အုပ်ချုပ်မှုနှင့်ဖွံ့ဖြိုးမှုပညာ ဘွဲ့လွန် သင်တန်း ဌာန ၏ ဒုတိယအကြိမ် ဘွဲ့လွန်ဒီပလိုမာ ပေးအပ်ခြင်း အခမ်းအနားကျင်းပ

စီမံကိန်းနှင့်ဘဏ္ဍာရေး ဝန်ကြီးဌာန၊ အမျိုးသားမှတ်တမ်းများ မော်ကွန်းတိုက် ဦးစီးဌာန၊ အုပ်ချုပ်မှုနှင့် ဖွံ့ဖြိုးမှုပညာ ဘွဲ့လွန်သင်တန်း ဌာန၏ ဒုတိယအကြိမ် ဘွဲ့လွန်ဒီပလိုမာ ပေးအပ်ခြင်း အခမ်းအနားကို နေပြည်တော်၊ ရာဇသင်္ဂဟလမ်းရှိ အုပ်ချုပ်မှုနှင့် ဖွံ့ဖြိုးမှုပညာ ဘွဲ့လွန် သင်တန်းဌာန၌ ယနေ့နံနက် ၉ နာရီတွင်ကျင်းပရာ စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီး တက်ရောက် အဖွင့်အမှာစကား ပြောကြားသည်။

ပြည်ထောင်စုဝန်ကြီးက ဒီကနေ့ ဘွဲ့လက်မှတ်များကို ရယူခဲ့သော ဌာနအသီးသီးမှ ဝန်ထမ်းများ အားလုံးကို ဝမ်းမြောက်ဂုဏ်ယူစွာနဲ့ နှုတ်ခွန်းဆက်သပါကြောင်း၊ ဒီနေ့ ဘွဲ့လွန်ပညာနဲ့ ပတ်သက်ပြီးရရှိထားသည့်  ဒီဂရီလက်မှတ်တွေဟာ မိမိရဲ့ဘဝအတွက် ဖြည့်ဆည်းမှု တစ်ရပ်ဖြစ်သကဲ့သို့ နိုင်ငံအတွက် ဖြည့်ဆည်းမှု ဖြစ်တယ်ဆိုတာကို မိမိအနေဖြင့် ပြောလိုကြောင်း၊ နောင်များမှာ GSAD သင်တန်းကပေးလိုက်သည့် ဘွဲ့လက်မှတ်တွေအားလုံးကို အခြားသောနိုင်ငံများက အသိအမှတ်ပြုသည့် အဆင့်ထိရောက်အောင် ဆက်လက်ပြီးတော့ ဆောင်ရွက်မှာ ဖြစ်ပါတယ်လို့ အားလုံးကို အသိပေးလိုကြောင်း၊ ပြည်သူ့ရေးရာ စီမံခန့်ခွဲမှုပညာ မဟာဘွဲ့ (MPA) နှင့် စီးပွားရေးဆိုင်ရာစီမံခန့်ခွဲမှုပညာ (MBA) မဟာဘွဲ့ သင်တန်းများကို တိုးချဲ့ ပို့ချသွားနိုင်ရန် လုပ်ဆောင်သွားမည် ဖြစ်ကြောင်း၊ ယခုပေးလိုက်သည့် ရရှိထားသည့် ဒီပညာရပ်ဟာ ဆုံးခန်းတိုင်ပြီလို့ မမှတ်ယူစေချင်ကြောင်း၊ ဒီပညာရပ်ကိုအခြေခံပြီးတော့ သိခဲ့၊ မှတ်ခဲ့၊ တတ်ခဲ့၊ နားလည်ခဲ့သည့် ဒီပညာရပ်ကိုအခြေခံ၍ ဆင့်ပွားပြီး လုပ်ငန်းစွမ်းဆောင်ရည် တိုးတက်အောင် ဆောင်ရွက်နိုင်မည်ဟု ယုံကြည်ကြောင်း၊ သင်တန်းသူ၊ သင်တန်းသားများ၏ ကြိုးစားအားထုတ်မှုကို ဂုဏ်ယူစွာနဲ့ မှတ်တမ်းတင်ပါကြောင်း၊ ဂုဏ်ယူစွာနဲ့ ရှေ့ကိုဆက်လက် ချီတက်ကြပါလို့ တိုက်တွန်းအားပေးလိုပါကြောင်း ပြောကြားသည်။

