ရန်ကုန် ၊ ဇူလိုင် ၃ 

    ရန်ကုန်စတော့အိပ်ချိန်းတွင် စာရင်းဝင်ကုမ္ပဏီ (၇) ခုရှိရာမှ ယခုအခါ အဋ္ဌမမြောက် စာရင်း ဝင်ကုမ္ပဏီအဖြစ် မြန်မာအက်ဂရိုအိတ်(စ်)ချိန်း အများနှင့်သက်ဆိုင်သော ကုမ္ပဏီလီမိတက် (Myanmar Agro Exchange Public Co., Ltd.) ကို ခွင့်ပြုလိုက်ပြီ ဖြစ်သည်။

    အဆိုပါကုမ္ပဏီအား ရန်ကုန်စတော့အိပ်ချိန်းတွင် စာရင်းဝင်ကုမ္ပဏီအဖြစ်လက်ခံသည့် အခမ်း အနားကို ယနေ့၊ နံနက် ၉ နာရီတွင် ရန်ကုန်မြို့၊ အမှတ် ၂၄-၂၆ ၊ ဆူးလေဘုရားလမ်းရှိ ရန်ကုန် စတော့အိပ်ချိန်းခန်းမ၌ ကျင်းပရာ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး၊ ငွေချေး သက်သေခံလက်မှတ်လုပ်ငန်းကြီးကြပ်ရေးကော်မရှင်ဥက္ကဋ္ဌ ဦးမောင်မောင်ဝင်း တက်ရောက် အမှာ စကားပြောကြားသည်။

     ဒုတိယဝန်ကြီးက အမှာစကားပြောကြားရာတွင် မြန်မာနိုင်ငံ၌ အရင်းအနှီးဈေးကွက် စတင် တည်ထောင်ချိန်မှ (၈) နှစ်တာကာလအတွင်း  ရန်ကုန်စတော့အိပ်ချိန်းတွင် ယနေ့စာရင်းဝင်သည့် မြန်မာအက်ဂရိုအိတ်(စ်)ချိန်း အများနှင့်သက်ဆိုင်သောကုမ္ပဏီလီမိတက် (MAEX) အပါအဝင် စာရင်း ဝင်ကုမ္ပဏီ (၈) ခု၏ ရှယ်ယာများကို ငွေချေးသက်သေခံလက်မှတ်ကုမ္ပဏီများကတစ်ဆင့် အရောင်း အဝယ်များပြုလုပ်လျက်ရှိပါကြောင်း၊ နိုင်ငံတော်၏ စီးပွားရေးဖွံ့ဖြိုးတိုးတက်မှုနှုန်းမြင့်မားလာစေရန် ပုဂ္ဂလိကကဏ္ဍဖွံ့ဖြိုးတိုးတက်ရေးသည် အလွန်အရေးပါကြောင်း၊ ပုဂ္ဂလိကကဏ္ဍစီးပွားရေးလုပ်ငန်း ကြီးများက လုပ်ငန်းဆောင်ရွက်ကြရာမှာ ကာလရှည်ငွေကြေးအရင်းအနှီးသည် မရှိမဖြစ်လိုအပ်သဖြင့် လိုအပ်လျက်ရှိသည့် ကာလရှည်ငွေကြေးအရင်းအနှီးများကို အရင်းအနှီးစျေးကွက်မှတစ်ဆင့် အစု ရှယ်ယာများ ထုတ်ဝေရောင်းချခြင်း၊ ငွေချေးစာချုပ်များ ထုတ်ဝေရောင်းချခြင်းတို့ဖြင့် ရရှိနိုင်မည် ဖြစ်ကြောင်း။

