စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း Virtual အစီအစဉ်ဖြင့်ပြုလုပ်သည့် အာဆီယံ+၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးသို့ တက်ရောက်

နေပြည်တော်၊ ဧပြီ ၁

ကမ္ဘောဒီးယားနိုင်ငံမှ Virtual အစီအစဉ်ဖြင့် အိမ်ရှင်အဖြစ် လက်ခံကျင်းပသော အာဆီယံ+၃ နိုင်ငံများ၏ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးအား ဧပြီလ ၁ ရက်၊ ၀၈:၃၀ နာရီမှ ၁၆:၃၀ နာရီထိ ကျင်းပရာ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ပါဝင်တက်ရောက်ပါသည်။

အစည်းအဝေးတွင် ကိုဗစ်-၁၉ ကပ်ရောဂါအလွန်တွင် ဆောင်ရွက်မည့် ပြန်လည်ထူထောင် ရေးအစီအစဉ်များနှင့် စပ်လျဉ်း၍ အာဆီယံ+၃ မက်ခရိုစီးပွားရေးသုတေသနရုံး (ASEAN+3 Macroeconomic Research Office - AMRO) က ပြုစုသည့် ASEAN+3 Regional Economic Outlook 2022 အပေါ် ရှုမြင် သုံးသပ်ချက်များ၊ AMRO ရုံးအား Regional Knowledge Hub အဖြစ် ဦးတည်ဆောင်ရွက်သွားမည့် အခြေအနေများ၊ AMRO ရုံး၏ ၂၀၂၃ ခုနှစ် ရသုံးခန့်မှန်းခြေ ငွေစာရင်းနှင့် ဝန်ထမ်းအင်အား တိုးမြှင့်ဆောင်ရွက်သွားမည့် အခြေအနေများ၊ AMRO ၏ လုပ်ငန်းဆောင်ရွက်မှုအပေါ် ပြန်လည်သုံးသပ်ခြင်းဆိုင်ရာကိစ္စရပ်များ၊ အာဆီယံ+၃ နိုင်ငံများတွင် အကောင်အထည်ဖော် ဆောင်ရွက်လျက်ရှိသည့် ဇင်းမယ်အစီအစဉ်တွင် နိုင်ငံစုံပါဝင်လာရေး (Chiang Mai Initiative Multilateralisation-CMIM) လုပ်ငန်းအစီအစဉ်အရ ဆောင်ရွက်လျက် ရှိသည့် လုပ်ငန်းစဉ်များ၏ တိုးတက်မှုအခြေအနေများ၊ CMIM Agreement ပြင်ဆင်ချက်ကို အတည်ပြုဆောင်ရွက်နိုင်ရေးဆိုင်ရာကိစ္စရပ်များ၊ အာဆီယံ+၃ နိုင်ငံများ၏ မူဝါဒရေးရာကိစ္စရပ် များနှင့် အကောင်အထည်ဖော်မှု အခြေအနေများနှင့် အာရှငွေချေးစာချုပ်ဈေးကွက်ဖွံ့ဖြိုး တိုးတက်မှုအတွက် နည်းပညာအကူအညီပေးရေး အစီအစဉ်များနှင့် ရှေ့ဆက်လက်ဆောင်ရွက် မည့်လုပ်ငန်းစဉ်များအား ညှိနှိုင်းဆွေးနွေးခဲ့ကြပါသည်။

