ACCA Firm နှင့် တွေ့ဆုံဆွေးနွေးခြင်း

, , ,

မြန်မာနိုင်ငံ ပြည်သူ့ဘဏ္ဍာရေးစီမံခန့်ခွဲမှုခေတ်မီဖွံ့ဖြိုးတိုးတက်ရေး  စီမံကိန်းအောက်တွင် ပြည်သူ့ ဘဏ္ဍာရေး စီမံခန့်ခွဲမှု သင်တန်းကျောင်းတည်ထောင်နိုင်ရန် သင်ရိုးညွှန်းတမ်းရေးဆွဲခြင်းနှင့် သင်တန်း အစီအစဉ်များ ပြင်ဆင်ခြင်းတို့အတွက် ACCA Firm အားငှားရမ်းဆောင်ရွက်လျက်ရှိပါသည်။အဆိုပါ ACCA Firm သည်Training Materials များနှင့် စပ်လျဉ်း၍ ရှင်းလင်း တင်ပြရန်နှင့် ဌာန၊ အဖွဲ့အစည်း များထံမှ သဘောထားမှတ်ချက်များ တောင်းခံရန်၊Training Providers များအတွက် လုပ်ငန်းတာဝန် သတ်မှတ်ချက်များ (ToRs) ပြင်ဆင်ရန်အတွက် ဒုတိယခရီးစဉ်အနေဖြင့် မြန်မာနိုင်ငံသို့ ၂၀၁၈ခုနှစ်၊ ဒီဇင်ဘာလ ၃ရက်နေ့မှ ၄ရက်နေ့ အထိလာရောက်ခဲ့ပါသည်။ ၃-၁၂-၂၀၁၈ရက်နေ့တွင် ACCA Firm သည် ရသုံးမှန်းခြေငွေစာရင်းဦးစီးဌာန၊ ငွေတိုက်ဦးစီးဌာန၊ စီမံကိန်းရေးဆွဲရေးဦးစီးဌာန၊ စီမံကိန်းစိစစ်ရေး နှင့်တိုးတက်မှုအစီရင်ခံရေးဦးစီးဌာနနှင့် ပြည်ထောင်စုစာရင်းစစ်ချုပ်ရုံးသို့ လည်းကောင်း၊ ၄-၁၂-၂၀၁၈ ရက်နေ့ တွင် မြန်မာ့စီးပွားရေးဘဏ်၊ ပြည်ထောင်စုလွှတ်တော်ရုံး၊ ပြည်သူ့ငွေစာရင်းပူးပေါင်းကော်မတီ၊ ပြည်တွင်းအခွန်များဦးစီးဌာနများသို့ လည်းကောင်းသွားရောက်ပြီး Training Materials များနှင့် စပ်လျဉ်း၍ ဆွေးနွေးခဲ့ကြပါသည်။၄-၁၂-၂၀၁၈ရက်နေ့၊ မွန်းလွဲ (၂:၀၀) နာရီအချိန်တွင် ACCA Firm နှင့် ပြည်သူ့ဘဏ္ဍာရေး စီမံခန့်ခွဲမှု အကယ်ဒမီ သင်တန်းကျောင်းဆိုင်ရာ အကောင်အထည်ဖော်ရေး ကော်မတီအဖွဲ့ဝင်များ၊ စွမ်းဆောင်ရည် ဖွံ့ဖြိုးတိုးတက်ရေးကော်မတီအဖွဲ့ဝင်များနှင့် လည်းကောင်း၊ ၄-၁၂-၂၀၁၈ ရက်နေ့၊ ညနေ (၄:၀၀) နာရီ အချိန်တွင် ပြည်သူ့ဘဏ္ဍာရေး စီမံခန့်ခွဲမှု သင်တန်းကျောင်း တည်ထောင်ရေးဆိုင်ရာ ဦးဆောင်စိစစ်ရေး ဘုတ်အဖွဲ့နှင့် လည်းကောင်း တွေ့ဆုံပြီး Training Materials များနှင့် စပ်လျဉ်း၍ ဆွေးနွေးခဲ့ကြပါသည်။