၂၀၂၀ ပြည့်နှစ် ကမ္ဘာ့စာရင်းအင်းနေ့ ( World Statistics Day – 2020 ) အခမ်းအနား ကျင်းပ

၂၀၂၀ ပြည့်နှစ်၊ ကမ္ဘာ့စာရင်းအင်းနေ့ ( World Statistics Day – 2020 ) အခမ်းအနား (Virtual Event) ကို ယနေ့နံနက် ၁၀ နာရီတွင် နေပြည်တော်ရှိ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ရုံးအမှတ်-၃၂ ၌ ကျင်းပရာ စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီဥက္ကဋ္ဌ ဒုတိယသမ္မတ ဦးဟင်နရီဗန်ထီးယူ Video Conferencing စနစ်ဖြင့် တက်ရောက်အမှာစကားပြောကြားသည်။ အခမ်းအနားသို့ စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီ အတွင်းရေးမှူး ညွန်ကြားရေးမှူးချုပ် ဦးဆန်းမြင့်၊ ဒုတိယညွှန်ကြားရေးမှူးချုပ်နှင့် တာဝန်ရှိသူများ တက်ရောက်ကြပြီး ပြည်ထောင်စုဝန်ကြီးများဖြစ်ကြသည့် ဒုတိယဗိုလ်ချုပ်ကြီးစိုးထွဋ်၊ ဦးစိုးဝင်း၊ ဦးကျော်တင်၊ ဒေါက်တာဖေမြင့်၊ ဒေါက်တာ အောင်သူ၊ ဦးသန့်စင်မောင်၊ ဦးအုန်းဝင်း၊ ဦးဝင်းခိုင်၊ ဦးသိန်းဆွေ၊ ဒေါက်တာသန်းမြင့်၊ ဒေါက်တာ မျိုးသိမ်းကြီး၊ ဦးဟန်ဇော်၊ ဒေါက်တာဝင်းမြတ်အေးနှင့် ဦးအုန်းမောင်၊ ဒုတိယဝန်ကြီးများဖြစ်ကြသည့် ဦးတင်မြင့်၊ ဦးမောင်မောင်ဝင်း၊ ဦးဆက်အောင်နှင့် ဒေါက်တာမင်းရဲပိုင်ဟိန်း၊ မြန်မာနိုင်ငံတော် ဗဟိုဘဏ် ဒုတိယဥက္ကဋ္ဌ ဦးစိုးသိန်း၊ တိုင်းဒေသကြီးနှင့်ပြည်နယ်ဝန်ကြီးများ၊ အမြဲတမ်းအတွင်းဝန်များ၊ ညွှန်ကြား ရေးမှူးချုပ်များ၊ ဦးဆောင်ညွှန်ကြားရေးမှူးများ၊ ဖွံ့ဖြိုးမှုမိတ်ဖက်အဖွဲ့အစည်းများ၊ လူမှုအဖွဲ့အစည်းများနှင့် ပုဂ္ဂလိကကဏ္ဍ လုပ်ငန်းအဖွဲ့များမှ တာဝန်ရှိသူများက Video Conferencing ဖြင့် တက်ရောက်ကြသည်။ အခမ်းအနားတွင် ဒုတိယသမ္မတ ဦးဟင်နရီဗန်ထီးယူက ကုလသမဂ္ဂစာရင်းအင်းကော်မရှင်က ကုလသမဂ္ဂ အထွေထွေညီလာခံ ဆုံးဖြတ်ချက်အမှတ် (၆၉/၂၈၂) အရ ၂၀၁၀ ပြည့်နှစ်မှစတင်၍ အောက်တိုဘာလ ၂ဝ ရက်ကို ကမ္ဘာ့စာရင်း အင်းနေ့ (World Statistics Day) အဖြစ်သတ်မှတ်ပြီး ကမ္ဘာ့နိုင်ငံအသီးသီးတွင် (၅) နှစ်တစ်ကြိမ် ကျင်းပလျက်ရှိပါကြောင်း၊ မြန်မာနိုင်ငံ၌လည်း ကမ္ဘာ့စာရင်းအင်းနေ့ကို၂၀၁၀ ပြည့်နှစ်တွင် ပထမအကြိမ်၊ ၂၀၁၅ ခုနှစ် တွင် ဒုတိယအကြိမ်ကျင်းပခဲ့ပါကြောင်း၊ ယခုနှစ်တွင် COVID-19 ကပ်ရောဂါကို ကမ္ဘာတစ်ဝန်းကြုံတွေ့နေရသည့်အတွက် အခမ်းအနားကို Onilne ဖြင့် ကျင်းပပြုလုပ်ရခြင်းဖြစ်ပါကြောင်း။
