“၂၀၂၂ ခုနှစ်၊ အာဆီယံနိုင်ငံများအတွက် လုပ်ငန်းခွင်ပြောဆိုဆက်ဆံရေးစွမ်းရည် မြှင့်တင်မှုဆိုင်ရာ ဘရူနိုင်းဒါရုဆလမ်ပညာသင်ဆု သင်တန်း” မှ ရရှိခဲ့သည့် အတွေ့အကြုံဗဟုသုတများအား မျှဝေခြင်း

နေပြည်တော်၊ ဖေဖော်ဝါရီ ၃

ဗီယက်နမ်နိုင်ငံ၊ ဒါနန်းမြို့၌ ၁၄−၁၁−၂၀၂၂ ရက်နေ့မှ ၂၃−၁၂−၂၀၂၂ ရက်နေ့အထိ ဖွင့်လှစ်ပို့ချခဲ့သည့် ၂၀၂၂ ခုနှစ်၊ အာဆီယံနိုင်ငံများအတွက် လုပ်ငန်းခွင်ပြောဆိုဆက်ဆံရေး စွမ်းရည်မြှင့်တင်မှုဆိုင်ရာ ဘရူနိုင်းဒါရုဆလမ်ပညာသင်ဆု သင်တန်း (Brunei Darussalam Scholarship on Enhancing Professional Communication Skills for ASEAN 2022) သို့တက်ရောက်ခဲ့သည့် လက်ထောက်ညွှန်ကြားရေးမှူး ဒေါ်အိအိအောင်နှင့် ဒေါ်အေးအေးအောင် တို့က သင်တန်းမှ ရရှိခဲ့သည့်အတွေ့အကြုံဗဟုသုတများအား ပြန်လည်မျှဝေခြင်း အခမ်းအနား ကို စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၄)၊ စုပေါင်းခန်းမ၌ ၃−၂−၂၀၂၃ ရက်နေ့ နေ့လယ်(၂:၀၀)နာရီတွင် ကျင်းပပြုလုပ်ခဲ့ပါသည်။ အဆိုပါအခမ်းအနားသို့ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများနှင့် အရာထမ်း၊ အမှုထမ်း (၇၂) ဦး တက်ရောက်ခဲ့ကြပါသည်။

အဆိုပါအခမ်းအနားတွင် ၎င်းတို့ တက်ရောက်ခဲ့သည့်သင်တန်း၏ သင်ကြားမှုပုံစံများ၊ ပို့ချသည့်အကြောင်းအရာများ၊ နောင်တွင် ပညာသင်ဆုလျှောက်ထားမည့် ဝန်ထမ်းများအနေဖြင့် သိထားသင့်သည့်အချက်များနှင့် သင်တန်းတက်ရောက်ခြင်းမှ ရရှိခဲ့သည့် အတွေ့အကြုံ၊ ဗဟုသုတများကို မျှဝေခဲ့ပြီး အခမ်းအနားကို နေ့လယ် (၃:၃၀)နာရီတွင် ရုပ်သိမ်းခဲ့ပါသည်။