ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၏ မေတ္တာရပ်ခံချက်ကြောင့် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်၏ လမ်းညွှန်ချက်ဖြင့် စီစဉ်ဆောင်ရွက်သည့် “အခြေခံစာရင်းအင်း အထောက်အကူပြုသင်တန်း ” သင်တန်းဖွင့်ပွဲ အခမ်းအနားကို  ၂၄-၄-၂၀၂၃ ရက်နေ့ နံနက် (၁၀:၃၀) နာရီအချိန်တွင် Virtual စနစ်ဖြင့်ကျင်းပခဲ့ရာ ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ် ဦးကျော်ဆန်းဦးနှင့် ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုူဦးစီးဌာန၊ ဒုတိယညွှန်ကြားရေးမှူးချုပ် ဦးမင်းဇော်ဦးတို့တက်ရောက်၍ အဖွင့်အမှာစကားပြောကြား ဖွင့်လှစ်ပေးခဲ့ပါသည်။ အဆိုပါသင်တန်းကို ၂၀၂၃ ခုနှစ်၊ ဧပြီလ (၂၄) ရက်နေ့ မှ မေလ (၃၀) ရက်နေ့အထိ (နံနက် ၉:၃၀ နာရီ မှနေ့လယ် ၁၂:၃၀ နာရီအချိန်အထိ) ဗဟိုစာရင်းအင်းအဖွဲ့မှ  သင်တန်းနည်းပြများက စာရင်းအင်းဆိုင်ရာ ဘာသာရပ်များကို အခြေခံမှအစပြုကာ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာန၏ လုပ်ငန်းလိုအပ်ချက်များနှင့်အညီ သီအိုရီနှင့် နည်းပညာပိုင်းဆိုင်ရာများကို စာတွေ့၊ လက်တွေ့ သင်ကြား ပို့ချသွားမည်ဖြစ်ပါသည်။

သင်တန်းဖွင့်လှစ်ရသည့် အဓိကရည်ရွယ်ချက်များမှာ-

          သင်တန်းသားများအနေဖြင့် စာရင်းအင်းဆိုင်ရာအသိပညာများ ပိုမိုဖွံ့ဖြိုး တိုးတက်လာစေရန်နှင့် စာရင်းအင်းဆိုင်ရာခေတ်မီနည်းပညာများအသုံးပြု၍ လက်တွေ့လုပ်ငန်းခွင်တွင် ကောင်းမွန်စွာ အသုံးချနိုင်စေရန်ရည်ရွယ်၍ ဖွင့်လှစ်ခြင်းဖြစ်ပါသည်။

သင်ကြားပို့ချမည့် ဘာသာရပ်ဆိုင်ရာများမှာ-

          အခြေခံစာရင်းအင်းပြုစုရေး နည်းလမ်းကစပြီး စာရင်းအင်းကောက်ယူ၊ စုစည်း၊ တွက်ချက်သည့် နည်းလမ်းများကို စာတွေ့ရော၊ လက်တွေ့ရော၊ ကိုယ်တိုင်ခွဲခြမ်းစိတ်ဖြာ အသုံးချတတ်စေရန် (Stata Version. 16.0) အသုံးပြုပြီး Analysis ပြုလုပ်ခြင်းဘာသာရပ်၊ Academic Report Writing အစီရင်ခံစာရေးသားခြင်း ဘာသာရပ်၊ Microsoft Power BI အသုံးပြုခြင်း ဘာသာရပ်တို့ကို လုပ်ငန်းခွင်တွင် ကောင်းကောင်း အဆင့်ဆင့်လက်တွေ့အသုံးချနိုင်စေရန် ရည်ရွယ်၍ သင်ကြားပို့ချမည်ဖြစ်ပါသည်။

          အဆိုပါသင်တန်းသို့ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနရှိ ရုံးချုပ်၊ တိုင်း ဒေသကြီးနှင့် ပြည်နယ်များမှ ဝန်ထမ်း (၄၄) ဦး နှင့် ပင်စင်ဦးစီးဌာနမှ ဝန်ထမ်း (၂) ဦး   အရာထမ်း၊ အမှုထမ်း စုစုပေါင်း (၄၆) ဦး တက်ရောက်ပါသည်။