မန္တလေးတိုင်းဒေသကြီး စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေးဆွေးနွေးပွဲ

မန္တလေးတိုင်းဒေသကြီး၊ ဗဟိုစာရင်းအင်းအဖွဲ့၏ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲကို ၄-၃-၂၀၂၂ ရက်နေ့တွင် မန္တလေးတိုင်းဒေသကြီး၊ မန္တလေးမြို့၊ အစိုးရအဖွဲ့ရုံးခန်းမ၌ ကျင်းပခဲ့ရာ ဆွေးနွေးပွဲသို့ မန္တလေးတိုင်းဒေသကြီး အစိုးရအဖွဲ့ဝင် စီးပွားရေးရာဝန်ကြီး၊ ဗဟိုစာရင်းအင်းအဖွဲ့မှ ညွှန်ကြားရေးမှူးချုပ်နှင့် တာဝန်ရှိသူများ၊ ဖိတ်ကြားထားသောဌာနဆိုင်ရာများမှ ဌာနအကြီးအကဲများ တက်ရောက်ခဲ့ကြပါသည်။ ဆွေးနွေးပွဲတွင် မန္တလေးတိုင်းဒေသကြီး အစိုးရအဖွဲ့ဝင် စီးပွားရေးရာဝန်ကြီး ဦးသိန်းဌေးက အဖွင့်အမှာစကားပြောကြားရာတွင် ဗဟိုစာရင်းအင်းအဖွဲ့မှ ပြဋ္ဌာန်းခဲ့သည့် စာရင်းအင်းဥပဒေနှင့် စာရင်းအင်းနည်းဥပဒေများ သက်ဝင်ကျင့်သုံးလာစေရေး၊ အမျိုးသားစာရင်းအင်းစနစ်တွင် ပါဝင်သည့် သက်ဆိုင်ရာဌာနများနှင့် ပုဂ္ဂလိကလုပ်ငန်းရှင်များအကြား ကျယ်ကျယ်ပြန့်ပြန့် သိရှိနားလည်လာစေရေးနှင့် ဥပဒေနှင့်အညီ ဆောင်ရွက်နိုင်စေရေးတို့ကိုရည်ရွယ်၍ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲကို  ကျင်းပရခြင်းဖြစ်ပါကြောင်း၊ နိုင်ငံတစ်နိုင်ငံဖွံ့ဖြိုးတိုးတက်ရန်အတွက် နိုင်ငံ၏အမျိုးသားစာရင်းအင်းစနစ် ခိုင်မာအားကောင်းဖို့ လိုအပ်ပါကြောင်း၊ အမျိုးသားစာရင်းအင်းစနစ် ခိုင်မာအားကောင်းပြီး ပြည့်စုံမှန်ကန်သည့် စာရင်းအင်းအချက်အလက်များရရှိမှသာ နိုင်ငံအတွက် မူဝါဒများနှင့် စီမံကိန်းများ ရေးဆွဲရာမှာလည်းကောင်း၊ သယံဇာတများ ခွဲဝေအသုံးပြုရာမှာလည်းကောင်း၊ သုတေသနနှင့် ဖွံ့ဖြိုးရေးလုပ်ငန်းများ ဆောင်ရွက်ရာမှာလည်းကောင်း ထိရောက်စွာ အထောက်အကူပြုနိုင်မှာဖြစ်ပါကြောင်း၊ တိကျမှန်ကန်ပြီး မြေပြင်အခြေအနေနှင့် ကိုက်ညီမှုရှိသော စာရင်းအင်းအချက်အလက်များကို မူဝါဒချမှတ်သူများသာမက စီးပွားရေးလုပ်ငန်းရှင်များအတွက်လည်း လိုအပ်ပါကြောင်း၊ စာရင်းအင်းဥပဒေကို ၂၀၁၈ ခုနှစ်မှာ ပြည်ထောင်စုလွှတ်တော် ဥပဒေအမှတ် (၁) နှင့် အသစ်ရေးဆွဲပြဋ္ဌာန်းခဲ့ပါကြောင်း၊ စာရင်းအင်းဥပဒေအရ အပ်နှင်းထားသည့် လုပ်ပိုင်ခွင့်ကို ကျင့်သုံး၍ စီမံကိန်းနှင့်ဘဏ္ဍာရေးဝန်ကြီးဌာနက