တိုင်းဒေသကြီး/ ပြည်နယ် အစိုးရများက ပိုမို အရေးပါသည့် အခန်းကဏ္ဍမှ ဦးဆောင် ရေးဆွဲနိုင်မှ ဖက်ဒရယ်စနစ်ကို အခြေပြုသည့် စီမံကိန်းများ ဖြစ်မည်

,

၂၀၁၈-၂၀၁၉ ဘဏ္ဍာနှစ်တွင် တိုင်းပြည်ဖွံ့ဖြိုးတိုးတက်ရေးအတွက်  လက်တွေ့ကျသည့် စီမံကိန်းများ ရေးဆွဲအကောင်အထည်ဖော်နိုင်ရန်အတွက် စီမံကိန်းနှင့် ဘဏ္ဍာရေးဝန်ကြီးဌာနနှင့် နေပြည်တော်ကောင်စီ၊ တိုင်းဒေသကြီး/ ပြည်နယ် အစိုးရအဖွဲ့များမှ နေပြည်တော်ကောင်စီဝင်၊ စီမံကိန်းနှင့် ဘဏ္ဍာရေးဝန်ကြီးများ၏ လစဉ်လုပ်ငန်းညှိနှိုင်းအစည်းအဝေး (၃/၂၀၁၈) ကို ယနေ့ နံနက် ၉ နာရီတွင် စီမံကိန်းနှင့် ဘဏ္ဍာရေးဝန်ကြီးဌာန ရုံးအမှတ် (၁) အစည်းအဝေးခန်းမ၌ ကျင်းပရာ ပြည်ထောင်စုဝန်ကြီး ဦးကျော်ဝင်း တက်ရောက် အဖွင့်အမှာစကား ပြောကြားသည်။

ပြည်ထောင်စုဝန်ကြီးက အချိန်ကာလ ပြောင်လဲကျင့်သုံးမည့် ၂၀၁၈-၂၀၁၉ ဘဏ္ဍာနှစ် အသစ်အတွက် နှစ်စဉ်စီမံကိန်းများရေးဆွဲရာတွင် ယခင်စီမံကိန်းများ ရေးဆွဲအကောင်အထည် ဖော်ရာ၌ ကြုံတွေ့ခဲ့ရသည့် အားသာချက်၊ အားနည်းချက်များကို အသေးစိတ် ပြန်လည်စိစစ်၍ ဆောင်ရွက်ရန်လိုကြောင်း၊ ၂၀၁၈-၂၀၁၉ ဘဏ္ဍာနှစ် စီမံကိန်းများကို နောင်ရေးဆွဲမည့် ကာလတို/ ကာလရှည် စီမံကိန်းများအတွက် အခြေခံနှစ်အဖြစ် ဆောင်ရွက်နိုင်ရေး ဦးတည်ဆောင်ရွက်စေလို ကြောင်း၊ ပကတိ မြေပြင်အခြေအနေကို ထင်ဟပ်သည့် ကိန်းဂဏန်းများဖြင့် အနာဂတ် ဖွံ့ဖြိုးတိုးတက် မှုကို တက်လှမ်းနိုင်မည့် ရည်မှန်းချက်ခိုင်မာသည့်  စီမံကိန်များ ရေးဆွဲနိုင်ရန် အရေးကြီးကြောင်း၊

စီမံကိန်းရည်မှန်းရန်အဆိုပြုချက်များ ချပြသည့်အချိန်တွင် သက်ဆိုင်ရာ တိုင်းဒေသကြီး/ ပြည်နယ် အစိုးရအဖွဲ့ကိုလည်း တင်ပြရန်လိုကြောင်း၊ တိုင်းဒေသကြီး/ပြည်နယ် အစိုးရများက ပိုမို အရေးပါသည့် အခန်းကဏ္ဍမှ ဦးဆောင်ရေးဆွဲနိုင်မှ ဒီမိုကရေစီ အနှစ်သာရပြည့်ဝသည့် ဖက်ဒရယ် စနစ်ကို ဦးတည်သည့် စီမံကိန်းများဖြစ်လာမည်ဖြစ်ပြီး စီမံကိန်းရေးဆွဲရေးဦးစီးဌာနနှင့် ရသုံးမှန်းခြေ ငွေစာရင်းဦးစီးဌာနတို့ ဆက်စပ်ညှိနှိုင်းပေါင်းစပ်၍ စီမံကိန်းနှင့် ဘတ်ဂျက် တစ်ထပ်တည်းကျရန် အတွက် အရေးကြီးကြောင်း၊ တစ်နှစ်တာ ဆောင်ရွက်ရန် လျာထားမှု မည်သို့ပင်ဖြစ်စေ သက်ဆိုင်ရာ တိုင်းဒေသကြီး/ ပြည်နယ် အစိုးရများကို တင်ပြ၍ တိုင်းဒေသကြီး/ ပြည်နယ် အစိုးရများ၏ ဦးဆောင်မှုဖြင့် ဆောင်ရွက်ကြရမည် ဖြစ်ကြောင်း၊ စီမံကိန်းများနှင့် ဘဏ္ဍာငွေများကို တိုင်းဒေသကြီး/ ပြည်နယ် အစိုးရများ ထောက်ခံမှသာ ခွင့်ပြုပေးမည် ဖြစ်ကြောင်း၊ တိုင်းဒေသကြီး/ပြည်နယ်အလိုက် မတူညီသည့် အခြေအနေများရှိရာ ဒေသအလိုက် ဖွံ့ဖြိုးရေး စီမံကိန်းများ ရေးဆွဲဆောင်ရွက် စေလိုကြောင်း၊ 

