ရန်ကုန်စတော့အိပ်ချိန်းတွင် စာရင်းဝင်ကုမ္ပဏီတိုး

           ရန်ကုန်စတော့အိပ်ချိန်းတွင် စာရင်းဝင်ကုမ္ပဏီ (၆) ခုရှိရာ ယခုအခါ သတ္တမမြောက်စာရင်းဝင် ကုမ္ပဏီအဖြစ် AMATA Holding Public Co., Ltd ကို ခွင့်ပြုလိုက်ပြီဖြစ်သည်။ အဆိုပါကုမ္ပဏီ၏ ရန်ကုန်စတော့အိပ်ချိန်းတွင် စာရင်းဝင်သည့် အခမ်းအနားကို နံနက်၊ ၁၁:၀၀ နာရီအချိန်တွင် ရန်ကုန်မြို့၊ အမှတ်၊ ၂၄-၂၆ ဆူးလေဘုရားလမ်းရှိ ရန်ကုန်စတော့အိပ်ချိန်းခန်းမ၌ COVID – 19 ကာကွယ် ထိန်းချုပ်ရေးဆိုင်ရာ စည်းကမ်းချက်များနှင့်အညီ ကျင်းပသည်။

          အခမ်းအနားသို့ မြန်မာနိုင်ငံငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် ဥက္ကဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းနှင့်ကော်မရှင်အဖွဲ့ဝင် များ၊ ရန်ကုန်စတော့အိပ်ချိန်းမှဒါရိုက်တာအဖွဲ့ဝင်များ၊ AMATA Holding Public Co., Ltd.  ဥက္ကဌနှင့် ဒါရိုက်တာအဖွဲ့ဝင်များ၊ စာရင်းဝင်ကုမ္ပဏီများ (Listed Companies)မှ အကြီးအကဲများ၊ ငွေချေး သက်သေခံလက်မှတ်ကုမ္ပဏီများ (Securities Companies) မှ ကိုယ်စားလှယ်များ၊ ဖိတ်ကြားထားသူများ စုစုပေါင်း (၃၆) ဉီး တက်ရောက်ကြသည်။

          အခမ်းအနားတွင် မြန်မာနိုင်ငံငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင် ဥက္ကဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက အဖွင့်အမှာစကား ပြောကြားရာ၌ AMATA Holding Public Co., Ltd. သည် ၂၇-၆-၂၀၁၇ ရက်နေ့တွင် အများနှင့် သက်ဆိုင်သောကုမ္ပဏီအဖြစ် ဖွဲ့စည်းတည်ထောင်ခဲ့ပြီးနောက် ၂၀၂၀  ပြည့်နှစ်တွင် ရန်ကုန်စတော့ အိပ်ချိန်း၌ စာရင်းဝင်ကုမ္ပဏီအဖြစ် လျှောက်ထားလာသဖြင့်  စာရင်းဝင်စံနှုန်းများ၊ ငွေချေးသက်သေခံ လက်မှတ်များ စာရင်းတင်သွင်းခြင်းဆိုင်ရာ လုပ်ထုံးလုပ်နည်းများနှင့်အညီ စာရင်းဝင်စစ်ဆေးခြင်း လုပ်ငန်းများကို စိစစ်ဆောင်ရွက်ခဲ့ကာ  ရန်ကုန်စတော့အိပ်ချိန်းက မြန်မာနိုင်ငံငွေချေးသက်သေခံ လက်မှတ်လုပ်ငန်းကြီးကြပ်ရေးကော်မရှင်သို့ ဆက်လက်ထောက်ခံ တင်ပြခဲ့သဖြင့် ကော်မရှင်က ဥပဒေ၊ နည်းဥပဒေ၊ အမိန့်ညွှန်ကြားချက်များနှင့်အညီစိစစ်၍ ခွင့်ပြုပေးခဲ့ပါကြောင်း၊

          ရန်ကုန်စတော့အိပ်ချိန်းတွင် စာရင်းဝင်ထားသည့် ကုမ္ပဏီပေါင်း (၇) ခု ရှိပြီဖြစ်ပါကြောင်း၊ စာရင်းဝင်ကုမ္ပဏီများတွင် ရင်းနှီးမြှုပ်နှံမှုလုပ်ငန်း၊ ဘဏ်လုပ်ငန်း၊  အထူးစီးပွားရေးဇုန် အကောင် အထည်ဖော်ရေးလုပ်ငန်း၊ ဆက်သွယ်ရေးလုပ်ငန်း၊ ဘက်စုံထောက်ပံ့ပို့ဆောင်ရေးလုပ်ငန်း၊ အပန်းဖြေ ဟိုတယ်များ၊ လူစီးမီးပုံးပျံဝန်ဆောင်မှုလုပ်ငန်းများ ဖြစ်ပါကြောင်း၊

