စီမံကိန်းနှင့်ဘဏ္ဍာရေးဝန်ကြီးဌာန၊ မွန်ပြည်နယ် ဗဟိုစာရင်းအင်းအဖွဲ့ ရုံးသစ်ဖွင့်ပွဲ အခမ်းအနားကို ၂၀၁၈ခုနှစ် ဇူလိုင်လ(၉)ရက်နေ့ (တနင်္လာနေ့) တွင် မွန်ပြည်နယ်၊ မော်လမြိုင်မြို့၊ မောင်ငံရပ်ကွက်၊ အရာတော် (၂)လမ်းရှိ ဗဟိုစာရင်းအင်းအဖွဲ့တွင် ကျင်းပခဲ့ရာ မွန်ပြည်နယ် စီမံကိန်း၊ ဘဏ္ဍာရေး၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ဝန်ကြီး ဦးဝဏ္ဏကျော်၊ ဗဟိုစာရင်းအင်းအဖွဲ့ ဒုတိယညွှန်ကြားရေးမှူးချုပ် ဦးသန်းဇော်နှင့် မွန်ပြည်နယ် ဗဟိုစာရင်းအင်းအဖွဲ့ တာဝန်ခံ ဒုတိယညွှန်ကြားရေးမှူး ဒေါ်လှလှတို့မှ ဖဲကြိုးဖြတ် ဖွင့်လှစ်ပေး ခဲ့ပါသည်။ ဝန်ကြီး ဦးဝဏ္ဏကျော်မှ ဗဟိုစာရင်းအင်းအဖွဲ့ ရုံးသစ်ကို လှည့်လည်စစ်ဆေးခဲ့ပြီး လိုအပ်သည်များကို မှာကြားခဲ့ပါသည်။

  အခမ်းအနားသို့ မွန်ပြည်နယ်၊ ဗဟိုစာရင်းအင်းအဖွဲ့မှ ဝန်ထမ်း(၂၂)ဦးနှင့် ဌာနဆိုင်ရာ တာဝန်ရှိပုဂ္ဂိုလ်များ(၁၀၅)ဦးတို့ တက်ရောက်ခဲ့ပါသည်။

          ဆက်လက်၍ ဗဟိုစာရင်းအင်းအဖွဲ့ ဌာနတွင်းအစည်းအဝေးကို ပြုလုပ်ခဲ့ရာ ဒုတိယ ညွှန်ကြားရေးမှူးချုပ် ဦးသန်းဇော်မှ ရုံးအဆောက်အဦနှင့် ပတ်သက်သည့် ကိစ္စရပ်များ၊  ရုံးလုပ်ငန်းများ ဆောင်ရွက်ရာတွင် နားလည်မှုလွဲခြင်းများ မဖြစ်ပေါ်စေရန်နှင့် ပြည်နယ်နှင့် ရုံးချုပ် အချိတ်အဆက် ပိုမိုကောင်းမွန်အောင် ဆောင်ရွက်ရန်လိုအပ်ပါကြောင်း၊  စာရင်းအင်း အချက်အလက်များ ပြုစုရာတွင် အချက်အလက် ဇာစ်မြစ်များဖြင့် အပြည့်အစုံ စနစ်တကျရေးသား ပြုစုရန်လိုအပ်ပါကြောင်း၊  မိမိရုံး၏ ဆောင်ပုဒ်ဖြစ်သည့် “စာရင်းအင်းအချက်အလက်များ ပိုမို အရည်အသွေးမြင့်လေ၊ လူမှုဘဝပိုကောင်းလေ” (Better Data, Better Statistics, Better Lives)ကို လူအများသိရှိနားလည်လာအောင် အသိပညာပေးခြင်းများ လုပ်ဆောင်ရန် လိုအပ် ပါကြောင်း၊ ၂၀၁၈ ခုနှစ် ဇန်နဝါရီလ ၂၂ ရက်နေ့တွင် အတည်ပြုပြီး ဖြစ်သည့် စာရင်းအင်း ဥပဒေသစ်ကို အသုံးပြုရန် နှင့် ဥပဒေအသက်ဝင်ရေး ဆောင်ရွက်ရမည် ဖြစ်ပါကြောင်း ပြောကြား ခဲ့ပါသည်။

          ဆက်လက်၍ Data is Power ဖြစ်ပါကြောင်း၊ ရုံးချုပ်နှင့် ပြည်နယ် ဆွေးနွေးမှုများကို စာရင်းအင်း အချက်အလက်များ မှန်ကန်ရေးနှင့် အရည်အသွေး ပြည့်ဝရေးကော်မတီ (Data Accuracy and Quality of Statistics – DAQS) တွင် ဆွေးနွေးမည် ဖြစ်ပါကြောင်း၊ ပြည်နယ်များတွင်လည်း DAQS အစည်းအဝေးကို သုံးလ တစ်ကြိမ် ပြုလုပ်သင့်ပါကြောင်း၊ စစ်တမ်း (Survey)နှင့် ပတ်သက်လာလျှင် ပြည်နယ်/တိုင်းဒေသကြီးများတွင်လည်း ဗဟိုစာရင်းအင်းအဖွဲ့မှ ဦးဆောင် ရမည် ဖြစ်ပါကြောင်း၊ စဉ်ဆက်မပြတ်ဖွံ့ဖြိုးမှုပန်းတိုင်များနှင့် စပ်လျဉ်း၍ Monitoring လုပ်ရန်မှာ တိုင်းဒေသကြီးနှင့် ပြည်နယ်များလည်း ပါဝင်ပါကြောင်း၊ ပန်းတိုင် ၁၇ခု၊ ရည်မှန်းချက် ၁၆၉ခု၊ အညွှန်းကိန်း ၂၃၂ခု ရှိပါကြောင်း၊ SDGs Baseline Report ကိုလည်း လေ့လာထားရန် လိုပါကြောင်း၊ စဉ်ဆက်မပြတ်ဖွံ့ဖြိုးမှု ပန်းတိုင်များနှင့် စီးပွားရေးမူဝါဒ(၁၂)ရပ်ကို အခြေခံထား၍ စီမံခန့်ခွဲရန် လိုအပ်ပါကြောင်း၊ အစိုးရအနေဖြင့် Myanmar Sustainable Development Plan ကို ရေးဆွဲပြီး  မဏ္ဍိုင် ၃ ခု၊ ပန်းတိုင် ၅ ခု၊ မဟာဗျူဟာ ၂၉ ခု၊ လုပ်ငန်းစဉ် ၂၅၀ ခုတို့ဖြင့် အကောင်အထည်ဖော် ဆောင်ရွက်နေပါကြောင်း အစရှိသဖြင့် စာရင်းအင်းဆိုင်ရာကိစ္စများ၊ ရုံးလုပ်ငန်းနှင့် ဘတ်ဂျက်ဆိုင်ရာ ကိစ္စများနှင့် ပတ်သက်၍ဆွေးနွေးမှာကြားခဲ့ပါသည်။