စီမံကိန်းနှင့်ဘဏ္ဍာရေးဝန်ကြီးဌာန၊ စီမံကိန်းရေးဆွဲရေးဦးစီးဌာနတွင် တာဝန်ထမ်းဆောင်နေသည့် လူငယ်ဝန်ထမ်းများ၏ လုပ်ငန်းဆောင်ရွက်မှုတွင် ပိုမိုထိရောက်စွာဆောင်ရွက်နိုင်ရေးအတွက် လူငယ်အသိပညာဖလှယ်ပွဲ ၃/၂၀၂၄ ကို “အင်္ဂလိပ်ဘာသာရပ်အရေးပါမှုနှင့် အင်္ဂလိပ်စကားပြောစွမ်းရည်” ခေါင်းစဉ်ဖြင့် ၂၀၂၄ ခုနှစ်၊ မတ်လ ၁၄ ရက်နေ့၊ မွန်းလွဲ ၁၅း၀၀ နာရီတွင် ဤဦးစီးဌာန၊ သင်တန်းကျောင်း၌ ကျင်းပပြုလုပ်ခဲ့ပြီး ဦးစီးကော်မတီဝင်များနှင့် အသက် ၃၅ နှစ်အောက် လူငယ်ဝန်ထမ်း (၄၅)ဦး ပါဝင်တက်ရောက်ခဲ့ပါသည်။

လူငယ်အသိပညာဖလှယ်ပွဲတွင် ဘာသာစကားသည် အတွေးအမြင်၊ အယူအဆများ၊ ယဉ်ကျေးမှုတို့ကို ဆက်သွယ်ရန် လူအချင်းချင်းကို ဆက်သွယ်ပေးသည့် ပေါင်းကူးတံတား ဖြစ်ကြောင်း၊ လူနေမှုအဆင့်အတန်း တိုးတက်လာပြီး နည်းပညာများတိုးတက်လာသည်နှင့်အမျှ အင်္ဂလိပ်ဘာသာစကားသည်လည်း အလွန်အရေးပါလာကြောင်း၊ အင်္ဂလိပ်ဘာသာစကားသည် အကျယ်ပြန့်ဆုံးဘာသာစကားဖြစ်ကြောင်း၊ ကုန်သွယ်မှုနှင့် သံတမန်အတွက် အရေးပါသည့် ဘာသာစကားဖြစ်သည့်အပြင် နိုင်ငံတကာသုံးဘာသာစကားဖြစ်ကြောင်း၊ ဖိလစ်ပိုင်နိုင်ငံနှင့် အိန္ဒိယနိုင်ငံများတွင် အင်္ဂလိပ်ဘာသာစကားကို ရုံးသုံးဘာသာစကားအဖြစ်အသုံးပြုနေကြောင်း၊ သို့ဖြစ်ရာ အင်္ဂလိပ်ဘာသာကို လေ့လာရန်လိုအပ်ကြောင်း၊ ဘာသာရပ်တစ်ခုကို လေ့လာရာ၌ နည်းစနစ်ကျကျနှင့် စွဲစွဲမြဲမြဲလေ့လာရန်လိုအပ်ပြီး အခက်အခဲများ၊ စိန်ခေါ်မှုများ တွေ့ကြုံရာ၌လည်း ကိုယ့်ကိုယ်ကို ယုံကြည်မှုရှိရန်၊ သင်ယူလိုစိတ် ပြင်းပြမှုရှိရန် လိုအပ်ကြောင်း၊ ယနေ့ခေတ်သည် နည်းပညာများတိုးတက်လာသည့်အတွက် ဖုန်းတစ်လုံးရှိရုံဖြင့်အလွယ်တကူ Self Study လုပ်နိုင်ကြောင်း၊ အင်္ဂလိပ်ဘာသာစကားကို သင်ယူလေ့လာခြင်းဖြင့် အလုပ်အကိုင်အခွင့်အလမ်းများလာသည့်အပြင်အခြားအကျိုးကျေးဇူးများစွာရှိပါကြောင်း စသည်တို့ကို ပါဝင်ဆွေးနွေးသူများက အသိပညာဖလှယ်ခဲ့ကြပြီး တက်ရောက်လာသည့် လူငယ်ဝန်ထမ်းများက ပြန်လည်ဆွေးနွေးမေးမြန်းခဲ့ကာ လူငယ်အသိပညာဖလှယ်ပွဲကို ၁၆း၃၀ နာရီတွင် ရုပ်သိမ်းခဲ့ပါသည်။