စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေးကော်မတီ ပဉ္စမအကြိမ်(၂/၂၀၁၇) အစည်းအဝေး နှင့် ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေး လုပ်ငန်းကော်မတီ တတိယအကြိမ် (၂/၂၀၁၇) အစည်းအဝေးကျ

နေပြည်တော်၊  မေလ(၁၈)ရက်

စီမံကိန်းနှင့် ဘဏ္ဍာရေးဝန်ကြီးဌာနမှ စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေးကော်မတီ ပဉ္စမအကြိမ်(၂/၂၀၁၇)အစည်းအဝေးနှင့်  ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှုအတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေး လုပ်ငန်းကော်မတီ တတိယအကြိမ်(၂/၂၀၁၇) အစည်းအဝေးကို ၂၀၁၇ခုနှစ်၊ မေလ(၁၈)ရက်နေ့၊ နံနက်(၉:ဝ၀)နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၁) အစည်းအဝေး ခန်းမတွင် ကျင်းပရာ စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီနာယက ဒုတိယသမ္မတ(၂) ဦးဟင်နရီဗန်ထီးယူမှ  အဖွင့်အမှာစကား ပြောကြားခဲ့ပါသည်။   

အစည်းအဝေးသို့ စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်း၊ တိုင်းဒေသကြီးနှင့် ပြည်နယ်အစိုးရအဖွဲ့များမှ စီးပွားရေးနှင့်သက်ဆိုင်သည့် ဝန်ကြီးများ၊ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး၊ ပြည်ထောင်စုဝန်ကြီးဌာနများမှ အမြဲတမ်း အတွင်းဝန်များ၊ တိုင်းဒေသကြီးနှင့် ပြည်နယ်အစိုးရအဖွဲ့များမှ အတွင်းရေးမှူးများ၊ ကနဦး လိုအပ်ချက် စစ်တမ်း ကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေး လုပ်ငန်း ကော်မတီအဖွဲ့ဝင်များ၊ ညွှန်ကြားရေးမှူးချုပ်များ၊ စာရင်းအင်း ဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ (National Strategy for Development of Statistics- NSDS) ဖော်ဆောင်နိုင်ရေး လုပ်ငန်း အဖွဲ့ခေါင်းဆောင်များ၊ စီမံကိန်းနှင့် ဘဏ္ဍာရေးဝန်ကြီးဌာနမှ လက်ထောက်အတွင်းဝန်များနှင့် တာဝန်ရှိသူများ အပါအဝင် စုစုပေါင်း(၁၂၀) ဦးခန့် တက်ရောက်ခဲ့ကြပါသည်။

စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီ နာယက ဒုသမ္မတ(၂) ဦးဟင်နရီဗန်ထီးယူမှ  အဖွင့်အမှာစကား ပြောကြားရာတွင် နိုင်ငံတော်၏ ဖွံ့ဖြိုးရေး လုပ်ငန်းများ ဆောင်ရွက်ရာတွင် လိုအပ်သည့်မူဝါဒများ ချမှတ်နိုင်ရန်အတွက် တိကျ မှန်ကန်မှုရှိသည့် စာရင်းအင်းများကို အခြေခံရမည်ဖြစ်ကြောင်း၊ ရှေ့နောက်ညီညွတ်မှုရှိပြီး ယုံကြည်ကိုးစားနိုင်သော ခိုင်မာသည့် စာရင်းအင်းဆိုင်ရာ အချက်အလက်များကို အချိန်နှင့် တစ်ပြေးညီရရှိရန်လိုအပ်ပါကြောင်း၊ ပြည်တွင်း/ပြည်ပ ပညာရှင်များ၊ ဖွံ့ဖြိုးမှုမိတ်ဖက်များနှင့် ပူးပေါင်း၍ နည်းပညာများ ညှိနှိုင်းရ ယူလျက် ရှိသကဲ့သို့ နည်းပညာများထပ်မံလွှဲပြောင်း ရယူနိုင်ရန် Needs Assessment လိုအပ်ပါကြောင်း၊ ခေတ်စနစ်နှင့် ကိုက်ညီသည့် မြန်မာနိုင်ငံ စာရင်းအင်းဥပဒေသစ်ကို ပြည်ထောင်စုအစိုးရ၏ လမ်းညွှန် ချက်နှင့်အညီ ရေးဆွဲတင်ပြခဲ့ရာ အမျိုးသားလွှတ်တော်မှ အတည်ပြုပြီးဖြစ်၍ မကြာမီပြဌာန်းနိုင်တော့ မည်ဖြစ်ပါကြောင်း၊ မြန်မာနိုင်ငံ အမျိုးသားစာရင်းအင်းစနစ် ပေါ်ပေါက်လာရေးသည် နိုင်ငံတော်၏ ရည်မှန်းချက် တစ်ရပ်ဖြစ်ပြီး အမျိုးသားစာရင်းအင်းဆိုင်ရာမူဝါဒ တစ်ရပ်လည်း ဖြစ်ပါကြောင်း၊

စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ  ကာလရှည် အကောင်အထည် ဖော်ဆောင်ရေး စီမံချက်ကိုလည်း စာရင်းအင်းဆိုင်ရာ လုပ်ငန်းအဖွဲ့များနှင့် ပူးပေါင်းရေးဆွဲလျက်ရှိပြီး အကောင်အထည်ဖော်ဆောင်ရန် Trust Fund နှင့် နည်းပညာအကူအညီများ ရရှိစေရေးအတွက် ဖွံ့ဖြိုးမှုမိတ်ဖက်အဖွဲ့အစည်းများနှင့် ချိတ်ဆက်၍ အကောင်အထည်ဖော် ဆောင်ရွက်သွားမည် ဖြစ်ပါ ကြောင်း၊ ပုဂ္ဂလိကကဏ္ဍ စာရင်းအင်းများ ရယူနိုင်ရန်အတွက် ညှိနှိုင်းပေါင်းစပ်နိုင်ရန် လိုအပ်ပါကြောင်း၊ ဝန်ကြီးဌာနအချင်းချင်း ပူးပေါင်းဆောင်ရွက်မှု(Horizontal Cooperation) နှင့် တိုင်းဒေသကြီး/ ပြည်နယ်များနှင့် ပူးပေါင်းဆောင်ရွက်မှု (Vertical Cooperation) များသည်   အဓိကကျသည့်အတွက် ပူးပေါင်းဆောင်ရွက်ကြရန် တိုက်တွန်းပြောကြားလိုပါကြောင်း၊ ၂၀၁၆ ခုနှစ် မှစတင်ခဲ့သည့် ကမ္ဘာ့ဖွံ့ဖြိုးမှု အစီအစဉ်အရ ပြဌာန်းခဲ့သည့့် စဉ်ဆက်မပြတ် ဖွံ့ဖြိုးမှု ပန်းတိုင်များ(Sustainable Development Goals-SDGs)အကောင်အထည်ဖော်ဆောင် ရာတွင်လည်း   ဖွံ့ဖြိုးမှုသဘောတရားများ ပြောင်းလဲလာခဲ့ပြီ ဖြစ်ပါကြောင်း၊ SDGs  ပန်းတိုင် (၁၇)ခုနှင့် ရည်မှန်းချက် (၁၆၉)ခု ရှိပြီး တိုင်းတာမည့်ညွှန်ကိန်းပေါင်း (၂၄၂)ခုပါရှိကြောင်း၊ တစ်ကမ္ဘာလုံးတွင်လည်း SDGs Concept နှင့် ကိုက်ညီအောင် ဆောင်ရွက်နေပြီဖြစ်သဖြင့် မိမိတို့နိုင်ငံအနေဖြင့်လည်း အခြားနိုင်ငံ များနည်းတူ In line ဖြစ်ရန် ဆောင်ရွက်သွားရမည် ဖြစ်ပါကြောင်း၊ စီမံချက်များ အကောင်အထည်ဖော် ဆောင်ရာတွင်လည်း SDGs ညွှန်ကိန်းများ အသုံးပြုပြီး စောင့်ကြည့်အကဲဖြတ်ခြင်းဖြင့် (Monitoring and Evaluation) ညီညွတ်မျှတသည့် တစ်မျိုးသားလုံးဆိုင်ရာဖွံ့ဖြိုးမှုအဆင့်ကို ပိုမိုမြှင့်တင်နိုင်မည် ဖြစ်ပါကြောင်း၊ သဘာဝဘေးဆိုင်ရာ စီမံခန့်ခွဲမှုများအား ကြိုတင်ပြင်ဆင်နိုင်ရန်အတွက် သဘာဝဘေး အန္တရာယ်ဆိုင်ရာ စစ်တမ်း(၂၀၁၆)ကို ဗဟိုစာရင်းအင်းအဖွဲ့မှ နေပြည်တော်ကောင်စီနှင့် ရေကြီး ရေလွှမ်းမိုးမှု အများဆုံးကြုံတွေ့ခဲ့ရသည့် တိုင်းဒေသကြီး(၅)ခုတွင် စစ်တမ်းကောက်ယူခဲ့ပြီး  တွေ့ရှိချက်များ အပေါ်မူတည်၍ လိုအပ်သည့်စီမံချက်များ ဆောင်ရွက်နိုင်ရန် အစီရင်ခံစာများကို လည်း ဖြန့်ဝေပြီး ဖြစ်ပါကြောင်း၊  ကျန်တိုင်းဒေသကြီးနှင့် ပြည်နယ်များတွင်လည်း ဆက်လက် ကောက်ယူမှာ ဖြစ်သည့်အတွက် သက်ဆိုင်ရာတိုင်းဒေသကြီးနှင့် ပြည်နယ်များက ပူးပေါင်းဆောင်ရွက်ပေးကြဖို့ မှာကြား လိုပါကြောင်း ပြောကြားခဲ့ပါသည်။

