ရှမ်းပြည်နယ်တွင် စာရင်းအင်းဆိုင်ရာ အသိပညာပေးသင်တန်းများကျင်းပခြင်း

၂၀၁၈ ခုနှစ်၊ ဩဂုတ်လ (၃၀) ရက်နေ့မှ (၃၁) ရက်နေ့အထိ

          ဗဟိုစာရင်းအင်းအဖွဲ့မှ  စာရင်းအင်းဆိုင်ရာ အသိပညာပေးသင်တန်းများကို ၂၀၁၈ခုနှစ်၊ ဩဂုတ်လ(၃၀)ရက်နေ့တွင် ရှမ်းပြည်နယ်(တောင်ပိုင်း)၊ တောင်ကြီးမြို့၊ စုပေါင်းရုံး အစည်းအဝေးခန်းမတွင် လည်းကောင်း၊ ဩဂုတ်လ(၃၁)ရက်နေ့တွင် ရှမ်းပြည်နယ်(တောင်ပိုင်း)၊ ပညာရေးမှူးရုံးတွင် လည်းကောင်း ဖွင့်လှစ်ပို့ချခဲ့ပါသည်။  

          ရှမ်းပြည်နယ်၊ တောင်ကြီးမြို့၊ စုပေါင်းရုံး အစည်းအဝေးခန်းမတွင်  သင်ကြားပို့ချခဲ့သော စာရင်းအင်းဆိုင်ရာအသိပညာပေး သင်တန်းတွင် ဗဟိုစာရင်းအင်းအဖွဲ့၊ ဒုတိယညွှန်ကြားရေး မှူးချုပ် ဦးသန်းဇော်နှင့် ပြည်နယ်အထွေထွေအုပ်ချုပ်ရေးဦးစီးဌာန၊ ညွှန်ကြားရေးမှူး ဦးကိုကိုအောင်တို့မှ အဖွင့်အမှာစကား ပြောကြားခဲ့ပါသည်။ သင်တန်းသို့  ရှမ်းပြည်နယ် (တောင်ပိုင်း)အတွင်းရှိ မြို့နယ်အုပ်ချုပ်ရေးမှူးများ၊ ရှမ်းပြည်နယ်၊ ဗဟိုစာရင်းအင်းအဖွဲ့မှ  ပြည်နယ်တာဝန်ခံ၊ ဒုတိယညွှန်ကြားရေးမှူး ဒေါ်နီနီမြင့်နှင့်  အရာထမ်း၊ အမှုထမ်းများ၊ စုစုပေါင်း (၇၂) ဦးခန့် တက်ရောက်ခဲ့ပါသည်။

          ရှမ်းပြည်နယ်(တောင်ပိုင်း)၊ တောင်ကြီးမြို့၊ ပညာရေးမှူးရုံး အစည်းအဝေးခန်းမတွင် သင်ကြားပို့ချခဲ့သော စာရင်းအင်းဆိုင်ရာအသိပညာပေးသင်တန်းတွင် ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ် ဦးသန်းဇော်နှင့် ရှမ်းပြည်နယ်၊ ပြည်နယ်ပညာရေးမှူးရုံး၊ ဒုတိယ ညွှန်ကြားရေးမှူး ဦးသန်းအေးတို့မှ အဖွင့်အမှာစကား ပြောကြားခဲ့ပါသည်။ သင်တန်းသို့ ရှမ်းပြည်နယ်(တောင်ပိုင်း)အတွင်းရှိ ပြည်နယ်ပညာရေးမှူးရုံးမှအရာရှိများ၊ မြို့နယ်ပညာရေး မှူးများ၊ ပညာရေးဆိုင်ရာစာရင်းအင်းများ လက်တွေ့ဆောင်ရွက်နေသူများ၊ ရှမ်းပြည်နယ်၊ ဗဟိုစာရင်းအင်းအဖွဲ့မှ  ပြည်နယ်တာဝန်ခံ၊ ဒုတိယညွှန်ကြားရေးမှူး ဒေါ်နီနီမြင့် နှင့်  အရာထမ်း၊ အမှုထမ်းများ၊ စုစုပေါင်း(၆၈) ဦး ခန့် တက်ရောက် ခဲ့ပါသည်။  

           အဆိုပါသင်တန်းသည် နိုင်ငံတော် ဖွံ့ဖြိုးတိုးတက်ရေးအတွက် စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေးလုပ်ငန်းများနှင့် အမျိုးသားစာရင်းအင်းစနစ် အရေးပါပုံ အား သိရှိနားလည်စေရန်၊  စာရင်းအင်းဥပဒေသစ်ကို ပြည်နယ်နှင့် တိုင်းဒေသကြီးများရှိ စာရင်းအင်းလုပ်ငန်းများ တာဝန်ယူဆောင်ရွက်နေသည့် ဌာနဆိုင်ရာများ၊ အဖွဲ့အစည်းများ အကြား ရှင်းလင်းစွာ သိရှိနိုင်စေရန်၊ ဌာနဆိုင်ရာများအနေဖြင့် SDGs ညွှန်ကိန်းများ အကြောင်း သိရှိနိုင်စေရန်၊ SDGs ပန်းတိုင်များနှင့် နိုင်ငံတော်၏စီးပွားရေးမူဝါဒများ ချိတ်ဆက် ဆောင်ရွက် နေမှုများအား သိရှိစေရန်၊ ဗဟိုစာရင်းအင်းအဖွဲ့၏ စာရင်းအင်းစနစ်သည် Decentralized စနစ်ဖြစ်၍ သက်ဆိုင်ရာဝန်ကြီးဌာနများ၏ စာရင်းအင်းများ၊ ပြည်နယ်နှင့် တိုင်းဒေသကြီးများ ၏ မြို့နယ်စာရင်းအင်းများ၊ အခြေခံစာရင်းအင်းများ မှန်ကန်ရန်လိုအပ်ပါသဖြင့် အရည်အသွေး ပြည့်ဝသည့် စာရင်းဇယားများ အချိန်နှင့်တစ်ပြေးညီ ရရှိနိုင်စေရန် ရည်ရွယ်၍ ကျင်းပခဲ့ခြင်း ဖြစ်ပါသည်။

(သတင်းစဉ်)

,