွယ်၍ ကျင်းပခဲ့ခြင်းဖြစ်သည်။ ဆွေးနွေးပွဲသို့ ဝန်ကြီးဌာနအသီးသီးရှိ သက်ဆိုင်ရာဦးစီးဌာနများမှ ညွှန်ကြားရေး မှူးချုပ်များ၊ အသင်းအဖွဲ့များနှင့် ဖွံ့ဖြိုးမှုမိတ်ဖက် အဖွဲ့အစည်းများမှ တာဝန်ရှိသူများအပါအဝင် စုစုပေါင်း (၁၅၀) ဦးတက်ရောက်ခဲ့ပါသည်။(သတင်းစဉ်) ၂၀၁၈ ခုနှစ်၊အောက်တိုဘာလ ၁ ရက်