ထို့နောက် ပြည်ထောင်စုဝန်ကြီးနှင့် အခြားတာဝန်ရှိသူများက ဘွဲ့လွန်ဒီပလိုမာ လက်မှတ်များကို သင်တန်းသား သင်တန်းသူများထံ ပေးအပ်သည်။

အခမ်းအနားသို့ စီမံကိန်းနှင့် ဘဏ္ဍာရေး ဝန်ကြီးဌာန၊ ပြည်ထောင်စုဝန်ကြီး ဦးကျော်ဝင်း၊ ဒုတိယဝန်ကြီး ဦးဆက်အောင်၊  အမြဲတမ်းအတွင်းဝန် ဦးထွန်းထွန်းနိုင်၊ ညွှန်ကြားရေးမှူးချုပ်များ၊ သင်တန်းဆရာ/ဆရာမများ၊  ဖိတ်ကြားထားသည့် ဧည့်သည်တော်များနှင့် သင်တန်းသား/သူများ စုစုပေါင်း(၄၀၀)ဦးခန့် တက်ရောက်ခဲ့ကြသည်။

အုပ်ချုပ်မှုနှင့်ဖွံ့ဖြိုးမှုပညာ ဘွဲ့လွန်သင်တန်းဌာနမှ ဖွင့်လှစ်သင်ကြားခဲ့သော သင်တန်း(၆)ခု ဖြစ်သည့် ပြည်သူ့ရေးရာမူဝါဒနှင့် အုပ်ချုပ်မှုပညာဘွဲ့လွန်ဒီပလိုမာ (Public Policy and Administration) အချိန်ပိုင်းသင်တန်းသို့ (၅၁) ဦးနှင့် အချိန်ပြည့် သင်တန်းသို့ (၇၈) ဦး၊ ဖွံ့ဖြိုးမှုစီမံကိန်းနှင့် လက်တွေ့ဘွဲ့လွန်ဒီပလိုမာ (Development Planning and Practice) အချိန်ပိုင်းသင်တန်းသို့ (၁၅) ဦးနှင့် အချိန်ပြည့်သင်တန်းသို့ (၇၁) ဦး၊ အပြည်ပြည်ဆိုင်ရာ စီးပွားဆက်ဆံရေးနှင့် ဖွံ့ဖြိုးမှုဘွဲ့လွန်ဒီပလိုမာ (International Economic Relations and Development) သင်တန်းသို့ (၇၁) ဦး၊ စာရင်းအင်းပညာ ဘွဲ့လွန်ဒီပလိုမာ (Statistics) သင်တန်းသို့ (၃၇) ဦး တက်ရောက်အောင်မြင်ခဲ့ပြီး စုစုပေါင်း (၃၂၃) ဦးကို ဘွဲ့လွန်ဒီပလိုမာ လက်မှတ်များ အပ်နှင်းခဲ့သည်။

၂၀၁၅ ခုနှစ်တွင် ပထမအကြိမ် အုပ်ချုပ်မှုနှင့် ဖွံ့ဖြိုးမှုပညာဒီပလိုမာသင်တန်းကို စတင်ဖွင့်လှစ်ခဲ့ပြီး အရည်အချင်းပြည့်မီသည့် ဘွဲ့လွန်ဒီပလိုမာလက်မှတ်ရသူ (၁၀၈) ဦး မွေးထုတ်ပေးနိုင်ခဲ့သည်။ ၂၀၁၆ ခုနှစ်တွင် ဖွင့်လှစ်ခဲ့သည့် ဘွဲ့လွန်ဒီပလိုမာသင်တန်းတွင် သင်တန်းသား/ သင်တန်းသူ စုစုပေါင်း (၃၂၆) ဦး တက်ရောက်ခဲ့ရာ ဘွဲ့လွန်ဒီပမာ  အရည်အချင်း ပြည့်မီသူ သင်တန်းသား/သင်တန်းသူ စုစုပေါင်း (၃၂၃) ဦးကို ဘွဲ့လွန်ဒီပလိုမာလက်မှတ်များ ချီးမြှင့်ပေးအပ်ခဲ့သည်။

နေပြည်တော်၊ ဖေဖော်ဝါရီ ၂၂

, , , ,