မြန်မာ့အာမခံလုပ်ငန်း၊ ကျောက်ဆည်ခရိုင်ရုံး၏ အာမခံဆိုင်ရာအသိပညာပြန့်ပွားရေးဟောပြော ရှင်းလင်းပွဲအခမ်းအနားကို ၁၅-၆-၂၀၁၈ ရက်နေ့၊ နံနက်(၁၀:၀၀)နာရီက ကျောက်ဆည်မြို့နယ်၊ အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ ကျင်းပပြုလုပ်ခဲ့ပါသည်။

အဆိုပါဟောပြောပွဲ၌ ခရိုင်တာဝန်ခံ ဒေါ်ကေသီစံက နိုင်ငံ့ဝန်ထမ်းများ ဥပဒေအရ မထားမနေရ ထားရှိရမည့် ပြည်သူ့ဝန်ထမ်းအသက်အာမခံ၊ တောင်သူလယ်သမားများအတွက်အသက်အာမခံ၊ မြွေအန္တရာယ်အာမခံ၊ စက်တပ်ယာဉ်ပိုင်ရှင်များဥပဒေအရ မထားမနေရထားရှိရမည့် သူတစ်ပါး ထိခိုက်မှုအာမခံ၊ အလုံးစုံမော်တော်ယာဉ်အာမခံ၊ မီးနှင့်သဘာဝဘေးအန္တရာယ်အာမခံများ အကြောင်းနှင့် ယင်းအာမခံများ ထားရှိခြင်းဖြင့် ရရှိနိုင်သည့် အကျိုးကျေးဇူးများအကြောင်း ရှင်းလင်းဟောပြောခဲ့ပါသည်။

အဆိုပါဟောပြောပွဲသို့ ကျောက်ဆည်ခရိုင်အတွင်းရှိကျေးရွာအုပ်စုများမှ ရပ်/ကျေးအုပ်ချုပ်ရေးမှူးများနှင့် ဌာနဆိုင်ရာများမှ တာဝန်ရှိသူများ၊ အထွေထွေအုပ်ချုပ်ရေးဦးစီးဌာနမှ အရာထမ်း၊ ဝန်ထမ်းများ စုစုပေါင်း(၁၅၀)ဦး တက်ရောက်ခဲ့ပါသည်။