စီမံကိန်းနှင့် ဘဏ္ဍာရေးဝန်ကြီးဌာနနှင့် Norwegian Agency for Development Cooperation (Norad) တို့ပူးပေါင်းဆောင်ရွက်လျက်ရှိသော Oil for Development Programme – Revenue Management ၏ နှစ်ပတ်လည်အစည်းအဝေး (Annual Meeting) အား ၂၉-၁-၂၀၁၉ ရက်နေ့၊ နေ့လည် (၂:၀၀) နာရီအချိန်တွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ် (၂၆)၊ အစည်းအဝေးခန်းမ၌ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ဦးဆောင်၍ ကျင်းပပြုလုပ်ခဲ့ပါသည်။ အစည်းအဝေးသို့ မြန်မာနိုင်ငံဘက်မှ စီမံကိန်းရေးဆွဲရေး ဦးစီးဌာန၊ စီမံကိန်း စိစစ်ရေးနှင့် တိုးတက်မှုအစီရင်ခံရေးဦးစီးဌာန၊ ရသုံးမှန်းခြေငွေစာရင်း ဦးစီးဌာန၊ ပြည်တွင်းအခွန်များဦးစီးဌာန၊ ငွေတိုက်ဦးစီးဌာန၊ ရေနံနှင့်သဘာဝဓာတ်ငွေ့ စီမံရေး ဦးစီးဌာနနှင့် မြန်မာ့ရေနံ နှင့်သဘာဝဓာတ်ငွေ့လုပ်ငန်းတို့မှ ဌာနအကြီးအကဲများနှင့် တာဝန်ရှိ သူများနှင့် နော်ဝေနိုင်ငံဘက်မှ မြန်မာနိုင်ငံဆိုင်ရာ နော်ဝေနိုင်ငံသံရုံးမှ Counsellor ဖြစ်သူ Mr. Harald W.Mathisen နှင့် Norad မှ ကျွမ်းကျင်ပညာရှင်များတက်ရောက်ခဲ့ကြပါသည်။

အစည်းအဝေးတွင် စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီးဦးမောင်မောင်ဝင်း၊ မြန်မာနိုင်ငံဆိုင်ရာ နော်ဝေနိုင်ငံသံရုံးမှ Counsellor ဖြစ်သူ Mr. Harald W.Mathisen နှင့် Norad မှ OfD Coordinator ဖြစ်သူ Ms.Tanja Ustvedt တို့က အဖွင့်မိန့်ခွန်း ပြောကြားခဲ့ကြပါသည်။ ယင်းနောက်၂၀၁၈ ခုနှစ်တွင် အကောင်အထည်ဖော် ဆောင်ရွက်မှုအပေါ် လုပ်ငန်းတိုးတက်မှုနှင့် ၂၀၁၉ ခုနှစ်တွင် ရှေ့ဆက်လက်ဆောင်ရွက်မည့် လုပ်ငန်းစီမံချက်များအပေါ် တက်ရောက်လာသူများ က ဆွေးနွေးခဲ့ကြပြီး ၂၀၁၈ ခုနှစ်၊ လုပ်ငန်းတိုးတက်မှုအစီရင်ခံစာနှင့် ၂၀၁၉ ခုနှစ်၊ လုပ်ငန်းစီမံချက် များအား အတည်ပြုခဲ့ကြပါသည်။ အစည်းအဝေးအား ငွေတိုက်ဦးစီးဌာန၊ ညွှန်ကြားရေးမှူးချုပ် ဒေါ်စီစီပြုံးနှင့် Norad မှ OfD Coordinator ဖြစ်သူ Ms. Tanja Ustvedt တို့မှ နိဂုံးချုပ် အမှာစကားပြောကြား၍ ရုပ်သိမ်းခဲ့ပါသည်။

မြန်မာနိုင်ငံ၏ ရေနံနှင့် သဘာဝဓာတ်ငွေ့ကဏ္ဍအား စီးပွားရေး၊ လူမှုရေးနှင့် ပတ်ဝန်းကျင် ထိန်းသိမ်းရေးဆိုင်ရာ တာဝန်ယူ/တာဝန်ခံမှုရှိစွာဖြင့် ထိရောက်ကောင်းမွန်စွာ စီမံခန့်ခွဲနိုင်ရေး အတွက် လိုအပ်သော မူဝါဒများချမှတ်နိုင်ရန်နှင့် လုပ်ငန်းကျွမ်းကျင်မှု အရည်အသွေး တည်ဆောက် နိုင်ရန်အတွက် Oil for Development Programme – Revenue Management ကို Norad နှင့် ပူးပေါင်း၍ အကောင်အထည်ဖော် ဆောင်ရွက်ခြင်းဖြစ်ပါသည်။