၂၀၂၀ ပြည့်နှစ် ကမ္ဘာ့စာရင်းအင်းနေ့ ဆောင်ပုဒ်ဖြစ်သည့် “Connecting the world with data we can trust” “ဆန်းသစ်ယုံကြည် စာရင်းအင်းအချက်အလက်အခြေတည် ချိတ်ဆက်ဝေမည် ဖွံ့ဖြိုးတိုးတက် နိုင်ငံဆီ” ဟူသောဆောင်ပုဒ်သည် အမျိုးသားစာရင်းအင်းစနစ် အားကောင်းလာပြီး ယုံကြည်စိတ်ချရသည့် စာရင်းအင်းအချက်အလက်များ ထုတ်ပြန်ပေးခြင်းဖြင့် ပြည်သူများ၏ ယုံကြည်မှုတိုးမြှင့်လာစေရန်၊ ယုံကြည်စိတ်ချရသည့် အချက်အလက်များနှင့် နိုင်ငံတကာအသိုင်းအဝိုင်းများအကြား ချိတ်ဆက်မှု အားကောင်းလာစေရန် ရည်ရွယ်ထားပါကြောင်း။ ကမ္ဘာကြီး၏ လက်ရှိပြောင်းလဲမှုကို သိရှိနိုင်ရန် ယုံကြည် ကိုးစားနိုင်သည့် အချက်အလက်များ လိုအပ်သကဲ့သို့ ကမ္ဘာတစ်ဝန်းတွေ့ကြုံနေရသည့် စိန်ခေါ်မှု တစ်ရပ်ဖြစ်သည့် Corona Virus ရောဂါကူးစက်မှု၊ ပျံ့နှံ့မှုကိုတုံ့ပြန်ရာတွင် စာရင်းအင်းအချက်အလက်များ သည် များစွာအရေးပါသည်ကို တွေ့ရပါကြောင်း။ ယနေ့အခမ်းအနား၏ နောက်ထပ်ရည်ရွယ်ချက်မှာ စာရင်းအင်းအရည်အသွေးပြည့်ဝရေးနှင့် စာရင်းအင်းစနစ် ပြည့်စုံတိကျမှန်ကန်စေရေးအတွက် လူမှု-စီးပွားဆိုင်ရာ အချက်အလက်များနှင့် ညွှန်းကိန်းများကို ပြည့်စုံအောင်တွက်ချက်နိုင်မည့် မြန်မာနိုင်ငံ အမျိုးသားစာရင်းအင်းစနစ်ပေါ်ပေါက်လာစေရန် Stakeholders များအားလုံးအနေဖြင့် လိုအပ်သည့် စာရင်း အင်းများ ပံ့ပိုးကူညီနိုင်ရန်နှင့်ထိရောက်သည့် ပူးပေါင်းဆောင်ရွက်မှုအားကောင်းစေရန်၊ ယုံကြည်စိတ်ချ ရသည့် အချက်အလက်များနှင့် အစိုးရနှင့် ပြည်သူများအကြား၊ နိုင်ငံတကာ အသိုင်းအဝိုင်းများအကြား ယုံကြည်မှုတိုးမြင့်စေရန် ဖြစ်ပါကြောင်း။ ၂၀၁၈ ခုနှစ် ဇန်နဝါရီ ၂၂ ရက်တွင် ပြည်ထောင်စုလွှတ်တော် ဥပဒေ အမှတ် (၁) ဖြင့် ပြဋ္ဌာန်းခဲ့သည့် မြန်မာနိုင်ငံ၏ စာရင်းအင်းဥပဒေသည် ၂၀၁၉ ခုနှစ် ဇန်နဝါရီ (၂၂) ရက်တွင် စတင်ဥပဒေသက်ရောက်နေပြီ ဖြစ်ပါကြောင်း၊ စာရင်းအင်းဥပဒေသည် စာရင်းအင်းနှင့်ဆိုင်သည့် ဥပဒေ အားလုံးတို့၏ Mother Law ဖြစ်ပါကြောင်း။ တိကျမှန်ကန်၊ အရည်အသွေးပြည့်ဝပြီး ယုံကြည်စိတ်ချရသည့် စာရင်းအင်းများကို အချိန်နှင့်တစ်ပြေးညီ ပြုစုပံ့ပိုးနိုင်သည့် မြန်မာနိုင်ငံအမျိုးသားစာရင်းအင်းစနစ် ပေါ်ပေါက်စေရေးနှင့် ဖွံ့ဖြိုးတိုးတက်စေရေးတို့အတွက် စာရင်းအင်းအချက်အလက် မှန်ကန်ရေးနှင့် အရည် အသွေးပြည့်ဝရေးဗဟိုကော်မတီကို စာရင်းအင်းဥပဒေအရ အဆင့်မြှင့်တင်ဖွဲ့စည်းဆောင်ရွက်နိုင်ခဲ့ပြီး စာရင်းအင်းကဏ္ဍ ဖွံ့ဖြိုးတိုးတက်စေရေးအတွက် ၂၀၁၆ ခုနှစ် မှ ၂၀၂၀ ပြည့်နှစ်အတွင်း စာရင်းအင်းအချက် အလက်မှန်ကန်ရေးနှင့် အရည်အသွေးပြည့်ဝရေးဗဟို ကော်မတီအစည်းအဝေးကို (၁၀) ကြိမ် ကျင်းပနိုင်ခဲ့ ပါကြောင်း။ စာရင်းအင်းဥပဒေအရ စာရင်းအင်း မူဝါဒအနှစ်ချုပ် (Statistical Policy Brief)၊ စာရင်း အင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ (National Strategy for Development of Statistics-NSDS)Implementation Action Plan (2018-19~2022-23) တို့ကို ရေးဆွဲခဲ့ပြီး သက်ဆိုင်ရာကဏ္ဍအလိုက် လုပ်ငန်းအဖွဲ့များဖွဲ့စည်းကာ အကောင်အထည်ဖော်ဆောင်ရွက်လျက်ရှိပါကြောင်း၊ ခေတ်စနစ်နှင့်အညီ၊ ဌာနများ၏ လိုအပ်ချက်များနှင့်အညီ အကောင်အထည်ဖော်နိုင်ရေးအတွက် NSDS Implementation Action Plan ကို Living Document အနေဖြင့် ထားရှိဆောင်ရွက်လျက်ရှိပါကြောင်း။ စာရင်းအင်းကဏ္ဍများ အလိုက် အောင်မြင်စွာ အကောင်အထည်ဖော်နိုင်ရန် ဌာနများအချင်းချင်းပူးပေါင်းဆောင်ရွက်မှု ပိုမို အားကောင်းလာစေရေးလုပ်ငန်းအဖွဲ့(Clusters) (၁၀) ဖွဲ့ ဖွဲ့စည်းဆောင်ရွက်ခဲ့သည့်အတွက် စီးပွားရေး ဖွံ့ဖြိုးမှုကို အထောက်အကူပြုစေမည့် စာရင်းအင်းအချက်အလက်များကို ဖြည့်ဆည်းပေးနိုင်ရန် တိရစ္ဆာန် သန်းခေါင်စာရင်း၊ မြန်မာနေထိုင်မှုအခြေအနေစစ်တမ်း၊ မြန်မာနိုင်ငံအသေးစား၊ အငယ်စားနှင့် အလတ်စား စီးပွားရေးလုပ်ငန်း စစ်တမ်းနှင့် လုပ်သားအင်အားစစ်တမ်းများကို ကောက်ယူခဲ့ပါကြောင်း၊ လူမှုရေး အထောက်အကူပြုစာရင်းအင်းများကို ဖြည့်ဆည်းပေးနိုင်သည့် ကြားဖြတ်လူဦးရေသန်းခေါင်စာရင်း၊ ပညာရေးကဏ္ဍ၏ အချက်အလက်များ ထည့်သွင်းဆောင်ရွက်နေသည့် Education Management Information System (EMIS) စနစ်၊ အီလက်ထရောနစ်ကျန်းမာရေး သတင်းစနစ်တို့ဖြင့် အချက်အလက် များစုဆောင်းပြီး Hospital Statistics Report ကို နှစ်စဉ်ထုတ်ပြန်ခြင်းများ ဆောင်ရွက်ခဲ့ပါကြောင်း၊ သဘာဝပတ်ဝန်းကျင် အထောက်အကူပြုစာရင်းအင်းများ ဖြည့်ဆည်းရေးအတွက် Environmental Statistical System ထူထောင်ရန်ဆောင်ရွက်လျက်ရှိပါကြောင်း၊ သဘာဝပတ်ဝန်းကျင်နှင့်စပ်လျဉ်း၍ ဖြစ်ပွားလေ့ရှိသည့် သဘာဝဘေးအန္တရာယ်အခြေအနေများကို သိရှိနိုင်ရေးအတွက် သဘာဝဘေးအန္တရာယ်ဆိုင်ရာစစ်တမ်းကိုလည်း နှစ်စဉ်ဆောင်ရွက်နိုင်ခဲ့ပါကြောင်း။ နိုင်ငံတိုင်းတွင် စာရင်းအင်းထုတ်လုပ်သူများ၊ စာရင်းအင်းအသုံးပြုသူများနှင့် စာရင်းအင်းနှင့် ဆက်နွယ်ပတ်သက်နေသူများအားလုံး လိုက်နာဆောင်ရွက် ကြရမည့် ကျင့်ဝတ်များထုတ်ပြန်ထားသကဲ့သို့ မြန်မာနိုင်ငံ၌လည်း ကျင့်ဝတ်နှင့်အညီ လိုက်နာဆောင်ရွက် နိုင်ရေးအတွက် စာရင်းအင်းဆိုင်ရာကျင့်ဝတ်(Code of Practice-COP) ထုတ်ပြန်နိုင်ရန် ဆောင်ရွက်နေပါကြောင်း။
စာရင်းအင်းအချက်အလက်များသည် တိုင်းပြည်တိုးတက်မှုကို တိုင်းတာရာတွင် များစွာအရေးပါသည့် အတွက် မိမိတို့နိုင်ငံအနေဖြင့် အခြားနိုင်ငံများနည်းတူ စာရင်းအင်းနယ်ပယ်တွင် အရည်အသွေးရှိသည့် စာရင်းအင်းများရရှိနိုင်ရေးအတွက် ခေတ်စနစ်နှင့်အညီ ဖွံ့ဖြိုးတိုးတက်လာရန် စွမ်းရည်တည်ဆောက်ရေးတွင် ရင်းနှီးမြှုပ်နှံရန် လိုအပ်သကဲ့သို့ စာရင်းအင်းဆိုင်ရာအသိပညာနှင့် အချက်အလက်များကို အသုံးပြုသည့်အလေ့အထ (Data Culture) ကို ဌာနဆိုင်ရာများ၌သာမက အများပြည်သူနှင့်ပုဂ္ဂလိကစီးပွားရေး အဖွဲ့အစည်းများအကြား၌ပါ ပျံ့နှံ့စေရေးအတွက် Platform တစ်ခု လိုအပ်သည့်အတွက် ကမ္ဘာ့စာရင်းအင်း နေ့ကို ကျင်းပဆောင်ရွက်ခြင်းဖြစ်ပါကြောင်း။ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (MSDP) ရည်မှန်းချက်များ အောင်မြင်အောင် အကောင်အထည်ဖော်ဆောင်ရွက်နိုင်ရေးအတွက် တရားဝင်စာရင်းအင်းများသည် များစွာအရေးပါသည့်အတွက် ကမ္ဘာ့စာရင်းအင်းနေ့တွင် တရားဝင်စာရင်း အင်းများကို အဓိကထားအာရုံစိုက်ရန် တိုက်တွန်းနေခြင်းဖြစ်ပါကြောင်း၊ စာရင်းအင်းကဏ္ဍတွင် ရင်းနှီးမြှုပ်နှံခြင်းသည် ၂၀၃၀ ပြည့်နှစ်တွင် စဉ်ဆက်မပြတ် ဖွံ့ဖြိုးတိုးတက်မှုပန်းတိုင်များ (Substainable Development Goals-SDGs) ၏ အောင်မြင်မှုကို စောင့်ကြည့်၊ အကဲဖြတ်နိုင်ရေးအတွက် တစ်ခုတည်းသော နည်းလမ်းဖြစ်ပါကြောင်း။ မြန်မာနိုင်ငံအနေဖြင့် မိမိတို့နိုင်ငံအခြေအနေနှင့်လျော်ညီသည့် ဖွံ့ဖြိုးမှု လိုအပ် ချက်များကို ထည့်သွင်းထားသည့် မြန်မာနိုင်ငံ၏ ရေရှည်တည်တံ့ခိုင်မြဲပြီးဟန်ချက်ညီသော ဖွံ့ဖြိုး တိုးတက်မှုစီမံကိန်း (၂၀၁၈-၂၀၃၀) {Myanmar Sustainable Development Plan- MSDP (2018-2030)} ကို ရေးဆွဲခဲ့ပြီး မဟာဗျူဟာများနှင့်အညီ လုပ်ငန်းစဉ်များကို အကောင်အထည်ဖော်ဆောင်ရွက်လျက်ရှိပါ ကြောင်း၊ MSDP ကို အကောင်အထည်ဖော်ဆောင်ရာတွင် တိုးတက်မှုများနှင့် ထိရောက်မှုများကို စောင့်ကြည့်အကဲဖြတ်နိုင်စေရေးအတွက် အမျိုးသားညွှန်ကိန်းမူဘောင်(National Indicator Framework-NIF) ကိုဖော်ထုတ်ပြီးဖြစ်ပါကြောင်း၊ အဆိုပါအမျိုးသားညွှန်ကိန်းမူဘောင်တွင် ညွှန်ကိန်းပေါင်း (၂၈၆) ခုပါရှိပါကြောင်း။ အမျိုးသားစာရင်းအင်းစနစ် ဖြစ်ပေါ်လာရေးဆောင်ရွက်ရာတွင် အကျိုးရှိထိရောက်သည့် ရင်းနှီးမြှုပ်နှံမှုဖြစ်စေရန် နိုင်ငံတော်ကချမှတ်ထားသည့် အမျိုးသားမူဝါဒနှင့် မဟာဗျူဟာအပေါ် အကျိုး သက်ရောက်မှုရှိစေပြီး စာရင်းအင်းအသုံးပြုသူများ၏ တောင်းဆိုချက်များကို ဖြည့်ဆည်းပေးရန် ရင်းမြစ် များကို ဆက်စပ်မှုရှိရှိ အသုံးပြုနိုင်ရေးသည် အရေးကြီးပါကြောင်း၊ အချက်အလက်များကို တရားဝင် စာရင်းအင်းအဖြစ်ကောက်ယူ၊ စုစည်း၊ တွက်ချက်၊ ထုတ်ပြန်သည့်အချိန်တွင်လည်း ခေတ်သစ်အမြင် နည်းလမ်းများဖြင့် ဆောင်ရွက်ကြရန် လိုအပ်ပါကြောင်း၊ အမျိုးသားစာရင်းအင်းစနစ် ဖွံ့ဖြိုးတိုးတက်လာစေ ရေးဆောင်ရွက်ရာတွင် ဗဟိုစာရင်းအင်းအဖွဲ့တစ်ခုတည်း ဆောင်ရွက်၍ မရသည့်အတွက် ဌာနဆိုင်ရာများ အနေဖြင့် ပူးပေါင်းပါဝင်ဆောင်ရွက်ပေးကြပါရန် လေးနက်စွာတိုက်တွန်းပြောကြားလိုပါကြောင်း။ စာရင်း အင်းအချက်အလက်များသည် စဉ်ဆက်မပြတ်ဖွံ့ဖြိုးမှုအတွက် မူဝါဒဆိုင်ရာ ဆုံးဖြတ်ချက်များချမှတ်နိုင်ရန် အဓိကရေသောက်မြစ်ဖြစ်သကဲ့သို့ တိုင်းပြည်အတွက် မှန်ကန်သည့် စီမံကိန်းနှင့်မူဝါဒရေးဆွဲရာတွင်လည်း အဓိကပါဝင်ပါကြောင်း၊ ထို့ပြင် စာရင်းအချက်အလက်များသည် ခေတ်သစ်ဘဝကို ထင်ဟပ်စေသကဲ့သို့ လူတိုင်းအတွက် ပျော်ရွှင်မှုနှင့် သာယာဝပြောမှုများကိုလည်း ဖြစ်ပေါ်စေနိုင်ပါကြောင်း။ စာရင်းအင်း၏ အရေးပါပုံကို လူသားတိုင်းပိုမိုသိရှိနိုင်ရေးနှင့် ကမ္ဘာကြီးတွင်ကြုံတွေ့နေရသည့် စိန်ခေါ်မှုများကို