          မြန်မာနိုင်ငံ၏ အရင်းအနှီးဈေးကွက်သည် ငွေချေးသက်သေခံလက်မှတ်လုပ်ငန်းကြီးကြပ်ရေး ကော်မရှင်က  ဈေးကွက်ဖွံ့ဖြိုးရေးနှင့်တည်ငြိမ်ရေးကို ဥပဒေ၊ နည်းဥပဒေ၊ လုပ်ထုံးလုပ်နည်းများနှင့် အညီ စနစ်တကျ ထိန်းကျောင်းထားရှိသည့်အတွက် အများပြည်သူများအနေဖြင့် ယုံကြည်စိတ်ချစွာ ရင်းနှီးမြှုပ်နှံမှုပြုလုပ်နိုင်သည့် ဈေးကွက်တစ်ခုဖြစ်ပါကြောင်း၊ မြန်မာနိုင်ငံ၏ အရင်းအနှီးဈေးကွက် တွင် နိုင်ငံခြားသားများ ရင်းနှီးမြှုပ်နှံမှုကိုလည်း ၂၀၂၀ ပြည့်နှစ်၊ မတ်လမှစ၍ ခွင့်ပြုပေးခဲ့သဖြင့် နိုင်ငံခြားသားများလည်း ပါဝင်ရင်းနှီးမြှုပ်နှံကြလျက်ရှိကြောင်း၊ အများပြည်သူ အလွယ်တကူ ရင်းနှီး မြှုပ်နှံမှုပြုနိုင်ရန် Online မှတစ်ဆင့် Securities Account ဖွင့်လှစ်၍ အရောင်းအဝယ် ဆောင်ရွက်နိုင် ရန်လည်း ခွင့်ပြုပေးထားပြီးဖြစ်ပါကြောင်း၊ ထို့ပြင် ကော်မရှင်သည် ရန်ကုန်စတော့အိပ်ချိန်း စာရင်းဝင် ကုမ္ပဏီများနှင့် အစုရှယ်ယာရှင် (၁၀၀) အထက်ရှိသည့် အများပိုင်ကုမ္ပဏီများ လိုက်နာရမည့် ကော်ပိုရိတ် စီမံအုပ်ချုပ်မှုဆိုင်ရာအမိန့်ကြော်ငြာစာကိုလည်း ထုတ်ပြန်ပေးခဲ့ပါကြောင်း၊ ရန်ကုန် စတော့အိပ်ချိန်းတွင် အများပြည်သူများက အရောင်းအဝယ်ပြုနိုင်ရန် စတော့ရှယ်ယာဈေးနှုန်းများကို မြန်မာ့ရုပ်မြင်သံကြားမှလည်းကောင်း၊ နေ့စဉ်ထုတ်သတင်းစာများတွင်လည်းကောင်း နေ့စဉ်ထုတ်လွှင့် ကြေညာပေးလျက်ရှိပါကြောင်း။

          ရန်ကုန်စတော့အိပ်ချိန်းတွင် အများပိုင်ကုမ္ပဏီငယ်များ ဝင်ရောက်လာနိုင်စေရန် Pre-Listing Board တစ်ခုကို ထူထောင်နိုင်ရန်လည်း သုံးသပ်ဆောင်ရွက်လျက်ရှိပါကြောင်း၊ ယခုအခါ ရန်ကုန် စတော့အိပ်ချိန်းတွင် သတ္တမမြောက်စာရင်းဝင်ကုမ္ပဏီအဖြစ် ပါဝင်လာပြီဖြစ်သည့် AMATA Holding Public Co., Ltd. ၏ ဒါရိုက်တာအဖွဲ့ဝင်များနှင့် ရှယ်ယာရှင်များကိုယ်စား ဂုဏ်ယူဝမ်းမြောက်ပါကြောင်း စသည်ဖြင့် ပြောကြားခဲ့ပါသည်။

          ထို့နောက် AMATA Holding Public Co., Ltd. ဥက္ကဌ ဉီးဝင်းအောင်က ကုမ္ပဏီ၏ လုပ်ငန်း များနှင့် စီမံခန့်ခွဲမှုတို့နှင့်စပ်လျဉ်း၍ ရှင်းလင်းပြောကြားပြီး၊ စာရင်းဝင်ရောက်နိုင်ရန် စိစစ်ဆောင်ရွက် ပေးခဲ့သည့် မြန်မာနိုင်ငံ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်နှင့် ရန်ကုန် စတော့အိပ်ချိန်းတို့အား အထူးပင်ကျေးဇူးတင်ရှိပါကြောင်း ပြောကြားပါသည်။

ထို့နောက် ကော်မရှင်ဥက္ကဋ္ဌက ကုမ္ပဏီသို့ စာရင်းဝင်အသိအမှတ်ပြုလက်မှတ်ကို ပေးအပ်ခဲ့ပြီး မင်္ဂလာအချိန်တွင် အောင်ဇေယျတု ခေါင်းလောင်း တီးခတ်၍ အခမ်းအနားကို ရုပ်သိမ်းခဲ့ပါသည်။