    တစ်ဖက်တွင်လည်း အစုရှယ်ယာများဝယ်ယူရင်းနှီးမြှုပ်နှံကြသော အများပြည်သူများအနေ ဖြင့် ကုမ္ပဏီကခွဲဝေပေးသည့်အမြတ်ဝေစုများ ရရှိနိုင်ခြင်း၊ ကုမ္ပဏီစီမံခန့်ခွဲမှုအဖွဲ့တွင် ပါဝင်ဆောင် ရွက်နိုင်ခြင်း၊ အရင်းအနှီးစျေးကွက်တွင် ရောင်းဝယ်ခြင်းမှတစ်ဆင့် ငွေဖြစ်လွယ်မှုဖြစ်ပေါ်စေခြင်းနှင့် ရှယ်ယာများပြန်လည်ရောင်းချခြင်းမှ အမြတ်အစွန်းများရရှိခြင်းစသည့် အကျိုးကျေးဇူးများကို ရရှိ နိုင်မည်ဖြစ်ပါကြောင်း၊ မိမိတို့နိုင်ငံတွင် အများနှင့်သက်ဆိုင်သော ကုမ္ပဏီ (၂၇၀) ကျော်ရှိပြီး  ရှယ်ယာရှင် (၁၀၀) နှင့်အထက်ရှိသည့် အများနှင့်သက်ဆိုင်သည့် ကုမ္ပဏီ (၄၆) ခု ရှိကြောင်း သိရှိ ရပြီး၊ ယင်းကုမ္ပဏီများအား ရန်ကုန်စတော့အိပ်ချိန်းတွင် စာရင်းဝင်ကုမ္ပဏီများ ဖြစ်လာစေရန် ဆက်လက်ကြိုးပမ်းဆောင်ရွက်ပေးကြရန် တိုက်တွန်းလိုပါကြောင်း။

    နိုင်ငံတော်အစိုးရအနေဖြင့် ကိုဗစ်-၁၉ ကပ်ရောဂါကြောင့် ကျဆင်းခဲ့ရသော စီးပွားရေးအခြေ အနေကို ပြန်လည်မြှင့်တင်ရန် သင့်လျော်သော ဘဏ္ဍာရေးမူဝါဒ၊ ငွေကြေးမူဝါဒများ ချမှတ်ဆောင် ရွက်လျက်ရှိပါကြောင်း၊ ပြည်တွင်းကုန်ထုတ်လုပ်မှုများကို အားပေးမြှင့်တင်လျက်ရှိပြီး စိုက်ပျိုးရေး၊ မွေးမြူရေးကဏ္ဍများဘက်စုံဖွံ့ဖြိုးတိုးတက်ရေးအတွက် နိုင်ငံ့စီးပွားမြှင့်တင်ရေးရန်ပုံငွေ ထူထောင်၍ အထူးကြိုးပမ်းဆောင်ရွက်ပေးလျက်ရှိပါကြောင်း၊ အသေးစား၊ အငယ်စား၊ အလတ်စား စီးပွားရေး လုပ်ငန်းများ ဖွံ့ဖြိုးတိုးတက်ရေးအတွက်လည်း အသေးစား၊ အငယ်စား၊ အလတ်စား စီးပွားရေး လုပ်ငန်းဖွံ့ဖြိုးတိုးတက်ရေးရန်ပုံငွေထူထောင်၍ အစီအမံများ ချမှတ်ဆောင်ရွက်ပေးလျက်ရှိပါကြောင်း ပြောကြားသည်။

    ဆက်လက်၍ ရန်ကုန်စတော့အိပ်ချိန်း၊ မန်းနေးဂျင်းဒါရိုက်တာ ဦးဝင်းနိုင်ဦးက ကြိုဆို နှုတ်ခွန်းဆက်စကားပြောကြားပြီး၊ မြန်မာအက်ဂရိုအိတ်(စ်)ချိန်း အများနှင့်သက်ဆိုင်သောကုမ္ပဏီ လီမိတက်၊ ဥက္ကဋ္ဌ ဦးဝင်းအောင်က ကုမ္ပဏီ၏လုပ်ငန်းများနှင့် စီမံခန့်ခွဲမှုဆိုင်ရာကိစ္စရပ်များနှင့် စပ်လျဉ်း၍ ရှင်းလင်းတင်ပြသည်။ 

    ထို့နောက် ရန်ကုန်စတော့အိပ်ချိန်းက မြန်မာအက်ဂရိုအိတ်(စ်)ချိန်း အများနှင့်သက်ဆိုင်သော ကုမ္ပဏီလီမိတက်၊ ဥက္ကဋ္ဌ ဦးဝင်းအောင်သို့ စာရင်းဝင်အသိအမှတ်ပြုလက်မှတ်ကို ပေးအပ်သည်။ 

