ပြည်ထောင်စုဝန်ကြီး ဦးကျော်ဝင်း ဂန့်ဂေါမြို့နယ်အတွင်းရှိ ဦးစီးဌာနများအား သွားရောက်စစ်ဆေး

, ,

စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းသည် ယမန်နေ့ နံနက် ၁၀ နာရီခွဲအချိန်တွင် မကွေးတိုင်းဒေသကြီး၊ ဂန့်ဂေါမြို့သို့ ရောက်ရှိ၍ စီမံကိန်းနှင့် ဘဏ္ဍာရေးဝန်ကြီးဌာနရှိ မြန်မာ့စီးပွားရေးဘဏ်၊ ပြည်တွင်းအခွန်များ ဦးစီးဌာနမြို့နယ်အခွန်ဦးစီးဌာနမှူးရုံး၊ မြန်မာ့လယ်ယာဖွံ့ဖြိုးရေးဘဏ် (မြို့နယ် ဘဏ်ခွဲ)၊ ခရိုင်စီမံကိန်းဦးစီးရုံး၊ မြို့နယ်စီမံကိန်းဦးစီးရုံးများသို့ သွားရောက်ကြည့်ရှု စစ်ဆေးခဲ့သည်။

          ထိုသို့ သွားရောက်စစ်ဆေးရာတွင် ပြည်ထောင်စုဝန်ကြီးက ဖွဲ့စည်းပုံအဆင့် နှင့်အညီ ဝန်ထမ်းအင်အားပြည့် တာဝန်ထမ်းဆောင်နိုင်ရေး၊ ရုံး၏ အင်္ဂါရပ်နှင့် လျော်ညီစွာ ထိန်းသိမ်းပြုပြင်ထားရှိရေးနှင့် လုပ်ငန်းခွင် လိုအပ်ချက်များ ဖြည့်ဆည်း ထားရန်၊ ဆက်သွယ်သွားလာရေး ဝေးလံသောနေရာ ဒေသများအတွက် ဝန်ထမ်းများ တာဝန်ထမ်းဆောင်မှု အဆင်ပြေစေရန် ဝန်ထမ်းအိမ်ယာများ တည်ဆောက်နိုင်ရေး၊ ဌာနအလိုက် လုပ်ငန်းတာဝန်များကို လုပ်ငန်းကာလနှင့်အညီ ပြီးမြောက်ကျေပွန်စွာ ဆောင်ရွက်ကြစေရေး၊ ဌာနအလိုက် ရုံးသုံးပရိဘောဂများကို ပြည့်စုံကောင်းမွန်စွာ ဖြည့်ဆည်းအသုံးပြုနိုင်ရေးတို့ကို လမ်းညွှန်မှာကြားခဲ့ကြောင်း သတင်းရရှိသည်။

နေပြည်တော်၊ မတ်လ ၁၃

(သတင်းစဉ်)