ပြည်ထောင်စုသမ္မတမြန်မာနိုင်ငံတော်အစိုးရသို့ ဂျပန်နိုင်ငံအစိုးရမှ ငွေကြေးစျေးကွက်အခြေခံ အဆောက်အအုံ တိုးတက်မြှင့်တင်ရေးစီမံချက် အကောင်အထည်ဖော်ရန်အတွက် ဂျပန်ယန်း(၅၅၄၉) သန်းအကူအညီပေးရေးဆိုင်ရာစာချွန်လွှာ လက်မှတ်ရေးထိုးလဲလှယ်ခြင်း အခမ်းအနားကို ၂၀၁၈ ခုနှစ်၊ ဇွန်လ ၁၄ ရက်နေ့ နံနက် ၈: ၃၀ နာရီတွင် စီမံကိန်း နှင့် ဘဏ္ဍာရေးဝန်ကြီးဌာန၊ ရုံးအမှတ်(၁) အစည်းအဝေးခန်းမ၌ ကျင်းပသည်။

          အခမ်းအနားသို့ စီမံကိန်း နှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်၊ ပြည်ထောင်စုရှေ့နေချုပ်ရုံး ဒုတိယရှေ့နေချုပ် ဦးဝင်းမြင့်၊ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဦးဘိုဘိုငယ်၊ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးမြင့်သူ၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ မြန်မာနိုင်ငံဆိုင်ရာ ဂျပန်သံအမတ်ကြီး Mr. Ichiro Maruyama နှင့် ဂျပန်သံရုံးမှ တာဝန်ရှိသူများ တက်ရောက်ကြသည်။

အခမ်းအနားတွင် ငွေကြေးစျေးကွက် အခြေခံအဆောက်အအုံ တိုးတက်မြှင့်တင်ရေးစီမံချက် အတွက်ဂျပန်ယန်း(၅၅၄၉)သန်း အကူအညီပေးရေးဆိုင်ရာစာချွန်လွှာကို ပြည်ထောင်စုသမ္မတမြန်မာ နိုင်ငံတော်အစိုးရ ကိုယ်စား စီမံကိန်း နှင့် ဘဏ္ဍာရေး၀န်ကြီးဌာန၊ ဒုတိယဝန်ကြီး ဦးဆက်အောင်နှင့် ဂျပန်နိုင်ငံအစိုးရ ကိုယ်စား မြန်မာနိုင်ငံဆိုင်ရာ ဂျပန်သံအမတ်ကြီး Mr. Ichiro Maruyama တို့က လက်မှတ်ရေးထိုး လဲလှယ်ခဲ့ကြသည်။

အဆိုပါစာချွန်လွှာကို လက်မှတ်ရေးထိုးလဲလှယ်ခြင်းဖြင့် မြန်မာ-ဂျပန် နှစ်နိုင်ငံအကြား ချစ် ကြည်ရင်းနှီးမှု ပိုမိုခိုင်မာစေပြီး မြန်မာနိုင်ငံ၏ ငွေပေးချေမှုစနစ်ကို နိုင်ငံတကာအဆင့်မီ မြှင့်တင်နိုင် မည်ဖြစ်သည်။ ထို့အပြင်ထိရောက်သော ငွေပေးချေမှုစနစ်ကိုဖြစ်ပေါ်စေနိုင်၍ အာဆီယံနိုင်ငံများ အတွင်း Payment System များ ချိတ်ဆက်နိုင်ရေး ဆောင်ရွက်ရာတွင် အသင့်အနေအထား ရောက်ရှိ နိုင်မည် ဖြစ်ပါသည်။