ကိန်းဂဏန်း အချက်အလက်များ မှန်ကန်ရေးအတွက် အထပ်ထပ် ပြန်လည်စစ်ဆေး၍ တင်ပြရန် လိုကြောင်း၊ ရပ်ကွက်အလိုက် ပြောင်းလဲမှုများကို သိရှိပြီး ဂျီဒီပီ (GDP) တွက်ချက်ရာတွင် ထည့်သွင်း တွက်ချက်နိုင်ရန်  စီမံကိန်းရေးဆွဲရေး ဦးစီးဌာနနှင့် ပြည်တွင်းအခွန်များ ဦးစီးဌာနတို့ ဆက်စပ် ဆောင်ရွက်စေလိုကြောင်း၊ ငါးနှစ်အထိ ကဏ္ဍအလိုက် စီမံကိန်းရည်မှန်းချက်များ ရရှိအောင် ဆောင်ရွက်ကြရမည် ဖြစ်ကြောင်း၊

တိုင်းဒေသကြီး/ပြည်နယ်အလိုက် ရင်းနှီးမြှုပ်နှံမှု ကော်မတီများ ဖွဲ့စည်းပြီးဖြစ်ရာ လုပ်ငန်းရှင် အဖွဲ့အစည်းများကို ဖိတ်ခေါ်ဆွေးနွေးပြီး ရင်းနှီးမြှုပ်နှံမှု တိုးတက်လာအောင် ဆောင်ရွက်ကြရမည် ဖြစ်ကြောင်း၊ အစိုးရ-ပုဂ္ဂလိက ပူးပေါင်းဆောင်ရွက်မှုကို မြှင့်တင်၍ ပုဂ္ဂလိက ကဏ္ဍ တိုးတက်အောင် ဆောင်ရွက်ကြရမည် ဖြစ်ကြောင်း၊ ပုဂ္ဂလိကကဏ္ဍ တိုးတက်လာပါက ပြည်ပနိုင်ငံများ၏ ချေးငွေ၊ ထောက်ပံ့ငွေများ၊ အစိုးရဘဏ္ဍာငွေတို့အပေါ် မှီခိုနေရမှုကို လျှော့ချနိုင်မည် ဖြစ်ကြောင်း၊

လယ်ယာ၊ သားငါးကဏ္ဍ ဖွံ့ဖြိုးတိုးတက်ရေးအတွက် မြန်မာ့လယ်ယာဖွံ့ဖြိုးရေးဘဏ်က  ချေးငွေများထုတ်ချေးနေသော်လည်း လိုအပ်ချက်များစွာ ရှိနေသေးကြောင်း၊ စိုက်ပျိုးရေးအခြေခံ စီးပွားရေးလုပ်ငန်းများ၊ Contract Farming များ ဖွံ့ဖြိုးလာစေရန် ပံ့ပိုးနိုင်မည့် နည်းလမ်းများ ရှာဖွေဆောင်ရွက်ကြရမည် ဖြစ်ကြောင်း ပြောကြားသည်။

ထို့နောက် စီမံကိန်းရေးဆွဲရေးဦးစီးဌာန ညွှန်ကြားရေးမှူးချုပ်က ၂၀၁၈-၂၀၁၉ ဘဏ္ဍာရေးနှစ် သစ်တွင် အမျိုးသားစီမံကိန်းရေးဆွဲရန် အချိန်ဇယားရေးဆွဲထားရှိမှု၊ စီမံကိန်းရေးဆွဲ အကောင်အထည် ဖော်ရာတွင် စဉ်ဆက်မပြတ်ဖွံ့ဖြိုးတိုးတက်မှုပန်းတိုင်များ (SDGs)၊ နိုင်ငံတော်၏ စီးပွားရေးမူဝါဒများ၊ ကဏ္ဍ/ဒေသအလိုက် မူဝါဒများ၊ ကာလတို/ကာလရှည် ရည်မှန်းချက်များနှင့် ဆက်စပ်ရေးဆွဲ ဆောင်ရွက်မည့် လုပ်ငန်းစဉ်များကို လည်းကောင်း၊ ရသုံးမှန်းခြေငွေစာရင်း ဦးစီးဌာန ညွှန်ကြား ရေးမှူးချုပ်က ဘတ်ဂျက်ရေးဆွဲရာတွင် ပြည်ထောင်စုအဆင့် ဌာနအဖွဲ့အစည်းများအား နှစ်လတ် ဘဏ္ဍာရေးမူဘောင်ဖြင့် တွက်ချက်မှုအရ အသုံးစရိတ်ခွင့်ပြုပေးနိုင်မှု၊ သာမန်အသုံးစရိတ်၊ ငွေလုံးငွေရင်း အသုံးစရိတ်များ သုံးစွဲရာတွင် စနစ်တကျ သုံးစွဲနိုင်ရေး စီစဉ်ဆောင်ရွက်ထားရှိမှုများကို လည်းကောင်း ရှင်းလင်းတင်ပြကြသည်။

ဆက်လက်၍ နေပြည်တော်ကောင်စီဝင်၊ တိုင်းဒေသကြီး/ပြည်နယ် အစိုးရအဖွဲ့များမှ စီမံကိန်း နှင့် ဘဏ္ဍာရေးဝန်ကြီးများက ဒေသဖွံ့ဖြိုးရေး ကိစ္စရပ်များ၊ ရင်းနှီးမြှုပ်နှံမှုဆိုင်ရာ ကိစ္စရပ်များ၊ SMEs ချေးငွေရရှိရေးကိစ္စရပ်များအား ရှင်းလင်းတင်ပြရာ ပြည်ထောင်စုဝန်ကြီးမှ ပြန်လည် ဆွေးနွေးခဲ့ ကြကြောင်း သတင်းရရှိသည်။

 

နေပြည်တော်၊ မတ် ၁၆

, , ,