Intermediate Level QGIS သင်တန်းဆင်းလက်မှတ်ပေးအပ်ပွဲ အခမ်းအနားကျင်းပခြင်း

,

စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် Myanmar Information Management Unit (MIMU)၊ One Map Myanmar တို့ ပူးပေါင်း၍(၁၇-၅-၂၀၁၈)ရက်နေ့မှ (၂၃-၅-၂၀၁၈)ရက်နေ့အထိ ဖွင့်လှစ်သင်ကြားခဲ့သည့် “Intermediate Level QGIS” သင်တန်း ဆင်းလက်မှတ်ပေးအပ်ပွဲအခမ်းအနားကို ၂၀၁၈ခုနှစ် မေလ(၂၃)ရက်နေ့ ညနေ(၃:၀၀)နာရီ အချိန်တွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂)ရှိ အစည်းအဝေး ခန်းမ၌ ကျင်းပခဲ့ရာ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားခဲ့ပါသည်။ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားရာတွင် Geospatial နည်းပညာရပ်သည် သတင်းအချက်အလက်များ ထုတ်ပြန်ခြင်း၊ စာရင်းအင်းအရည်အသွေးပြည့်ဝရေးနှင့်တိကျမှန်ကန်ရေးတို့အတွက် အရေးပါသည့်နည်းပညာရပ် ဖြစ်ပါကြောင်း၊ Geospatial နည်းပညာရပ်ကို အသုံးချ၍ Data နှင့် Mapping အတူတကွယှဉ်တွဲ ဖော်ပြခြင်းသည် နိုင်ငံတော်အတွက် မူဝါဒများချမှတ်ရာတွင် ပိုမိုပြီးပြည့်စုံစွာ အထောက်အကူ ပြုနိုင်မည်ဖြစ်ပါကြောင်း၊ ဗဟိုစာရင်းအင်းအဖွဲ့အနေဖြင့် စာရင်းအင်းဆိုင်ရာ ဖွံ့ဖြိုးတိုးတက်ရေး အမျိုးသားအဆင့်မဟာဗျူဟာ (National Strategy for Development of Statistics-NSDS) ရေးဆွဲအကောင်အထည်ဖော်ဆောင်ရွက်ရာတွင် အရေးကြီးသည့်နယ်ပယ်(၁၂)ရပ် သတ်မှတ် ထားရာ GIS နည်းပညာသည် တစ်ခုအပါအဝင် ဖြစ်ပါကြောင်း၊ GIS နည်းပညာကို ဌာနများ၏ Data များ၊ Project များ နှင့် Implementation and Evaluation လုပ်ငန်းများတွင် ထည့်သွင်း အသုံးပြုပါကထင်သာမြင်သာရှိ၍လေ့လာသူများအဖို့ ပိုမိုအထောက်အကူပြုနိုင်မည်ဖြစ်ပါကြောင်း၊ GIS နည်းပညာကို ဗဟိုစာရင်းအင်းအဖွဲ့ တစ်ခုထဲသာရယူခြင်းမဟုတ်ဘဲ လုပ်ဖော်ကိုင်ဖက်ဌာန များကိုပါ ခေါ်ယူ၍ သင်တန်းပို့ချခြင်း ဖြစ်ပါကြောင်း၊ သို့မှသာ အရေးကြီးသည့် Administrative Record များနှင့် Database တစ်ခု တည်ဆောက်နိုင်မည်ဖြစ်ပါကြောင်း ပြောကြားခဲ့ပါသည်။ ဆက်လက်၍ One Map Myanmar မှ GIS Manager ဦးကျော်နိုင်ဝင်းမှ သင်တန်း ပို့ချရခြင်း နှင့်ပတ်သက်၍ အမှာစကားပြောကြားပါသည်။ ထို့နောက် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်၊ ဒုတိယ ညွှန်ကြားရေးမှူးချုပ် ဦးသန်းဇော်နှင့် One Map Myanmar မှ GIS Manager ဦးကျော်နိုင်ဝင်း တို့သည် သင်တန်းသား/သူများအား သင်တန်းဆင်းလက်မှတ် ပေးအပ်ခဲ့ပြီး သင်တန်းသား/သူ များကိုယ်စား သင်တန်းသားတစ်ဦးမှ ကျေးဇူတင်စကားပြန်လည်ပြောကြားပြီး အခမ်းအနားကို ရုပ်သိမ်းခဲ့ပါသည်။