နေပြည်တော်၊ ဇူလိုင် ၂၀

အမျိုးသားအဆင့်ကုန်သွယ်မှုလွယ်ကူချောမွေ့စေရေးကော်မတီအစည်းအဝေး(၂/၂၀၂၃) ကို ယနေ့၊ နေ့လယ် (၁၄:၀၀) နာရီတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ အစည်းအဝေးခန်းမ၌ ကျင်းပပြုလုပ်ရာ အစည်းအဝေးသို့ ကော်မတီဥက္ကဋ္ဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးညွန့်အောင်၊ ပူးတွဲကော်မတီဥက္ကဋ္ဌ၊ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း၊ ကော်မတီအဖွဲ့ဝင်များဖြစ်ကြသော သက်ဆိုင်ရာဦးစီးဌာနများမှ ညွှန်ကြားရေးမှူးချုပ်များနှင့် ဌာနဆိုင်ရာအဆင့်မြင့်ကိုယ်စားလှယ် များ တက်ရောက်ကြသည်။

    အစည်းအဝေးတွင် ဦးစွာ ပူးတွဲကော်မတီဥက္ကဋ္ဌ၊ ဒုတိယဝန်ကြီး ဦးမောင်မောင်ဝင်းက အဖွင့်အမှာစကားပြောကြားရာတွင် ကော်မတီအစည်းအဝေးများကို ၁၇-၅-၂၀၁၇ ရက်မှစပြီး စီပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် စီမံကိန်းနှင့်ဘဏ္ဍာရေးဝန်ကြီးဌာနတို့မှ (၆) လလျှင်တစ်ကြိမ် အလှည့်ကျဦးဆောင်ကျင်းပခဲ့ရာ ယခုအခါ (၈) ကြိမ် ကျင်းပပြုလုပ်ခဲ့ပြီး ဖြစ်ကြောင်း၊ ယခုအစည်းအဝေးတွင် သက်ဆိုင်ရာလုပ်ငန်းအဖွဲ့အသီးသီးမှ WTO Trade Facilitation Agreement ပါ Measures များအပေါ် အကောင်အထည်ဖော်ဆောင်ရွက်နေမှု အခြေအနေများ၊ တိုးတက်မှုအခြေအနေများနှင့် ယခင်အစည်းအဝေးအမှတ်စဉ် (၁/၂၀၂၃) မှ ချမှတ်ခဲ့သော အစည်းအဝေးဆုံးဖြတ် ချက်များအပေါ် အကောင်အထည်ဖော်ဆောင်ရွက်နိုင်မှု နောက်ဆုံးအခြေအနေများကို တင်ပြဆွေးနွေးပေးစေလိုကြောင်း၊ အကောင်အထည်ဖော်ရန် ကျန်ရှိသော Measures များအား ဆောင်ရွက်ပြီးစီးမည့်ရက် (Definitive Date) များနှင့်အညီ မပျက်မကွက် ဆက်လက်ဆောင်ရွက်ရန် လိုအပ်ကြောင်း၊ သတ်မှတ်ချိန်အတွင်း ပြီးပြတ်အောင် အကောင်အထည်ဖော်ဆောင်ရွက်ရန် အခက်အခဲများရှိပါက သက်တမ်းတိုးမြှင့်ခွင့်ရရှိရေး ကိစ္စရပ်များကို ကြိုတင်ဆောင်ရွက်သွားရန်လိုကြောင်း၊ ဆက်စပ်ဆောင်ရွက်ရမည့် ကော်မတီအဖွဲ့ဝင် ဦးစီးဌာနများနှင့်လုပ်ငန်းများအနေဖြင့် သဘောတူစာချုပ်ပါ Measures များကို သတ်မှတ် ချိန်အတွင်း ပြီးပြတ်အောင်ဆောင်ရွက်နိုင်ရေးအတွက် အချိန်နှင့်တစ်ပြေးညီ ညှိနှိုင်းပေါင်းစပ် ဆောင်ရွက်သွားရန်ဖြစ်ကြောင်း စသည်ဖြင့် ဆွေးနွေးမှာကြားပါသည်။