ရင်ဆိုင် ကျော်လွှားနိုင်ရေးအတွက် ၂၀၂၀ ပြည့်နှစ် ကမ္ဘာ့စာရင်းအင်းနေ့ဆောင်ပုဒ်နှင့်အညီ ယုံကြည်စိတ်ချရသည့် စာရင်းအင်းအချက်အလက်များနှင့် နိုင်ငံတကာအသိုင်းအဝိုင်းများအကြား ချိတ်ဆက်မှုအားကောင်း လာစေရန် ဗဟိုကော်မတီအဖွဲ့ဝင်များ၊ ဖွံ့ဖြိုးမှုမိတ်ဖက်အဖွဲ့အစည်းများ၊ လုပ်ငန်းအဖွဲ့များနှင့် Stakeholders များအားလုံး ပူးပေါင်းပါဝင်ဆောင်ရွက်ကြရန် တိုက်တွန်းလိုပါကြောင်း ပြောကြားသည်။ ထို့နောက် UN Resident and Humanitarian Coordinator , Mr. Ola Almgren က ကုလသမဂ္ဂ အထွေထွေအတွင်းရေးမှူးချုပ်၏ သဝဏ်လွှာကိုဖတ်ကြားသည်။ ယင်းနောက် United Nations Statistics Division (UNSD) Director , Mr. Stefan Schweinfest ၏ Video Message ကို ပြသသည်။
ထို့နောက် ကမ္ဘာ့စာရင်းအင်းနေ့အထိမ်းအမှတ် မြန်မာနိုင်ငံ၏ စာရင်းအင်းကဏ္ဍဖွံ့ဖြိုးတိုးတက်မှု ဗီဒီယို မှတ်တမ်းကိုပြသသည်။ ယင်းနောက် အခမ်းအနားအစီအစဉ် ဒုတိယပိုင်းကို ဆက်လက်ကျင်းပရာ ဗဟိုကော်မတီအတွင်းရေးမှူး ညွန်ကြားရေးမှူးချုပ် ဦးဆန်းမြင့်က မြန်မာနိုင်ငံ၏ စာရင်းအင်းစနစ်နှင့် စပ်လျဉ်း၍ ရှင်းလင်းတင်ပြသည်။ ထို့နောက် စီးပွားရေးပညာရှင် ပါမောက္ခဒေါက်တာ အောင်ထွန်းသက် ဦးဆောင်၍ ပြည်သူ့လွှတ်တော် ကိုယ်စားလှယ် ဒေါ်ဇင်မာအောင်၊ မုံရွာစီးပွားရေးတက္ကသိုလ် ပါမောက္ခ ချုပ် ဒေါက်တာစိုးဝင်း၊ ဗဟိုစာရင်းအင်းအဖွဲ့ ဒုတိယညွှန်ကြားရေးမှူးချုပ် ဦးသန်းဇော်၊ မြန်မာနိုင်ငံကုန်သည်များနှင့် စက်မှုလုပ်ငန်းရှင်များအသင်းချုပ် တွဲဖက်အထွေ ထွေအတွင်းရေးမှူး ဒေါ်ခိုင်ခိုင်နွယ်၊ The Voice Weekly Journal , Deputy Chief Editor ဦးဇေယျသူ၊ United Nations Population Fund – UNFPA မှ လူဦးရေနှင့်ဖွံ့ဖြိုးတိုးတက်မှုစီမံကိန်း အရာရှိဒေါ်ယုမြတ်မွန်တို့က “ယုံကြည်စိတ်ချရသည့် အချက်အလက် နှင့် နိုင်ငံတကာအသိုင်းအဝိုင်းများအကြား ချိတ်ဆက်ခြင်း’’ ခေါင်းစဉ်ကိုဆွေးနွေးကြသည်။ ယင်းနောက် စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီအတွင်းရေးမှူး ညွန်ကြားရေးမှူးချုပ် ဦးဆန်းမြင့်က နိဂုံးချုပ်စကားပြောကြားပြီး အခမ်းအနားကို ရုပ်သိမ်းလိုက်သည်။

နေပြည်တော် အောက်တိုဘာ ၂၀

, , ,