ပြည်ထောင်စု သမ္မတ မြန်မာနိုင်ငံနှင့် ကုလသမဂ္ဂ ကလေးများ ရန်ပုံငွေအဖွဲ့ (UNICEF) တို့ အကြား Letter of Exchange (LoE) လက်မှတ်ရေးထိုးပွဲ ကျင်းပခြင်း

, ,

ပြည်ထောင်စု သမ္မတ မြန်မာနိုင်ငံနှင့် ကုလသမဂ္ဂ ကလေးများ ရန်ပုံငွေအဖွဲ့ (UNICEF) တို့အကြား ပူးပေါင်းအကောင်အထည်ဖော် ဆောင်ရွက်မည့် နိုင်ငံဆိုင်ရာအစီအစဉ် (၂၀၁၈-၂၀၂၂) နှင့်စပ်လျဉ်းသည့် Letter of Exchange (LoE) လက်မှတ်ရေးထိုးပွဲ အခမ်းအနားကို ဇူလိုင်လ ၁၂ရက်နေ့ နံနက် ၉ နာရီတွင် နေပြည်တော်ရှိ စီမံကိန်းနှင့် ဘဏ္ဍာရေး၀န်ကြီးဌာန၊ ရုံးအမှတ် (၁) အစည်းအ‌ဝေးခန်းမ၌ ကျင်းပခဲ့ပါသည်။

လက်မှတ်ရေးထိုးပွဲအခမ်းအနားသို့ စီမံကိန်းနှင့် ဘဏ္ဍာရေးဝန်ကြီးဌာန အမြဲတမ်း အတွင်းဝန်၊ ပြည်ထောင်စုရှေ့နေချုပ်ရုံး အမြဲတမ်းအတွင်းဝန်၊ စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာန၊ နိုင်ငံခြားရေးဝန်ကြီးဌာန၊ ပြည်ထဲရေးဝန်ကြီးဌာန၊ ကာကွယ်ရေး ဝန်ကြီးဌာန၊ ပညာရေးဝန်ကြီးဌာန၊ ကျန်းမာရေးနှင့် အားကစားဝန်ကြီးဌာန၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ပြည်ထောင်စုစာရင်းစစ်ချုပ်ရုံးနှင့် စီမံကိန်းနှင့်ဘဏ္ဍာရေးဝန်ကြီးဌာနအောက်ရှိ ဦးစီးဌာန/အဖွဲ့အစည်းများမှ အဆင့်မြင့်အရာရှိ များ၊ တာဝန်ရှိပုဂ္ဂိုလ်များနှင့် UNICEF ဘက်မှ UNICEF Representative ဖြစ်သူ          Ms. June Kunugi နှင့် တာ၀န်ရှိပုဂ္ဂိုလ်များ စုစုပေါင်း (၂၅)ဦး တက်ရောက်ကြပါသည်။

အခမ်းအနားတွင် ပြည်ထောင်စုသမ္မတ မြန်မာနိုင်ငံနှင့် ကုလသမဂ္ဂကလေးများ ရန်ပုံငွေ အဖွဲ့ (UNICEF) တို့အကြား ပူးပေါင်းအကောင်အထည်ဖော် ဆောင်ရွက်မည့် နိုင်ငံ ဆိုင်ရာအစီအစဉ် (၂၀၁၈-၂၀၂၂)နှင့် စပ်လျဉ်းသည့် Letter of Exchange (LoE) ကို ပြည်ထောင်စုသမ္မတမြန်မာနိုင်ငံတော်အစိုးရ ကိုယ်စား စီမံကိန်းနှင့်ဘဏ္ဍာရေး၀န်ကြီးဌာန အမြဲတမ်းအတွင်းဝန် ဦးထွန်းထွန်းနိုင် နှင့် UNICEF ကိုယ်စား ရန်ကုန်မြို့ရှိ UNICEF Representative ဖြစ်သူ Ms. June Kunugi တို့က   လက်မှတ်ရေးထိုး လဲလှယ်ခဲ့ကြပါသည်။

မြန်မာ- UNICEF ပူးပေါင်းဆောင်ရွက်မှု နိုင်ငံဆိုင်ရာလုပ်ငန်းအစီအစဉ် (၂၀၁၈-၂၀၂၂) ကို သက်ဆိုင်ရာဝန်ကြီးဌာနများနှင့် UNICEF တို့ ညှိနှိုင်းရေးဆွဲထားခြင်း ဖြစ်ပြီး အဆိုပါ နိုင်ငံဆိုင်ရာအစီအစဉ် (၂၀၁၈-၂၀၂၂) အရ UNICEF ၏ ပုံမှန်ရန်ပုံငွေ အမေရိကန် ဒေါ်လာ ၇၆.၇၀၅ သန်းနှင့် အခြားရန်ပုံငွေ အမေရိကန်ဒေါ်လာ ၁၃၀.၈၀၃ သန်း၊ စုစုပေါင်း အမေရိကန်ဒေါ်လာ ၂၀၇.၅၀၈ သန်းဖြင့် ကျန်းမာရေးနှင့် အာဟာရပြည့်ဝရေး၊ ပညာရေး၊ ရေရရှိရေး၊ ကျန်းမာသန့်ရှင်းရေးနှင့် တစ်ကိုယ်ရေသန့်ရှင်းရေး၊ ကလေးသူငယ် ကာကွယ် စောင့်ရှောက်ရေးနှင့် လူမှုရေးကာကွယ်စောင့်ရှောက်မှုနှင့် ကလေးသူငယ် အခွင့်အရေး ဆိုင်ရာ စောင့်ကြည့် လေ့လာသုံးသပ်ခြင်းစသည့် ကဏ္ဍများတွင် လုပ်ငန်းစီမံချက်များကို သက်ဆိုင်ရာ ဝန်ကြီးဌာနများနှင့် UNICEF တို့ ပူးပေါင်းအကောင်အထည်ဖော် ဆောင်ရွက်သွားမည် ဖြစ်ပါသည်။