ဆက်လက်၍ စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေး ကော်မတီနှင့် ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေးလုပ်ငန်း ကော်မတီများ၏ ဥက္ကဌ  စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီး ဦးကျော်ဝင်းမှ  စာရင်းအင်းကိန်းဂဏန်း မှန်ကန်မှသာ နိုင်ငံတော်၏ လူမှုစီးပွားဖွံ့ဖြိုးရေးအတွက် အဓိကကျသည့် မူဝါဒများ၊ စီမံကိန်းများ ချမှတ်ရာတွင် အထောက်အကူ ပြုနိုင်မည်ဖြစ်ကြောင်း၊ စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး လုပ်ငန်းဆောင်ရွက်ရာတွင် တွေ့ကြုံခဲ့ရသည့်  အခက်အခဲနှင့်စိန်ခေါ်မှုများ၊ အားနည်းချက် နှင့် လိုအပ်ချက်များ၊ ဆောင်ရွက်ပြီးစီးမှုနှင့် ဆက်လက် ဆောင်ရွက်ရမည့် လုပ်ငန်းစဉ်များကို ရှင်းလင်း ပြောကြားခဲ့ပါသည်။

ထို့နောက် စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီနှင့် ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ် ဖော်ထုတ်ရေး လုပ်ငန်းကော်မတီများ၏ အတွင်းရေးမှူး ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ ဗဟိုစာရင်းအင်းအဖွဲ့အနေဖြင့် စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီ၏ စတုတ္တအကြိမ်(၁/၂၀၁၇) အစည်းအဝေး လမ်းညွှန်ချက်အရ ဗဟိုစာရင်းအင်းအဖွဲ့မှ ဆောင်ရွက်နေသည့် စာရင်းအင်းဆိုင်ရာ လုပ်ငန်းများနှင့် သဘာဝဘေးဆိုင်ရာ စစ်တမ်းများ ကောက်ယူ၍ ဆန်းစစ်လေ့လာမှုများမှ တွေ့ရှိချက်များနှင့် ရှေ့ဆက်ဆောင်ရွက်မည့် လုပ်ငန်းစဉ်များအား ရှင်းလင်းတင်ပြခဲ့ပါသည်။
ထို့နောက် အစည်းအဝေးတက်ရောက်လာသူများမှ ကဏ္ဍအလိုက် ဝိုင်းဝန်းဆွေးနွေး တင်ပြကြပြီး တင်ပြချက်များအပေါ် စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေးကော်မတီ နာယက ဒုတိယသမ္မတ(၂) ဦးဟင်နရီဗန်ထီးယူ နှင့် ပြည်ထောင်စုဝန်ကြီး ဦးကျော်ဝင်းတို့မှ ပြန်လည်ဆွေးနွေးညှိနှိုင်းပေးပြီး  စာရင်းအင်းအချက်အလက်များ မှန်ကန်ရေး နှင့် အရေအသွေးပြည့်ဝရေး၊ အချိန်နှင့်တစ်ပြေးညီ ရရှိနိုင်ရေးအတွက် ဝိုင်းဝန်ဆောင်ရွက်ကြ ရမည်ဖြစ် ကြောင်း  ပေါင်းစပ်ညှိနှိုင်းပေးပြီး နိဂုံးချုပ်အမှာစကားပြောကြား၍ အခမ်းအနားကို ရုပ်သိမ်းခဲ့ပါသည်။                                                          

(သတင်းစဉ်)