အစည်းအဝေးတွင် ဒုတိယဝန်ကြီးက သက်ဆိုင်ရာခေါင်းစဉ်အလိုက် ပါဝင်ဆွေးနွေးရာ၌ AMRO တွင် ကမ္ဘောဒီးယား၊ လာအို၊ မြန်မာနှင့် ဗီယက်နမ်နိုင်ငံများမှ အရာထမ်းများက ဒေသဆိုင်ရာ မက်ခရိုစီးပွားရေးသုတေသန လုပ်ငန်းစဉ်များ၌ ပါဝင်ဆောင်ရွက်လျက်ရှိကြောင်း၊ မြန်မာနိုင်ငံအနေဖြင့် Financial resilience against climate and natural disasters လုပ်ငန်း အဖွဲ့၏ စွမ်းဆောင်ရည် တိုးမြှင့်ရေးဆိုင်ရာကိစ္စရပ်များတွင်လည်း ပူးပေါင်းပါဝင်ဆောင်ရွက် လျက်ရှိကြောင်း၊ မြန်မာနိုင်ငံအနေဖြင့် ကိုဗစ်-၁၉ ကာလအလွန် နိုင်ငံ၏စီးပွားရေး ပြန်လည် ဦးမော့လာစေရေး ကြိုးပမ်းဆောင်ရွက်လျက်ရှိရာတွင် ၂၀၂၂-၂၀၂၃ ခု၊ ဘဏ္ဍာရေးနှစ်တွင် စီးပွားရေးဖွံ့ဖြိုးတိုးတက်မှုနှုန်းကို ၃.၇ % ရရှိရန် မျှော်မှန်းထားပါကြောင်း၊ ဒီဂျစ်တယ်နည်းပညာ အသုံးပြုသည့် ငွေကြေးဝန်ဆောင်မှုများ၊ ရောင်းဝယ်မှုနှင့် ဝန်ဆောင်မှုများ တိုးမြှင့်ဆောင်ရွက် လျက်ရှိသော်လည်း ဒီဂျစ်တယ်အခြေခံအဆောက်အဦဆိုင်ရာနှင့် ကျွမ်းကျင်မှုများ၊ နည်းပညာနှင့် ဆိုက်ဘာ လုံခြုံရေးဆိုင်ရာများတွင် လိုအပ်ချက်များ ရှိနေသေး၍ ဒီဂျစ်တယ်စီးပွားရေးစနစ် ဖြစ်ထွန်းလာစေရေး အရှိန်မြှင့်တင်ဆောင်ရွက်သွားမည်ဖြစ်ကြောင်း၊ မြန်မာနိုင်ငံအနေဖြင့် ဒေသတွင်းစီးပွားရေး ပြန်လည်ဦးမော့လာစေရေး လုပ်ငန်းစဉ်များတွင် အာဆီယံ + ၃ နိုင်ငံများ နှင့် ပိုမိုနီးကပ်စွာ ပူးပေါင်းဆောင်ရွက်သွားမည်ဖြစ်ကြောင်း ပါဝင်ဆွေးနွေးခဲ့ပါသည်။

အာဆီယံ + ၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးအား အာဆီယံနိုင်ငံများနှင့် အပေါင်းသုံးနိုင်ငံများဖြစ်ကြသည့် တရုတ်၊ ဂျပန်နှင့် ကိုရီးယားသမ္မတ နိုင်ငံများတွင် အိမ်ရှင်အဖြစ် အလှည့်ကျကျင်းပလျက်ရှိရာ ယခုနှစ်အတွက် အိမ်ရှင်အဖြစ် အာဆီယံနိုင်ငံများဖက်မှ ကမ္ဘောဒီယားနိုင်ငံနှင့် အပေါင်းသုံးနိုင်ငံများဖက်မှ တရုတ်ပြည်သူ့ သမ္မတနိုင်ငံတို့က Co-Chairs များအဖြစ် လက်ခံကျင်းပခြင်းဖြစ်ပြီး၊ လက်ရှိအခြေအနေတွင် ကိုဗစ်-၁၉ ဖြစ်ပွားမှုအခြေအနေများကြောင့် အာဆီယံ+၃ အစည်းအဝေးများအား Virtual Meeting ပုံစံဖြင့် ကျင်းပဆောင်ရွက်လျက်ရှိကြောင်းသိရသည်။

ယခုကျင်းပသည့် အာဆီယံ+၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်း အဝေးမှ ဆွေးနွေးဆုံးဖြတ်ချက်များကို အတည်ပြုနိုင်ရေးအတွက် ၂၀၂၂ ခုနှစ်၊ ဧပြီလ ၈ ရက်တွင် ကျင်းပမည့် အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဌများ အစည်းအဝေးသို့ ဆက်လက်တင်ပြဆောင်ရွက်မည်ဖြစ်ပါသည်။

ယခုအစည်းအဝေးသို့ အာဆီယံ+၃ နိုင်ငံများ၏ ဘဏ္ဍာရေးဝန်ကြီးဌာနများနှင့် ဗဟိုဘဏ် များမှ ဒုတိယဝန်ကြီးများနှင့် ဒုတိယဥက္ကဌများ တက်ရောက်ခဲ့ကြကြောင်း သတင်းရရှိပါသည်။

သတင်းစဉ်