ဒုတိယအကြိမ် မြန်မာ-ချက် စီးပွားရေးပူးပေါင်းဆောင်ရွက်မှုဆိုင်ရာ ပူးတွဲကော်မရှင် အစည်းအဝေး ချက်သမ္မတနိုင်ငံ၊ Prague မြို့တွင် ကျင်းပ

,

ချက်သမ္မတနိုင်ငံ၊ Prague မြို့တွင် ၂၀၁၈ခုနှစ်၊ ဇွန်လ ၄ ရက်နေ့မှ ၆ ရက်နေ့ အထိ ကျင်းပြုလုပ်သည့် ဒုတိယအကြိမ် မြန်မာ-ချက် စီးပွားရေး ပူးပေါင်းဆောင်ရွက်မှုဆိုင်ရာ ပူးတွဲ ကော်မရှင်အစည်းအဝေးသို့ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင် ဦးဆောင်၍ အစိုးရနှင့် ပုဂ္ဂလိက ကိုယ်စားလှယ် စုစုပေါင်း (၈) ဦး တက်ရောက်ခဲ့ပါသည်။

အဆို့ပါ အစည်းအဝေးသို့ ချက်သမ္မတနိုင်ငံမှ စက်မှုနှင့်ကုန်သွယ်ရေးဝန်ကြီးဌာန၊ ဒုတိယဝန်ကြီး H.E. Mr. Vladimir Bartl နှင့် အစိုးရနှင့် ပုဂ္ဂလိက ကိုယ်စားလှယ်များ တက် ရောက်ခဲ့ကြပြီး နှစ်နိုင်ငံအကြား စီးပွားရေး ပူးပေါင်းဆောင်မှုနှင့် ကုန်သွယ်မှုတိုးမြှင့်ရေးကိစ္စ ရပ်များ၊ စိုက်ပျိုးရေး၊ စက်မှုနှင့်နည်းပညာ၊ ဘူမိဗေဒနှင့်သတ္တု၊ သဘာဝပတ်ဝန်းကျင် ထိန်း သိမ်းရေး၊ ကျန်းမာရေး စောင့်ရှောက်မှု၊ ခရီးသွားလုပ်ငန်း၊ ဘဏ်လုပ်ငန်းနှင့် ရင်းနှီးမြှုပ်နှံမှု ဆိုင်ရာ ပူးပေါင်းဆောင်ရွက်ရေးကိစ္စရပ်များနှင့်စပ်လျဉ်း၍ ဆွေးနွေးခဲ့ကြပါသည်။

ဒုတိယအကြိမ် ပူးတွဲကော်မရှင်အစည်းအဝေး အပြီးတွင် စီမံကိန်းနှင့်ဘဏ္ဍာရေးဝန်ကြီး ဌာန ဒုတိယဝန်ကြီးနှင့် ချက်သမ္မတနိုင်ငံ၊ စက်မှုနှင့်ကုန်သွယ်ရေးဝန်ကြီးဌာန ဒုတိယဝန်ကြီး တို့သည် ဒုတိယအကြိမ် မြန်မာ-ချက် စီးပွားရေး ပူးပေါင်းဆောင်ရွက်မှုဆိုင်ရာ ပူးတွဲကော်မရှင် အစည်းအဝေး၏ ဆွေးနွေးမှုမှတ်တမ်းကို လက်မှတ်ရေးထိုး လဲလှယ်ခဲ့ပါသည်။

ဒုတိယဝန်ကြီးဦးဆက်အောင်သည် ချက်သမ္မတနိုင်ငံတွင် ရောက်ရှိနေစဉ်အတွင်း ချက် အမျိုးသားဘဏ် ဒုတိယဥက္ကဌ Mr. Vladimír Tomšík ဦးဆောင်သည့်အဖွဲ့နှင့်လည်းကောင်း၊ ချက်သမ္မတနိုင်ငံ ဘဏ္ဍာရေးဝန်ကြီးဌာန ဒုတိယဝန်ကြီး Mrs. Lenka Dupáková ဦးဆောင် သည့် အဖွဲ့နှင့်လည်းကောင်းတွေ့ဆုံ၍ ချက်သမ္မတနိုင်ငံနှင့် နိုင်ငံတကာစီးပွားရေး၊ ငွေရေး ကြေးရေးအခြေအနေများ၊ လတ်တလောဖြစ်ပေါ်နေသည့် Protectionism နှင့် Bilateralism တို့မှ ရိုက်ခတ်လာနိုင်သည့် အခြေအနေများ၊ ငွေကြေးမူဝါဒနှင့် ဘဏ္ဍာရေး မူဝါဒဆိုင်ရာ ဆောင်ရွက်သင့်သည့်အချက်များကို ရင်းနှီးပွင့်လင်းစွာ ဆွေးနွေးခဲ့ပါသည်။

အဆိုပါ ပူးတွဲကော်မရှင်အစည်းအဝေးကို နှစ်နိုင်ငံအကြား စီးပွားရေး ပူးပေါင်းဆောင် ရွက်မှု မြှင့်တင်ရန်နှင့် ကုန်သွယ်ရေးနှင့် ရင်းနှီးမြှုပ်နှံမှု လွယ်ကူချောမွေ့စေရန် ရည်ရွယ်၍ ချက်သမ္မတနိုင်ငံနှင့် မြန်မာနိုင်ငံတို့တွင် အလှည့်ကျ ကျင်းပခြင်းဖြစ်ပါသည်။ ပထမအကြိမ် ပူးတွဲကော်မရှင်အစည်းအဝေးကို မြန်မာနိုင်ငံ၊ နေပြည်တော်၌ ၂၀၁၆ ခုနှစ်၊ အောက်တိုဘာလ တွင် ကျင်းပပြုလုပ်ခဲ့ကြောင်း သတင်းရရှိပါသည်။  

(သတင်းစဉ်)

နေပြည်တော် ဇွန် ၈