    ထို့နောက် ကော်မတီဥက္ကဋ္ဌ၊ ဒုတိယဝန်ကြီး ဦးညွန်အောင်က ဆွေးနွေးပြောကြား ရာတွင် ယခုအစည်းအဝေးသည် ၂၀၂၃ ခုနှစ်အတွင်း ဒုတိယအကြိမ်မြောက် ပြုလုပ်သည့် အစည်းအဝေး ဖြစ်ကြောင်း၊ လုပ်ငန်းအဖွဲ့များအနေဖြင့် တိုးတက်မှုများကို ပြန်လည်ဆန်းစစ်ပြီး လိုအပ်ချက်၊ အားနည်းချက်များအပေါ် ဝိုင်းဝန်းဆောင်ရွက်ကြရန်ဖြစ်ကြောင်း၊ လုပ်ငန်းအဖွဲ့များ ၏ ဆောင်ရွက်ပြီးစီးမှု၊ ဆောင်ရွက်ရန် ကျန်ရှိသည့်အချက်များကို ကနဦးကောက်ခံထားပြီး ဖြစ်ကြောင်း၊ အကဲဖြတ်အဖွဲ့၏ ဆန်းစစ်တွေ့ရှိချက်များကို နှစ်စဉ်အစီရင်ခံစာမှာ ထည့်သွင်းဖော်ပြသွားမည် ဖြစ်ကြောင်း၊ ၂၀၂၂ ခုနှစ်မှာ မြန်မာနိုင်ငံရဲ့ အကောင်အထည်ဖော် ပြီးမြောက်မှုရာခိုင်နှုန်း ၅.၅ ရာခိုင်နှုန်းရှိရာမှ ၂၀၂၃ ခုနှစ်မှာ ၉.၇ ရာခိုင်နှုန်းသို့ရောက်ရှိလာသည်ကို တွေ့ရှိရကြောင်း၊ လုပ်ငန်းအဖွဲ့များအနေဖြင့် ပြီးခဲ့သောကော်မတီအစည်းအဝေးတွင်ချမှတ်ခဲ့သော အစည်းအဝေး ဆုံးဖြတ်ချက်များနှင့်စပ်လျဉ်း၍ လိုက်ပါအကောင်အထည်ဖော်ဆောင်ရွက်ရာတွင် ကြုံတွေ့ရသည့် အခက်အခဲများရှိပါက ပွင့်ပွင့်လင်းလင်းတင်ပြဆွေးနွေးပေးကြစေလိုကြောင်း၊ ပြီးခဲ့သော (၆) လအတွင်း အတွင်းရေးမှူးရုံးအဖွဲ့က ကမ္ဘာ့ကုန်သွယ်ရေးအဖွဲ့ရှိ ကုန်သွယ်မှုလွယ်ကူ ချောမွေ့စေရေးကော်မတီသို့ ပေးပို့ခဲ့သော အသိပေးအကြောင်းကြားစာများနှင့်စပ်လျဉ်း၍ ယခု ကော်မတီအစည်းအဝေးအပြီးတွင် အတွင်းရေးမှူးရုံးအဖွဲ့က ကော်မတီအဖွဲ့ဝင်များထံသို့ ဖြန့်ဝေပေးသွားမည်ဖြစ်ကြောင်း စသည်ဖြင့် ပြောကြားပါသည်။ 

    ဆက်လက်၍ ကော်မတီအစည်းအဝေးကို အစီအစဉ်အတိုင်း ကျင်းပပြုလုပ်ရာ ကော်မတီ အောက်ရှိ လုပ်ငန်းအဖွဲ့(၄)ဖွဲ့မှ အဖွဲ့ခေါင်းဆောင်များက သက်ဆိုင်ရာကဏ္ဍအလိုက် ဆောင်ရွက်ပြီးစီးမှုအခြေအနေများနှင့် ဆက်လက်ဆောင်ရွက်သွားမည့် အခြေအနေများကို တင်ပြခဲ့ကြပြီး၊ ကော်မတီဝင်များ၏ ဆွေးနွေးမှုများအပေါ် ကော်မတီဥက္ကဋ္ဌနှင့် ပူးတွဲကော်မတီဥက္ကဋ္ဌတို့က ပြန်လည်ရှင်းလင်းဆွေးနွေး၍ ပေါင်းစပ်ညှိနှိုင်းဆောင်ရွက်ပေးကြောင်း သတင်းရရှိပါသည်။ 

သတင်းစဉ်