စာရင်းအင်းနည်းဥပဒေကို ၂၀၂၁ ခုနှစ်၊ မေလ မှာထုတ်ပြန်ခဲ့ပါကြောင်း၊ ဗဟိုစာရင်းအင်းအဖွဲ့သည် စာရင်းအင်းဥပဒေ၊ နည်းဥပဒေ များတွင် ပြဋ္ဌာန်းထားသည့်အတိုင်း မြန်မာနိုင်ငံ၏ တရားဝင်စာရင်းအင်းများ ပြုစုတွက်ချက် ထုတ်ပြန်ရာ၌  လိုက်နာရမည့် အခြေခံစည်းမျဉ်းများနှင့်အညီဆောင်ရွက်ခြင်း၊ အမျိုးသား စာရင်းအင်းစနစ် အရည်အသွေးပြည့်ဝရေးအတွက် ပေါင်းစပ်ညှိနှိုင်းမှုယန္တရား (Coordination Mechanism)များ ဖွဲ့စည်းဆောင်ရွက်ခြင်း၊ သန်းခေါင်စာရင်းနှင့် စစ်တမ်း များကောက်ယူရာတွင် နည်းပညာအကူအညီနှင့် အကြံဉာဏ်များပေးခြင်း၊ စာရင်းအင်းဆိုင် ရာဖွံ့ဖြိုးမှု အမျိုးသားအဆင့်မဟာဗျူဟာ (National Strategy for Development of Statistics – NSDS) ကို အကောင်အထည်ဖော်ခြင်း၊ နိုင်ငံ၏ တရားဝင်စာရင်းအင်းများ ထုတ်ပြန်ခြင်း၊ တရားဝင်စာရင်းအင်းများကို အားပေးမြှင့်တင်ခြင်းနှင့် လူ့စွမ်းအားအရင်း အမြစ် ဖွံ့ဖြိုးတိုးတက်ရေးတို့ကို သက်ဆိုင်ရာအစိုးရဌာန၊ အဖွဲ့အစည်းအားလုံး၏ ပူးပေါင်း ပါဝင်မှုနှင့်အတူဆောင်ရွက်လျက်ရှိပါကြောင်း၊ အမျိုးသားစာရင်းအင်းစနစ် အရည်အသွေး ပြည့်ဝရေးအတွက် ပေါင်းစပ်ညှိနှိုင်းမှုစနစ်များ ဖွဲ့စည်းဆောင်ရွက်ခြင်း၊ သန်းခေါင်စာရင်းနှင့် စစ်တမ်းများ ကောက်ယူရာတွင် နည်းပညာအကူအညီများ၊ အကြံဉာဏ်များ ပေးအပ်ခြင်း၊ စာရင်းအင်းဆိုင်ရာဖွံ့ဖြိုးမှုအမျိုးသား အဆင့်မဟာဗျူဟာကို အကောင်အထည်ဖော်ခြင်း၊ စာရင်းအင်းဥပဒေတွင် ပူးပေါင်းဆောင်ရွက်ရေးယန္တရားကို တိတိကျကျ ရေးဆွဲပြဋ္ဌာန်း ထားသည့်အတွက် အစိုးရဌာနများအနေဖြင့် ဗဟိုစာရင်းအင်းအဖွဲ့မှ တောင်းခံလာသည့် စာရင်းအင်းအချက်အလက်များကိုပံ့ပိုးပေးရန်နှင့်  ဌာနဆိုင်ရာများအနေဖြင့် စာရင်းအင်း လုပ်ငန်းများဆောင်ရွက်ရာတွင်  ဗဟိုစာရင်းအင်းအဖွဲ့နှင့်အတူ တက်တက်ကြွကြွ ပူးပေါင်းဆောင်ရွက်ပေးကြရန် တိုက်တွန်း ပြောကြားခဲ့ပါသည်။ ထို့နောက် ဗဟိုစာရင်းအင်းအဖွဲ့  ညွှန်ကြားရေးမှူးချုပ် ဦးထွန်းဇော်က စာရင်းအင်း ဥပဒေနှင့်နည်းဥပဒေများတွင် ပြဋ္ဌာန်းထားသည့် အကြောင်းအရာများနှင့်စပ်လျဉ်း၍ ရှင်းလင်း ပြောကြားပြီး တက်ရောက်လာသည့်ဌာနဆိုင်ရာများမှ တာဝန်ရှိသူများက မေးမြန်း ဆွေးနွေးခဲ့ကြပါသည်။

,