နေပြည်တော် ဇူလိုင် ၃၁

SDGs Indicator Baseline Report အပြီးသတ်ထုတ်ပြန်နိုင်ရေး ညှိနှိုင်းဆွေးနွေးပွဲကို စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂)၊ ဗဟိုစာရင်းအင်းအဖွဲ့၊ အစည်းအဝေးခန်းမတွင် (၃၁-၇-၂၀၁၇) ရက်နေ့၊ နေ့လည် ၁ နာရီက ကျင်းပခဲ့ပါသည်။ အစည်းအဝေးတွင် စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်က အဖွင့်အမှာစကား ပြောကြားရာ၌ “တက်ရောက်လာကြသော ဌာနဆိုင်ရာတာဝန်ရှိသူများအား ယခုကျွန်မတို့ ပူးပေါင်းဆောင်ရွက်နေကြသည့် SDGs Indicator Baseline Report သည် အမြန် ထွက်ရှိရန် လိုအပ်နေပြီဖြစ်ပါကြောင်း၊ လာမည့်စက်တင်ဘာလတွင် ကျင်းပမည့် ကုလသမဂ္ဂ အထွေထွေညီလာခံသို့ နိုင်ငံတော်အတိုင်ပင်ခံပုဂ္ဂိုလ် တက်ရောက်မည်ဖြစ်သဖြင့်၊ ကုလသမဂ္ဂ စာရင်းအင်းဌာန သို့ ကြိုတင်ပေးပို့ထားရမည်ဖြစ်ပါကြောင်း၊”
“ထို့ကြောင့် ညှိနှိုင်းရန်ကျန်ရှိနေသော အချက်အလက်များကို အမြန်ညှိနှိုင်း ဖြည့်စွက်ရန် လိုအပ်နေပြီး Report ထွက်ရှိနိုင်ရန် အရေးကြီးနေပြီဖြစ်သဖြင့် ယခင်က ပြုလုပ်ထားခဲ့သည့် အချက်အလက်များကို အခြေခံလျက် အတည်ပြုထုတ်ပြန်နိုင်ရန် လိုအပ်နေပြီဖြစ်ပါကြောင်း၊ အပြီးသတ်မူကြမ်းတွင် ဖော်ပြထားသည့် အချက်အလက်များ၌ Source (၂)ခု၊ (၃)ခုရှိသည့် အချက် အလက်များတွင် အချက်အလက်ရွေးချယ်မှုနှင့် စပ်လျဉ်း၍လည်းကောင်း၊ သက်ဆိုင်ရာ ဦးစီးဌာန များမှ ပေးပို့လာသည့် သဘောထားမှတ်ချက်များနှင့် စပ်လျဉ်း၍လည်းကောင်း ညှိနှိုင်းဆွေးနွေးရန် အတွက် ယခုအလုပ်ရုံဆွေးနွေးပွဲကို တက်ရောက်လာကြသည့် သက်ဆိုင်ရာဦးစီးဌာနများမှ တာဝန်ရှိလူကြီးမင်းများအနေဖြင့် အကြံပြုဆွေးနွေးပေးကြပါရန် မေတ္တာရပ်ခံပါကြောင်း” ပြောကြားခဲ့ပါသည်။
ထို့နောက် တက်ရောက်လာကြသည့် သက်ဆိုင်ရာဦးစီးဌာနများမှ တာဝန်ရှိသူများက ဌာနအလိုက် ဆွေးနွေးခဲ့ကြပါသည်။ အချို့သောအချက် အလက်များမှာ ချက်ချင်း ဆုံးဖြတ်နိုင်ခြင်း မရှိပါက မိမိတို့ဌာနတွင် ပြန်လည်ညှိနှုင်း၍ ဗဟိုစာရင်းအင်းအဖွဲ့သို့ (၃)ရက်အတွင်း ပြန်လည် ပေးပို့ကြပါရန်နှင့် အကယ်၍ သဘောထားဆန္ဒပေးပို့ခြင်း မရှိပါက ယခင်ပေးပို့ထားသည်ကို သဘောတူသည်ဟုယူဆကာ အတည်ပြုဖော်ပြမည် ဖြစ်ပါကြောင်းနှင့် မအားလပ်သည့်ကြားမှ တက်ရောက်လာကြသည့်အတွက်လည်း အထူးကျေးဇူးတင်ဝမ်းမြောက်ကြောင်း ပြောကြားကာ ညနေ(၄)နာရီတွင် အစည်းအဝေးကို ရုပ်သိမ်းလိုက်ပါသည်။