ပြည်ထောင်စုဝန်ကြီး ဦးစိုးဝင်း ရန်ကုန်စတော့အိပ်ချိန်းနှင့် ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်သို့ သွားရောက်ကြည့်ရှုခြင်း

စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးစိုးဝင်း ရန်ကုန်စတော့အိပ်ချိန်းနှင့် ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်သို့ သွားရောက်ကြည့်ရှုခြင်း   (ရန်ကုန်၊ ၈-၁၀-၂၀၁၈)

          စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးစိုးဝင်းသည် ၂၀၁၈ ခုနှစ်၊ အောက်တိုဘာလ (၈) ရက်နေ့ နံနက် ၁၀ နာရီ အချိန်တွင် စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး၊ မြန်မာနိုင်ငံ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် ဥက္ကဋ္ဌ ဦးမောင်မောင်ဝင်း လိုက်ပါလျက် ရန်ကုန်စတော့အိပ်ချိန်းသို့ သွားရောက်၍ ရန်ကုန်စတော့အိပ်ချိန်း ၏ စတော့ရှယ်ယာအရောင်းအဝယ် ဆောင်ရွက်မှုအခြေအနေများအား ကြည့်ရှုစစ်ဆေးခဲ့ပါသည်။

          ယင်းနောက် ပြည်ထောင်စုဝန်ကြီးသည် ရန်ကုန်စတော့အိပ်ချိန်း၏ ဒါရိုက်တာအဖွဲ့နှင့် လည်းကောင်း၊ မြန်မာနိုင်ငံ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် အဖွဲ့ဝင် များနှင့်လည်းကောင်း၊ မြန်မာနိုင်ငံ၏ အရင်းအနှီးစျေးကွက်ဖွံ့ဖြိုးတိုးတက်ရေးဆိုင်ရာ အကြောင်း အရာများ နှင့် စပ်လျဉ်း၍ သီးခြားစီ တွေ့ဆုံဆွေးနွေးခဲ့ပါသည်။ အစည်းအဝေးတွင် ပြည်ထောင်စု ဝန်ကြီးသည် ဥပဒေပိုင်းဆိုင်ရာ ပြင်ဆင်ရန် လိုအပ်ချက်များ၊ လက်ရှိစျေးကွက် အခြေအနေအား စဉ်ဆက်မပြတ် လေ့လာသုံးသပ်ရန်နှင့် အများ ပြည်သူသို့ ပညာပေးအစီအစဉ်များ စဉ်ဆက်မပြတ် ကျင်းပပြုလုပ်ရန် လမ်းညွှန်မှာကြားခဲ့ပါသည်။