ဆက်လက်၍ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး၊ ငွေချေးသက်သေခံလက်မှတ် လုပ်ငန်းကြီးကြပ်ရေးကော်မရှင်ဥက္ကဋ္ဌ ဦးမောင်မောင်ဝင်း၊ ရန်ကုန်တိုင်းဒေသကြီးအစိုးရအဖွဲ့၊ စီးပွား ရေးရာဝန်ကြီး ဦးမျိုးမြင့်အောင်၊ ရန်ကုန်စတော့အိပ်ချိန်း အုပ်ချုပ်မှုဒါရိုက်တာ ဦးဝင်းနိုင်ဦးနှင့် မြန်မာ အက်ဂရိုအိတ်(စ်)ချိန်း အများနှင့်သက်ဆိုင်သောကုမ္ပဏီလီမိတက်၊ ဥက္ကဋ္ဌ ဦးဝင်းအောင်တို့က ရန်ကုန်စတော့အိပ်ချိန်းတွင် စာရင်းဝင်ခြင်းအထိမ်းအမှတ် အောင်ဇေယျတု ခေါင်းလောင်း တီးခတ် ကြပါသည်။  

အဆိုပါအခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးနှင့် ငွေချေး သက်သေခံလက်မှတ်လုပ်ငန်းကြီးကြပ်ရေးကော်မရှင်၊ ဥက္ကဋ္ဌ ဦးမောင်မောင်ဝင်း၊ ရန်ကုန်တိုင်းဒေသ ကြီးအစိုးရအဖွဲ့၊ စီးပွားရေးရာဝန်ကြီး ဦးမျိုးမြင့်အောင်၊ ငွေချေးသက်သေခံလက်မှတ်လုပ်ငန်းကြီး ကြပ်ရေးကော်မရှင်အဖွဲ့ဝင်များ၊ ဌာနဆိုင်ရာအကြီးအကဲများ၊ ရန်ကုန်စတော့အိပ်ချိန်း၊ အုပ်ချုပ်မှု ဒါရိုက်တာနှင့် ဒါရိုက်တာအဖွဲ့ဝင်များ၊ ငွေချေးသက်သေခံလက်မှတ်ကုမ္ပဏီများနှင့် စာရင်းဝင် ကုမ္ပဏီများမှတာဝန်ရှိသူများ၊ မြန်မာအက်ဂရိုအိတ်(စ်)ချိန်း အများနှင့်သက်ဆိုင်သောကုမ္ပဏီလီမိ တက်၊ ဥက္ကဋ္ဌ ဦးဝင်းအောင်နှင့် ဒါရိုက်တာအဖွဲ့ဝင်များ၊ ရင်းနှီးမြှုပ်နှံသူများ တက်ရောက်ကြသည်။

    ရန်ကုန်စတော့အိပ်ချိန်းတွင် စာရင်းဝင်ကုမ္ပဏီများ၏ရှယ်ယာများအား နေ့စဉ်ရောင်းဝယ် လျက်ရှိရာ  ၂၀၂၂-၂၀၂၃  ဘဏ္ဍာရေးနှစ်အထိ ရင်းနှီးမြှုပ်နှံသူဦးရေ (၄၅,၃၀၃) ဦး ရှိပြီး၊  ၂၀၂၂-၂၀၂၃ ဘဏ္ဍာနှစ်အတွင်း စာရင်းဝင်ကုမ္ပဏီ (၇) ခု၏ ရှယ်ယာစုစုပေါင်း (၁.၇၇) သန်း၊ တန်ဖိုး ကျပ် (၇.၅) ဘီလီယံ အရောင်းအဝယ်ဖြစ်ခဲ့ပြီး ဈေးကွက်ရင်းနှီးမြှုပ်နှံမှုတန်ဖိုး ကျပ် (၆၄၃.၄၇) ဘီလီယံ ရှိကြောင်း သိရှိရသည်။
သတင်းစဉ်