IMF Missionအဖွဲ့၏Senior Economist of Fiscal Affairs Department ဖြစ်သူ Mr. Guohua Huang  ဦးဆောင်သော ကိုယ်စားလှယ်အဖွဲ့သည် ၂၇-၁၁-၂၀၁၈ ရက်နေ့မှ ၁၀-၁၂-၂၀၁၈ ရက်နေ့အထိ မြန်မာနိုင်ငံသို့ လာရောက်ခဲ့ပြီး အစိုးရ-ပုဂ္ဂလိကပူးပေါင်းဆောင်ရွက်မှုဆိုင်ရာ ကိစ္စရပ်များကိုဆောင်ရွက်နေသော ဦးစီးဌာန/အဖွဲ့အစည်းများမှ တာဝန်ရှိပုဂ္ဂိုလ်များနှင့် တွေ့ဆုံဆွေးနွေးခဲ့သည့် အကြောင်းအရာများအပေါ် အကြံပြုဆွေးနွေးရှင်းလင်းတင်ပြခြင်းနှင့် မြန်မာနိုင်ငံအတွက် ပိုမိုကောင်းမွန်သည့် အစိုးရ-ပုဂ္ဂလိက ပူးပေါင်းဆောင်ရွက်မှု၏ ငွေကြေးဆိုင်ရာစွန့်စားမှုများ စီမံခန့်ခွဲခြင်းမူဘောင် (Frame of Managing Fiscal Risks of Public-Private Partnerships) ဖြစ်ပေါ်ရေးအတွက် ကနဦးတွေ့ရှိချက်များကို ရှင်းလင်းဆွေးနွေးခြင်း (Presentation and Discussion of Preliminary Findings) အစည်းအဝေးကို စီမံကိန်းနှင့် ဘဏ္ဍာရေးဝန်ကြီးဌာန၊ စီမံကိန်းစိစစ်​ရေးနှင့် တိုးတက်မှုအစီရင်ခံရေးဦးစီးဌာန၊ ရုံးအမှတ်(၃၂)တွင် ၇-၁၂-၂၀၁၈ရက်နေ့ နံနက် (၁၀:ဝဝ)နာရီ၌ ကျင်းပပြုလုပ်ခဲ့ရာဝန်ကြီးဌာန(၆)ခုနှင့် အဖွဲ့အစည်း(၁)ခုမှ အရာထမ်း/အမှုထမ်း (၂၄)ဦးတက်ရောက်ခဲ့ပါသည်။

အစည်းအဝေးတွင် အပြည်ပြည်ဆိုင်ရာငွေကြေးရန်ပုံငွေအဖွဲ့ (IMF)၏ Senior Economist ဖြစ်သူ Mr. Guohua Huang က PPP​ဆောင်ရွက်ရသည့်အကြောင်းအရင်းများ၊ မြန်မာနိုင်ငံ၏PPPစီမံကိန်းများနှင့် ပတ်သက်၍ တွေ့ရှိချက်များကို ရှင်းလင်းတင်ပြခဲ့ပါသည်။ ဆက်လက်၍ Ms. KatjaFunke ,Expert of Fiscal Affairs Department နှင့် Mr. RuiMonteiro, Technical Assistance Advisor of Fiscal Affairs Department တို့ကအောင်မြင်သော PPPလုပ်ငန်း ဖြစ်စေရန် လိုအပ်သောမူဘောင်များ၊ PPPလုပ်ငန်းစဉ်များနှင့် အဖွဲ့အစည်းဆိုင်ရာမူဘောင်၊ PPPစီမံကိန်းများနှင့်ပက်သက်သည့် အချက်အလက်များ သိမ်းဆည်းရန်လိုအပ်မှု၊  အစီရင်ခံသည့်နည်းလမ်းများ၊ အစိုးရအာမခံချက်အတွက် လုပ်ထုံးလုပ်နည်းများ၊ ဖြစ်နိုင်ချေရှိသောစွန့်စားမှုများ၊ ဝယ်ယူရေးနည်းလမ်းများ၊ စံသတ်မှတ်ထားသည့်PPP စာချုပ်ပုံစံများလိုအပ်ခြင်းတို့နှင့်ဆက်စပ်၍ ရှင်းလင်းတင်ပြခဲ့ပါသည်။

          ထို့နောက်တက်ရောက်လာသူများက သိရှိလိုသည်များကိုမေးမြန်းခြင်း၊ အကြံပြုဆွေးနွေးခြင်းတို့ ပြုလုပ်ခဲ့ကြပြီး၊ အစည်းအဝေးကိုနေ့လယ် (၁၂:ဝဝ)နာရီတွင် ရုပ်သိမ်းခဲ့ပါသည်။