တာဝန်ယူမှု၊ တာဝန်ခံမှု ရှိပြီး အာမခံရှိသော ဈေးကွက်ကို ဖော်ဆောင်၍ သဘာဝသယံဇာတများ ထုတ်လုပ်ခြင်းမှ ရောင်းချခြင်း၊ သုံးစွဲခြင်းထိ ကွင်းဆက်တစ်ခုလုံး ကို ထောက်ပံ့ပေးနိုင်ပြီး သယံဇာတ အရင်းအမြစ်များ ရေရှည် ထိန်းသိမ်းကာ အားလုံးပါဝင်သော စဉ်ဆက်မပြတ် ဖွံ့ဖြိုးတိုးတက်ရေး ဖော်ဆောင်နိုင်ရန်နှင့် တရားဝင် ရောင်းဝယ်နိုင်သော စီးပွားရေးရပ်ဝန်း ဖွင့်လှစ်ထားရှိခြင်းဖြင့် တရားမဝင် ရောင်းဝယ်မှုများ ပပျောက်ပြီး ရသင့်ရထိုက်သော အခွန်ဘဏ္ဍာငွေများ ရရှိစေရန်အတွက် နိုင်ငံတကာ အဆင့်မီ ရွှေ၊ ကျောက်မျက်၊ သတ္တုဗဟိုဈေးကွက် လျှင်မြန်စွာ ဖြစ်ပေါ် လာစေရန် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းသည် ယမန်နေ့ ညနေတွင် IMRER ဖြစ်မြောက်ရေး ကော်မတီ ဥက္ကဋ္ဌ သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာန အမြဲတမ်းအတွင်းဝန် ဦးဌေးအောင် နှင့်အတူ ရန်ကုန်တိုင်းဒေသကြီး၊ ကမာရွတ်မြို့နယ်၊ ကျွန်းတောလမ်း ( နာနတ်တောလမ်း နှင့် ဟံသာဝတီ လမ်းကြား) တို့တွင် Crown Advanced Construction Co., Ltd မှ တည်ဆောက်လျှက်ရှိသော Time City Project ရှိ တည်ဆောက်ရေး လုပ်ငန်းခွင်သို့ သွားရောက် ကြည့်ရှုစစ်ဆေး ခဲ့သည်။

နိုင်ငံတကာ အဆင့်မီ ရွှေ၊ ကျောက်မျက်၊ သတ္တုဗဟိုဈေးတွင် ရွှေထည်နှင့် ကျောက်မျက်ရတနာ ဆိုင်များ၊ International Gold Stock Share Market၊ ရှေးဟောင်း ပစ္စည်း အရောင်းပြခန်းများ၊ ရိုးရာ ပစ္စည်းအရောင်းပြခန်းများ၊ ကျောက်မျက်ရတနာ စမ်းသပ်စစ်ဆေးခန်း၊ အရောင်းဆိုင်အမျိုးမျိုး၊ ဘဏ်တစ်ခု၊ Five Star Hotel တစ်ခုနှင့် အကျိုးဆောင် ရုံးများ ပါဝင်မည် ဖြစ်သည်။

နိုင်ငံတကာ အဆင့်မီ ရွှေ၊ ကျောက်မျက်၊ သတ္တုဗဟိုဈေးကွက် (Myanmar International Multi Resource and Economic Region-MIMRER) ကို ယခု (၂၀၁၈) နှစ်ကုန်ပိုင်းတွင် ဖွင့်လှစ်နိုင်ရေး စီစဉ်ဆောင်ရွက်လျက်ရှိကြောင်း သတင်းရရှိသည်။

(သတင်းစဉ်)