PDF အကြမ်းဖက်လက်နက်ကိုင်များ၏ ရက်စက်စွာ သေနတ်ဖြင့်ပစ်ခတ် သတ်ဖြတ်ခဲ့မှုကြောင့် သေဆုံးသူ ဒေါ်ဂျမ်းတောနှင့် ဒေါ်ခင်ဆွေမြင့်တို့၏ ငွေကြေးနှင့် လက်ဝတ်ရတနာများအား ပြန်လည်အပ်နှံသည့် အခမ်းအနား ကျင်းပ

နေပြည်တော်၊ ဒီဇင်ဘာ ၂၉

          စစ်ကိုင်းတိုင်းဒေသကြီး၊ တန့်ဆည်မြို့နယ်၊ ဒေါင့်ကြီးကျေးရွာတွင် ၁၅-၁၂-၂၀၂၁ ရက်နေ့ က PDF အကြမ်းဖက်လက်နက်ကိုင်များ၏ ရက်စက်စွာ သေနတ်ဖြင့်ပစ်ခတ် သတ်ဖြတ်ခဲ့မှုကြောင့် သေဆုံးသူ ဒေါ်ဂျမ်းတော အသက်(၈၀)နှစ်နှင့် ဒေါ်ခင်ဆွေမြင့် အသက် (၇၂) နှစ်တို့ပိုင်ဆိုင်သော လယ်ယာမြေလုပ်ပိုင်ခွင့်ပြုလက်မှတ် (ပုံစံ-၇)အပါအဝင် ငွေကြေးနှင့် လက်ဝတ်ရတနာပစ္စည်းများအား ရှာဖွေတွေ့ရှိ၍ ကာယကံရှင်မိသားစုသို့ ပြန်လည်အပ်နှံသည့်အခမ်းအနားကို နေပြည်တော်ရှိ ရုံးအမှတ်(၃၄)၊စီမံကိန်းနှင့်ဘဏ္ဍာရေးဝန်ကြီးဌာန အစည်းအဝေးခန်းမ၌ ကျင်းပပြုလုပ်သည်။

          အဆိုပါအခမ်းအနားသို့ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း၊ ကာကွယ်ရေးဦးစီးချုပ်ရုံး(ကြည်း)မှ ဗိုလ်မှူးချုပ်မျိုးမင်း၊ ပြည်ထဲရေးဝန်ကြီးဌာနမှ ဒုတိယရဲချုပ်(၁) ရဲဗိုလ်ချုပ်အောင်အောင်နှင့် တာဝန်ရှိသူများ၊ သေဆုံးသူများ၏ မိသားစုဝင်များ တက်ရောက်ကြသည်။

          အခမ်းအနားတွင် စီမံကိန်းနှင့် ဘဏ္ဍရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက အဖွင့်အမှာစကားပြောကြားပြီး ပြန်လည်သိမ်းဆည်းရရှိခဲ့သည့် သေဆုံးသူများ၏ ငွေကြေး၊ ပစ္စည်းနှင့် လက်ဝတ်ရတနာများကို ကာကွယ်ရေးဦးစီးချုပ်ရုံး(ကြည်း)မှ ဗိုလ်မှူးချုပ်မျိုးမင်းနှင့် ရဲဗိုလ်ချုပ် အောင်အောင်တို့က သေဆုံးသူများ၏သားနှင့်တူဖြစ်သူ ငွေရေးကြေးရေးကြီးကြပ် စစ်ဆေးရေးဦးစီးဌာန၊ ဒုတိယညွှန်ကြားရေးမှူးချုပ်  ဦးကိုကိုမောင်၊ သမီးများဖြစ်ကြသော ဒေါ်ခိုင်နွယ်ဝင်းနှင့် ဒေါ်အေးယုခိုင်တို့ထံ ပြန်လည်အပ်နှံခဲ့ပြီးနောက် ဦးကိုကိုမောင်က ကျေးဇူးတင်စကား ပြန်လည်ပြောကြားပါသည်။

          ယခုကျင်းပပြုလုပ်သည့် အခမ်းအနားတွင် မိသားစုပိုင် ရွှေထည်ပစ္စည်းအမျိုးအစား (၂၀)မျိူး၊ ငွေသား (၂,၁၁၃,၈၀၀)ကျပ်၊ လယ်ယာမြေလုပ်ပိုင်ခွင့်ပြုလက်မှတ် (ပုံစံ-၇) မူရင်းများ၊ အငြိမ်းစားလစာစာအုပ်(မူရင်း) ၁အုပ်၊ နိုင်ငံသားစိစစ်ရေးကတ်(မူရင်း) ၁ ခု နှင့် အိမ်ထောင်စု လူဉီးရေစာရင်း(မူရင်း) ၁ ရွက်တို့အား ပြန်လည်ပေးအပ်နိုင်ခဲ့သည်။

          ဖြစ်စဉ်မှာ ၂၀၂၁ ခုနှစ်၊ ဒီဇင်ဘာလ ၁၅ ရက်နေ့၊ ည ၁ နာရီခန့်တွင်  PDF အကြမ်းဖက် လက်နက်ကိုင်များက စစ်ကိုင်းတိုင်းဒေသကြီး၊ တန့်ဆည်မြို့နယ်၊ ဒေါင့်ကြီးကျေးရွာနေ ဒေါ်ဂျမ်းတောနှင့် ဒေါ်ခင်ဆွေမြင့်တို့အား  ရက်စက်စွာ သေနတ်ဖြင့် ပစ်ခတ်သတ်ဖြတ်ခဲ့၍ နေအိမ်အား မီးရှို့ဖျက်ဆီးသွားခဲ့ပြီးနောက် လုံခြုံရေးတပ်ဖွဲ့ဝင်များက  နေအိမ်အား သွားရောက် စစ်ဆေးရာမှ နေအိမ်အတွင်း သိုဝှက်ထားသော စာရွက်စာတမ်း၊ ငွေကြေးနှင့် ရွှေထည်ပစ္စည်းများကို ရှာဖွေတွေ့ရှိခဲ့ပြီး စနစ်တကျ မှတ်တမ်းပြုလုပ် သိမ်းဆည်းပြီးနောက်၊ ၎င်းတို့၏ မိသားစုဝင်များထံ ပြန်လည်ပေးအပ်ခြင်းဖြစ်ကြောင်း၊ မိသားစုဝင်များအနေဖြင့် နိုင်ငံတော်စီမံအုပ်ချုပ်ရေးကောင်စီနှင့် တာဝန်ရှိသူ အဆင့်ဆင့်ကို ကျေးဇူးတင်လျက်ရှိကြောင်း သတင်းရရှိသည်။

သတင်းစဉ်

AttachmentSize
PDF icon 1986516.pdf400.18 KB