မီးအာမခံလျော်ကြေးပေးအပ်ခြင်း

          မြန်မာ့အာမခံလုပ်ငန်းတွင် မြန်မာ့အရှေ့တိုင်းဘဏ်(MOB)​ချေးငွေဖြင့် မီးအာမခံထားရှိသည့် Forever Winner Co., Ltd. ပိုင် အဆောက်အဦး မီးလောင်ဆုံးရှုံးမှုအတွက် မီးအာမခံလျော်ကြေးပေးအပ်ပွဲအခမ်းအနားကို (၂၆-၇-၂၀၁၈)ရက်နေ့ နေ့လည်(၁:၃၀) နာရီ၌ ရန်ကုန်မြို့၊ မြန်မာ့အာမခံလုပ်ငန်းရုံးချုပ်တွင်ကျင်းပရာ မြန်မာ့အာမခံလုပ်ငန်း ဦးဆောင်ညွှန်ကြားရေးမှူး ဒေါက်တာစန္ဒာဦးနှင့် ဌာနအကြီးအကဲများ၊ အရာထမ်းများ၊ ဖိတ်ကြားထားသောအကျိုးခံစားခွင့်ရှိသူများ တက်ရောက်ကြပါသည်။

          အဆိုပါလျော်ကြေးပေးအပ်ပွဲအခမ်းအနားတွင် မြန်မာ့အရှေ့တိုင်းဘဏ်(MOB)​ချေးငွေဖြင့် မီးအာမခံထားရှိသည့် Forever Winner Co., Ltd. ပိုင် အဆောက်အဦးအတွက် လျော်ကြေးငွေ ကျပ်သန်း ၁၆၂၄.၆၀ ကို မြန်မာ့အာမခံလုပ်ငန်း ဦးဆောင်ညွှန်ကြားရေးမှူး ဒေါက်တာစန္ဒာဦးမှ ပေးအပ်ရာ MOB ဘဏ်မှ ဒုတိယအုပ်ချုပ်မှုဒါရိုက်တာ ဦးသန်းဝင်းနှင့် Forever Winner Co., Ltd. မှ ဦးဆောင်ညွှန်ကြားရေးမှူး ဦးအောင်လွင်တို့က လက်ခံရယူခဲ့ပါသည်။

          အဆိုပါအဆောက်အဦးသည် မြန်မာ့အာမခံလုပ်ငန်းတွင် ၂၀၁၄ ခုနှစ်မှစတင်၍ Forever Winner Co., Ltd. မှ အဆောက်အဦး(၅)လုံးအတွက် ကျပ်သန်း ၁၈၀၀ အား MOB ဘဏ်ချေးငွေဖြင့် မီးအာမခံထားရှိခဲ့ပြီး ငှားရမ်းထားသော JPI-Jewel Pak International (Myanmar) Co., Ltd. ၏ လက်ဝတ်ရတနာဗူးများ ထုတ်လုပ်သည့်လုပ်ငန်းခွင်ရှိ Heat Gun ကြောင့် (၇-၄-၂၀၁၈)ရက်နေ့ (၁၇:၁၅)နာရီတွင် မီးလောင်မှုဖြစ်ပွား၍ ပင်မအဆောက်အဦး(၁)လုံး မီးလောင်ဆုံးရှုံးခဲ့ရာ ယင်းဆုံးရှုံးမှုအတွက် ကျပ်သန်း ၁၆၂၄.၆၀ သန်း ပေးလျော်ခြင်းဖြစ်ပါသည်။