ဝန်ထမ်းများ အငှားဝယ်ယူမှု စနစ်ဖြင့် ပစ္စည်းများ ဝယ်ယူနိုင်ရေး UNITED AMARA BANK မိတ်ဆက်ရှင်းလင်း

,

စီမံကိန်းနှင့် ဘဏ္ဍာရေးဝန်ကြီးဌာနအောက်ရှိ ဦးစီးဌာန/ အဖွဲ့အစည်းအစည်းများမှ နိုင်ငံ့ ဝန်ထမ်းများ အငှားဝယ်ယူမှုစနစ် (Hire Purchase System) ဖြင့် ကွန်ပျူတာနှင့် အီလက်ထရောနစ် ပစ္စည်းများ ဝယ်ယူနိုင်ရေး UNITED AMARA BANK ၏ မိတ်ဆက် ရှင်းလင်းခြင်း အခမ်းအနားကို ယနေ့ မွန်းလွဲ ၁ နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ် (၁) အစည်းအဝေး ခန်းမ၌ ကျင်းပသည်။

          ရှေးဦးစွာ စီမံကိန်းနှင့် ဘဏ္ဍာရေးဝန်ကြီးဌာန အမြဲတမ်းအတွင်းဝန် ဦးထွန်းထွန်းနိုင်က ပစ္စည်းတန်ဖိုးကို လက်ငင်းပေးချေဝယ်ယူရန် အခက်အခဲရှိသည့် နိုင်ငံဝန်ထမ်းများ ကွန်ပျူတာ နှင့် အီလက်ထရောနစ် ပစ္စည်းများ အငှားဝယ်ယူမှု စနစ်ဖြင့် ဝယ်ယူအသုံးပြုနိုင်ရန် စီမံကိန်းနှင့် ဘဏ္ဍာရေး ဝန်ကြီးဌာနနှင့် UNITED AMARA BANK တို့ ညှိနှိုင်းဆွေးနွေးမှုဖြင့် ယခုအစီအစဉ်ကို ဆောင်ရွက်ခြင်း ဖြစ်ကြောင်း၊ e-Government စနစ် အကောင် အထည်ဖော်ရာတွင် အထောက်အကူဖြစ်စေရန် ကွန်ပျူတာနှင့် အီလက်ထရောနစ် ပစ္စည်းများ ဝန်ထမ်းများ အသုံးပြုမှုကို အားပေးမြှင်တင်လို၍ ဆောင်ရွက်ခြင်း ဖြစ်ကြောင်းနှင့် ဦးစီးဌာန/ အဖွဲ့အစည်းများမှ တာဝန်ယူ ဆောင်ရွက်ပေးရမည် လုပ်ငန်းများကို ရှင်းလင်းပြောကြားသည်။

          ထိုနောက် UNITED AMARA BANK မှ တာဝန်ရှိသူက အငှားဝယ်ယူမှုစနစ်ဖြင့် ပစ္စည်းများ ဝယ်ယူနိုင်ရေး UNITED AMARA BANK မှ ဆောင်ရွက်ပေးမည့် အစီအစဉ်များကို ရှင်းလင်းပြောကြားကာ ဝန်ထမ်းများ၏ သိရှိလိုသည်များကို ပြန်လည် ဖြေကြားပေးခဲ့သည်။

          မိတ်ဆက် ရှင်းလင်းခြင်း အခမ်းအနားသို့ စီမံကိန်းနှင့် ဘဏ္ဍာရေး ဝန်ကြီးဌာန အမြဲတမ်းအတွင်းဝန်နှင့် ဌာနအကြီးအကဲများ၊ ဝန်ထမ်းများ၊ UNITED AMARA BANK နှင့် နေပြည်တော်ရှိ ကွန်ပျူတာနှင့် အီလက်ထရောနစ် ပစ္စည်းအရောင်းဆိုင်များမှ တာဝန် ရှိသူများ စုစုပေါင်း (၂၀၀) ဦးခန့် တက်ရောက်ကြသည်။

          UNITED AMARA BANK နှင့် သဘောတူညီမှုရှိပြီး ဖြစ်သော ဆိုင်များတွင် ဝန်ထမ်းများ ကြိုက်နှစ်သက်သည့် ပစ္စည်းကို တနှစ်လျှင် အတိုးနှုန်း ၉ % နှင့် ဝန်ဆောင်ခ ၁ % စုစုပေါင်း တနှစ် အတိုးနှုန်း ၁၀% ဖြင့် ၁၂ လ (သို့) ၁၈ လ (သို့) ၂၄ လ အရစ်ကျ ပြန်လည်ပေးဆပ်ကာ ဝယ်ယူနိုင်ကြောင်း သတင်းရရှိသည်။

နေပြည်တော်၊ ဖေဖော်ဝါရီ ၂၇