တရားမဝင်ကုန်သွယ်မှုတိုက်ဖျက်ရေးလုပ်ငန်းဆောင်ရွက်ရာတွင် ဖမ်းဆီး/သိမ်းဆည်းရမိပစ္စည်းများနှင့် မော်တော်ယာဉ်များအား မြန်မြန်ဆန်ဆန် စီမံခန့်ခွဲဆောင်ရွက်နိုင်ရေးအတွက် လုပ်ငန်းညှိနှိုင်း အစည်းအဝေးကို ယမန်နေ့၊ နံနက် (၁၀:၀၀) နာရီတွင် နေပြည်တော်ရှိ စီမံကိန်းနှင့် ဘဏ္ဍာရေးဝန်ကြီး ဌာန၌ကျင်းပရာ အစည်းအဝေးသို့ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန် တက်ရောက်၍ အမှာစကား ပြောကြားပါသည်။

အစည်းအဝေးတွင် ပြည်ထောင်စုဝန်ကြီးက အမှာစကားပြောကြားရာ၌ တရားမဝင် ကုန်သွယ်မှုတိုက်ဖျက်ရေးလုပ်ငန်းဆောင်ရွက်မှုမှ ပြည်သူ့ဘဏ္ဍာအဖြစ် သိမ်းဆည်းရမိသော ယာဉ်နှင့်ပစ္စည်းများအား မလိုလားအပ်သော ပျက်စီးဆုံးရှုံးမှုများ မဖြစ်ပေါ်စေရေးအတွက် စနစ်တကျ ထိန်းသိမ်းထားရှိရေး၊ ဥပဒေလုပ်ထုံးလုပ်နည်းများနှင့်အညီ မှန်ကန်မြန်ဆန်စွာစီမံခန့်ခွဲရေး၊ ဖမ်းဆီး ရမိယာဉ်ပစ္စည်းများနှင့်ပတ်သက်၍ ဥပဒေကြောင်းအရ အရေးယူတရားစွဲဆိုမှုများ အမြန်ပြီးပြတ်အောင် ဆောင်ရွက်ရေးကိစ္စရပ်များအတွက် သက်ဆိုင်ရာဌာနများက ပူးပေါင်းညှိနှိုင်းဆွေးနွေးကြရန်ဖြစ် ကြောင်း၊ မလိုလားအပ်သော အုပ်ချုပ်မှုလျော့နည်းဖြစ်စဉ်များကြောင့် ပြည်သူ့ဘဏ္ဍာများလျော့နည်း ဆုံးရှုံးပျက်စီးမှုမရှိစေဘဲ စနစ်တကျအပ်နှံနိုင်ရေး၊ လုပ်ထုံးလုပ်နည်းနှင့်အညီ အကျိုးရှိစွာ ပြန်လည်အသုံးပြုနိုင်ရေးအတွက် စီမံ ဆောင်ရွက်သွားရန်လိုအပ်ကြောင်း စသည်ဖြင့် ပြောကြားပါသည်။

ထို့နောက် တက်ရောက်လာကြသည့်ဌာနများမှ ကိုယ်စားလှယ်များက မိမိတို့နှင့်သက်ဆိုင်ရာ ကိစ္စရပ်များအလိုက် ရှင်းလင်းတင်ပြဆွေးနွေးကြပြီး၊ ဆွေးနွေးချက်များအပေါ် ပြည်ထောင်စုဝန်ကြီး က ညှိနှိုင်းပေါင်းစပ်ဆွေးနွေးခဲ့ပါသည်။

အစည်းအဝေးသို့ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းနှင့် ဒေါ်သန်းသန်းလင်း၊ တရားမဝင်ကုန်သွယ်မှု တိုက်ဖျက်ရေးလုပ်ငန်းတွင် ပါဝင်ဆောင်ရွက်နေကြသည့် သက်ဆိုင်ရာဌာနများမှ ဌာနအကြီးအကဲများ  တက်ရောက်ခဲ့ကြကြောင်း သတင်းရရှိပါသည်။