စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့သည် ဆွီဒင်နိုင်ငံ စာရင်းအင်း ဌာန၊ ဆွီဒင်အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ(SIDA)၏ ပံ့ပိုးကူညီမှု ဖြင့် Gender Statistics in Myanmar စာအုပ်ထုတ်ဝေသည့်အခမ်းအနားကို ၂၀၁၈ ရက်နေ့၊ မတ်လ (၂၃) ရက်နေ့တွင် ဗဟိုစာရင်းအင်းအဖွဲ့၊ ရုံးအမှတ် (၃၂)၊ အစည်းအဝေး ခန်းမတွင် ကျင်းပပြုလုပ်ခဲ့ပါသည်။

အဆိုပါအခမ်းအနားသို့ ဗဟိုစာရင်းအင်းအဖွဲ့မှ ညွှန်ကြားရေးမှူးချုပ် ဒေါက်တာဝါဝါမောင်၊ ညွှန်ကြားရေးမှူးများ၊ ဆွီဒင်နိုင်ငံစာရင်းအင်းဌာန၊ ဆွီဒင် အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ(SIDA) မှ တာဝန်ရှိသူများ၊ သက်ဆိုင်ရာဝန်ကြီးဌာနများမှ ညွှန်ကြားရေးမှူးများ၊ အရာထမ်း/အမှုထမ်းများ၊ အရပ်ဘက်အဖွဲ့အစည်းများမှ ကိုယ်စားလှယ်များအပါအဝင် စုစုပေါင်း (၆၀) ဦးခန့် တက်ရောက်ခဲ့ကြပါသည်။

ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားရာတွင် ကျား/မ မညီမျှမှုဆိုသည်မှာ အမျိုးသမီးများအပေါ် မညီမျှမှုသာမက အမျိုးသားများအပေါ် မညီမျှမှုများလည်း ပါဝင်ပါကြောင်း၊ စာအုပ်ထုတ်ဝေခြင်းအားဖြင့် အမျိုးသားနှင့် အမျိုးသမီးများအကြား မညီမျှမှုကို ဟန်ချက်ညီအောင် ဆောင်ရွက် ပေးနိုင်မည့် မူဝါဒများချမှတ်နိုင်မည်ဖြစ်ပါကြောင်း၊ ဗဟိုစာရင်းအင်းအဖွဲ့အနေဖြင့် Gender Mainstreaming ကို အကောင်အထည်ဖော် ဆောင်ရွက်နေကြသော သက်ဆိုင်ရာဝန်ကြီးဌာနများ၊ ဖွံ့ဖြိုးမှုမိတ်ဖက်များ၊ အရပ်ဘက်အဖွဲ့အစည်းများနှင် အတူ လိုအပ်လျက်ရှိသော Gender Statistics Gap များကို ဆက်လက်တိုးတက် ရရှိအောင် ပူးပေါင်းဆောင်ရွက်သွားမည် ဖြစ်ပါကြောင်းပြောကြားခဲ့ပါသည်။

ဆက်လက်၍ ပြည်သူ့အင်အားဦးစီးဌာန၊ ဗဟိုစာရင်းအင်းအဖွဲ့၊ အရပ်ဘက်အဖွဲ့အစည်း များမှ တာဝန်ရှိသူများက စာအုပ်နှင့်ပတ်သက်၍ ရှင်းလင်းပြောကြားခဲ့ကြရာ တက်ရောက်လာကြသူများမှ သိရှိလိုသည်များမေးမြန်းခဲ့ကြပြီး အခမ်းအနားကိုနေ့လည် (12:00) အချိန်တွင် ရုပ်သိမ်းခဲ့ပါသည်။

နေပြည်တော်၊ မတ်လ (၂၃) ရက်