        မြန်မာနိုင်ငံ၏ စီးပွားရေးဖွံ့ဖြိုတိုးတက်မှုကို အရင်းအနှီးဈေးကွက်ဖြင့် အထောက်အကူ ပြုနိုင်စေရန် ရည်ရွယ်၍ ရန်ကုန်စတော့အိပ်ချိန်းကို ရန်ကုန်မြို့၊ အမှတ်၊ ၂၄-၂၆ ဆူးလေဘုရားလမ်းရှိ ယခင်မြန်မာနိုင်ငံတော်ဗဟိုဘဏ်အဆောက်အဦ၌ ၉-၁၂-၂၀၁၅ ရက်နေ့တွင် စတင်ဖွင့်လှစ်ခဲ့ရာ  ပထမမြန်မာရင်းနှီးမြှုပ်နှံမှုကုမ္ပဏီ (First Myanmar Investment Company Limited – FMI)၊ မြန်မာသီလဝါအက်စ်အီးဇက်ပတ်ဘလစ်ဟိုးလ်ဒင်းလီမိတက် (Myanmar Thilawa SEZ Holding Public Limited - MTSH)၊ မြန်မာနိုင်ငံသားများဘဏ်လီမိတက် (Myanmar Citizen Bank – MCB)၊ ပထမပုဂ္ဂလိကဘဏ်လီမိတက် (First Private Bank – FPB)၊ တီအမ်အိတ်ချ်ဆက်သွယ်ရေး အများနှင့် သက်ဆိုင်သော ကုမ္ပဏီလီမိတက် (TMH Telecom Public Company Limited – TMH)၊ ထာဝရနဒီအုပ်စုကုမ္ပဏီများ အများနှင့်သက်ဆိုင်သောကုမ္ပဏီ (Ever Flow River Group Public Company Limited – EFR) နှင့် အမတဟိုးလ်ဒင်းအများနှင့်သက်ဆိုင်သော ကုမ္ပဏီ (AMATA Holding Public Co., Ltd. – AMATA) တို့သည် စာရင်းဝင်ကုမ္ပဏီများအဖြစ် ၎င်းတို့၏ အစုရှယ်ယာများအား ငွေချေး သက်သေခံလက်မှတ်ကုမ္ပဏီများမှတစ်ဆင့် နေ့စဉ်ရောင်းဝယ်လျက်ရှိသည်ကိုတွေ့ရသည်။ COVID-19 ကပ်ရောဂါ ကာကွယ်ထိန်းချုပ်ရေးအတွက် ကန့်သတ်ချက်များ ရှိခဲ့သော်လည်း ရန်ကုန်စတော့ အိပ်ချိန်း၏ စတော့ရှယ်ယာရောင်းဝယ်မှုများမှာ ရပ်တန့်မှုမရှိခဲ့ပါ။

          ရန်ကုန်စတော့အိပ်ချိန်းကို နိုင်ငံပိုင် မြန်မာ့စီးပွားရေးဘဏ်နှင့် ဂျပန်နိုင်ငံ ဒိုင်ဝါသုတေသန အဖွဲ့၊ တိုကျိုစတော့အိပ်ချိန်းတို့က ဖက်စပ်တည်ထောင်ထားခြင်းဖြစ်ပြီး၊ ယနေ့အထိ မတည်ရင်းနှီးငွေ  ကျပ် ၃၂.၀ ဘီလီယံ၊  စတော့ရှယ်ယာကုန်သွယ်မှုတန်ဖိုး ကျပ် ၁၆၀ ဘီလီယံ ရှိပြီဖြစ်သည်။ စတော့ ရှယ်ယာဈေးကွက်သည် ငွေပိုငွေလျှံရှိသူများအနေဖြင့် အိမ်ခြံမြေ၊ ရွှေ၊ ဒေါ်လာများ ဝယ်ယူရင်းနှီး မြှုပ်နှံခြင်းထက် ရေရှည်အကျိုးအမြတ်ပိုမိုရရှိနိုင်သော ဈေးကွက်တစ်ခုဖြစ်ရာ ဈေးကွက်အခြေအနေ များကို သေချာလေ့လာ၍ ရင်းနှီးမြှုပ်နှံသင့်သော ဈေးကွက်တစ်ခုဖြစ်သည်။ ယခုအခါ ငွေချေးသက်သေခံ လက်မှတ်လုပ်ငန်းကြီးကြပ်ရေးကော်မရှင်၏ ဉီးဆောင်မှုဖြင့် စတော့ရှယ်ယာဈေးကွက်အပြင် ပြည်တွင်းငွေချေးစာချုပ်ဈေးကွက်များ ဖွံ့ဖြိုးရေး၊ ကုန်စည်ကြိုရောင်း ကြိုဝယ်ဈေးကွက်များ စနစ်တကျ ဖွံ့ဖြိုးရေးတို့ကိုလည်း လုပ်ဆောင်လျက်ရှိကြောင်း သတင်းရရှိသည်။

သတင်းစဉ်