စင်ကာပူနိုင်ငံ၌ ကျင်းပသည့် အကြိမ် (၅၀) မြောက် အာဆီယံ စီးပွားရေး ဝန်ကြီးများ အစည်းအဝေးနှင့် ဆက်စပ် အစည်းအဝေးများသို့ စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်းတက်ရောက်

စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်းသည် စင်ကာပူ နိုင်ငံ၊ Shangri-La Hotel ၌ ၂၀၁၈ ခုနှစ် ဩဂုတ်လ ၂၈ ရက်နေ့မှ စက်တင်ဘာလ ၁ ရက် နေ့အထိ ကျင်းပသည့် အကြိမ် (၅၀) မြောက် အာဆီယံ စီးပွားရေးဝန်ကြီးများ အစည်း အဝေးနှင့် ဆက်စပ်အစည်းအဝေးများသို့ တက်ရောက်ခဲ့ပြီး ယနေ့မွှန်းလွဲပိုင်းတွင် ပြန်လည် ရောက်ရှိသည်။

ဩဂုတ်လ ၂၉ ရက်နေ့ နံနက်ပိုင်းတွင် ပြည်ထောင်စုဝန်ကြီးနှင့် အာဆီယံ စီးပွားရေး ဝန်ကြီးများသည် စင်ကာပူနိုင်ငံဝန်ကြီးချုပ် Lee Hsien Loong အား Shangri-La Hotel ၌ တွေ့ဆုံနှုတ်ဆက်ခဲ့ပြီးနောက် အကြိမ် (၅၀) မြောက် အာဆီယံ စီးပွားရေး ဝန်ကြီး များ အစည်းအဝေးနှင့် ဆက်စပ်အစည်းအဝေးများ ဖွင့်ပွဲအခမ်းအနားသို့ တက်ရောက်ခဲ့ပါ သည်။

ဆက်လက်၍ ပြည်ထောင်စုဝန်ကြီးသည် (၁၀) ကြိမ်မြောက် စီအယ်လ်အမ်ဗွီ (ကမ္ဘောဒီးယား၊ လာအို၊ မြန်မာနှင့် ဗီယက်နမ်) စီးပွားရေးဝန်ကြီးများအစည်းအဝေး၊ (၃၂) ကြိမ်မြောက် အာဆီယံကုန်သွယ်မှု ဒေသကောင်စီ အစည်းအဝေး၊ (၂၁) ကြိမ်မြောက် အာဆီယံရင်းနှီးမြှုပ်နှံမှု ဒေသကောင်စီအစည်းအဝေးနှင့် အကြိမ် (၅၀) မြောက် အာဆီယံ စီးပွားရေးဝန်ကြီးများ အစည်းအဝေးသို့ တက်ရောက်သည်။

ထို့နောက် ပြည်ထောင်စုဝန်ကြီးသည် ဩဂုတ်လ ၃၀ ရက်နေ့မှ စက်တင်ဘာလ ၁ ရက်နေ့အထိ ကျင်းပသည့် (၁၇) ကြိမ်မြောက် အာဆီယံ-တရုတ်၊ (၂၄) ကြိမ်မြောက် အာဆီယံ-ဂျပန်၊ (၁၅) ကြိမ်မြောက် အာဆီယံ-ကိုရီးယား၊ (၂၁) ကြိမ်မြောက် အာဆီယံ အပေါင်းသုံး (တရုတ်၊ ဂျပန်၊ ကိုရီးယား)၊ အာဆီယံ-အမေရိကန်၊ (၂၃) ကြိမ်မြောက် အာဆီယံ-သြစတြေးလျ-နယူးဇီလန်၊ (၆) ကြိမ်မြောက် အရှေ့အာရှ ၊ (၁၅) ကြိမ်မြောက် အာဆီယံ-အိန္ဒိယ၊ (၇) ကြိမ်မြောက် အာဆီယံ-ကနေဒါ၊ (၇) ကြိမ်မြောက် အာဆီယံ-ရုရှား စီးပွားရေးဝန်ကြီးများ အစည်းအဝေးနှင့် (၆) ကြိမ်မြောက် ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု ဝန်ကြီးအဆင့် အစည်းအဝေးများသို့ တက်ရောက်ဆွေးနွေးခဲ့ပြီး၊ (၁၀) ကြိမ်မြောက် မဲခေါင်-ဂျပန် စီးပွားရေးဝန်ကြီးများ အစည်းအဝေးတွင် ပူးတွဲ သဘာ ပတိအဖြစ် ဆောင်ရွက်ခဲ့သည်။

အဆိုပါ အစည်းအဝေးများတွင် အာဆီယံစီးပွားရေးအသိုက်အဝန်း ၂၀၂၅ အကောင် အထည်ဖော်မှုနှင့် စင်ကာပူနိုင်ငံမှ ၂၀၁၈ ခုနှစ် အာဆီယံအလှည့်ကျ ဥက္ကဋ္ဌ တာဝန်ယူစဉ် အတွင်း ဆောင်ရွက်လျက်ရှိသည့် စီးပွားရေးဆိုင်ရာ ဦးစားပေးလုပ်ငန်းများ၏ ဖြစ်ပေါ် တိုးတက်မှုအခြေအနေများ၊ အာဆီယံ-အပေါင်းတစ် လွတ်လပ်သော ကုန်သွယ်မှုဒေသ အကောင်အထည်ဖော်မှု ကိစ္စရပ်များ၊ စီးပွားရေး ပူးပေါင်းဆောင်ရွက်မှုဆိုင်ရာကိစ္စရပ်များ၊ စေ့စပ်ညှိနှိုင်းလျက်ရှိသည့် ဒေသတွင်းဘက်စုံ စီးပွားရေး ပူးပေါင်းဆောင်ရွက်မှုနှင့် ရှေ့ ဆက်လက်ဆောင်ရွက်ရမည့် ကိစ္စရပ်များအပေါ် လမ်းညွှန်မှုပေးခြင်းတို့ကို ဆောင်ရွက် ခဲ့ကြပါသည်။

ထို့အပြင် ပြည်ထောင်စုဝန်ကြီးသည် အမေရိကန် ဒုတိယကုန်သွယ်ရေးကိုယ်စား လှယ် Jeffrey D.Gerrish နှင့်လည်းကောင်း၊ အမေရိကန်-အာဆီယံ စီးပွားရေးကောင်စီ ဥက္ကဋ္ဌ Alexander C. Feldman ဦးဆောင်သည့် အာဆီယံ-အမေရိကန် စီးပွားရေး ကောင်စီအဖွဲ့နှင့်လည်းကောင်း တွေ့ဆုံဆွေးနွေးခဲ့သည်။

အဆိုပါ အစည်းအဝေးကာလအတွင်း အာဆီယံ စီးပွားရေးဝန်ကြီးများသည် အာဆီယံ ကုန်စည်ကုန်သွယ်ရေး သဘောတူစာချုပ်ကို ပြင်ဆင်သည့် ပထမ အခြေပြ စာချုပ်နှင့် အာဆီယံ ဝန်ဆောင်မှုဆိုင်ရာ မူဘောင်သဘောတူစာချုပ်၏ ဒသမအသုတ် ကတိကဝတ်များ အကောင်အထည်ဖော်ရေး အခြေပြစာချုပ်တို့ကို လက်မှတ်ရေးထိုးခဲ့ ကြောင်း သတင်းရရှိသည်။ (သတင်းစဉ်)

နေပြည်တော်၊ စက်တင်ဘာလ ၂ ရက်

, ,