![](http://www.mopf.gov.mm/sites/default/files/sites/default/files/Final Photo.jpg)
နေပြည်တော်၊ ဖေဖော်ဝါရီ ၂၃
ငွေတိုက်ဦးစီးဌာန၊ အရာထမ်းများမွမ်းမံသင်တန်း အမှတ်စဉ် (၁/၂၀၂၃−၂၀၂၄) သင်တန်း ဖွင့်ပွဲအခမ်းအနားကို ၂၀၂၄ ခုနှစ်၊ ဖေဖော်ဝါရီလ ၂၃ ရက်နေ့၊ နေ့လယ် (၁:၃၀) အချိန်တွင် ရုံးအမှတ် (၃၄)၊ စုပေါင်းခန်းမကြီး၌ ကျင်းပပြုလုပ်ခဲ့ပါသည်။
အခမ်းအနားတွင် ငွေတိုက်ဦးစီးဌာန၊ ညွှန်ကြားရေးမှူးချုပ်က နိုင်ငံတော်၏ ဘဏ္ဍာရေးအခြေအနေ တောင့်တင်းခိုင်မာပြီး ပြည်သူ့ဘဏ္ဍာရေးစီမံခန့်ခွဲမှုစနစ်ကို ပီပြင်စွာ ကျင့်သုံးဆောင်ရွက်နိုင်စေရန် ရည်ရွယ်၍ ငွေတိုက်ဦးစီးဌာနအား စတင်ဖွင့်လှစ်ခဲ့ပြီး ပြည်သူ့ဘဏ္ဍာရေးစီမံခန့်ခွဲမှု စနစ်ဖွံ့ဖြိုးတိုးတက်စေရန် ဆောင်ရွက်ရာတွင် ပူးပေါင်းပါဝင်အားဖြည့်ဆောင်ရွက်ရန်၊ ငွေကြေးစီမံခန့်ခွဲမှုနှင့် ကြွေးမြီစီမံခန့်ခွဲမှုများကို စဉ်ဆက်မပြတ် ဖွံ့ဖြိုးတိုးတက်စေရန်၊ ပြည်ထောင်စုဘဏ္ဍာရန်ပုံငွေစာရင်းပေါင်းချုပ်ခြင်းနှင့် အကောင်အထည်ဖော်မှုကို စောင့်ကြည့်အစီရင်ခံတင်ပြသည့်စနစ်ကို စဉ်ဆက်မပြတ် တိုးတက်စေရန်ဟူသည့် မူဝါဒ (၃) ရပ်ကို ချမှတ်၍ လုပ်ငန်းများအကောင်အထည်ဖော်ဆောင်ရွက်လျက်ရှိကြောင်း၊ ဌာနတစ်ခုအနေဖြင့် ကောင်းမွန်သည့် ဆောင်ရွက်ချက်များဖြစ်ပေါ် စေရန်အတွက် လူ့စွမ်းအားအရင်းအမြစ်သည် အဓိကကျသည့် အခန်းကဏ္ဍအဖြစ်ပါဝင်နေသည့်အတွက် စွမ်းဆောင်ရည်ပြည့်ဝတဲ့ ဝန်ထမ်းကောင်းများစွာ လိုအပ်ပါကြောင်း၊ ဌာနတွင် ဝန်ထမ်းများ စွမ်းဆောင်ရည်ပြည့်ဝစေရန်အတွက် ဌာနဆိုင်ရာ လုပ်ငန်းကျွမ်းကျင်မှုသင်တန်းများနှင့် မွမ်းမံသင်တန်းများပို့ချခြင်း၊ IT ဆိုင်ရာ ကွန်ပျူတာသင်တန်းများပို့ချခြင်း၊ ဌာနနှင့်ဆက်စပ်သည့် ပြည်တွင်း၊ ပြည်ပသင်တန်းများ၊ အစည်းအဝေးများသို့ စေလွှတ်ခြင်း၊ ပြည်တွင်း၊ ပြည်ပ၌သင်တန်းတက်ရောက်ခဲ့သည့် ဝန်ထမ်းများနှင့် ပြည်ပဆွေးနွေးပွဲ တက်ရောက်ခဲ့သည့် ဝန်ထမ်းများမှ အတွေ့အကြုံများကို ပြန်လည်မျှဝေခြင်းနှင့် ဌာနတွင်း အသိပညာဖလှယ်ရေး အစီအစဉ်များကို ဆောင်ရွက်လျက်ရှိပါကြောင်း၊ ယခုသင်တန်းတွင် ဦးစီးအရာရှိ (၂၄) ဦးနှင့် လက်ထောက်ညွှန်ကြားရေးမှူး (၈) ဦးတို့ တက်ရောက်မည်ဖြစ်ကြောင်း၊ သင်တန်းသားများအနေဖြင့် သင်တန်းက ချမှတ်ထားသည့် စည်းကမ်း၊ဝန်ထမ်းနှင့်သက်ဆိုင်သည့် စည်းကမ်းများနှင့်အညီ တက်ရောက်ရန်လိုအပ်ကြောင်း၊ ယခင် အရာထမ်းမွမ်းမံသင်တန်းဖွင့်လှစ်ခဲ့ရာတွင် ပြင်ပဘာသာရပ်များကို ဖိတ်ခေါ်ပို့ချခဲ့ပါကြောင်း၊ ယခုသင်တန်းတွင်လည်း ဌာနတွင်းလုပ်ငန်းကျွမ်းကျင်မှုဘာသာရပ်များအပြင် မဖြစ်မနေသိသင့်သိထိုက်သည့် ပြင်ပဘာသာရပ်များကိုလည်း ဖိတ်ခေါ်ထားပါကြောင်း၊ သင်တန်းသားများအနေဖြင့် ပြင်ပဘာသာရပ်များအပေါ်တွင်လည်း စိတ်ဝင်တစားလေ့လာမှတ်သားပြီး သိရှိလိုသည်များကို မေးမြန်းဆွေးနွေးကြရန်နှင့် ပို့ချမှုများကို လေ့လာမှတ်သားရုံသာမက မိမိလုပ်ငန်းအတွက် အကျိုးရှိအောင် အပြန်အလှန်ဆွေးနွေးခြင်း၊ သင်တန်းတွင် မိမိတတ်ကျွမ်းနားလည်သည်များကို အချင်းချင်း ပြန်လည်မျှဝေခြင်းဖြင့် အကျိုးရှိစွာ တက်ရောက်စေလိုပါကြောင်း၊ ယခုသင်တန်းတက်ရောက်ခြင်းဖြင့် သင်ယူခွင့်၊ လေ့လာခွင့် အခွင့်အလမ်းများ ရရှိစေမည်ဖြစ်ကြောင်း၊ ဘာသာရပ်အားလုံးကို ဂရုတစိုက်လေ့လာပြီး ဌာနက အားကိုးအားထားပြုရတဲ့ ဝန်ထမ်းကောင်းများဖြစ်ကြရန်နှင့် မိမိဌာနအတွက် တိုးတက်အောင်မြင်ရေးအတွက် ကြိုးစားဆောင်ရွက်ကြရန် မှာကြားလိုပါကြောင်း သင်တန်းဖွင့်ပွဲ အမှာစကား ပြောကြားခဲ့ပါသည်။
အဆိုပါ အခမ်းအနားသို့ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ ဒုတိယညွှန်ကြားရေးမှူးများနှင့် သင်တန်းသား၊ သင်တန်းသူ (၃၂) ဦးတို့ တက်ရောက်ခဲ့ပါသည်။ အဆိုပါသင်တန်းအား ၂၀၂၄ ခုနှစ် ဖေဖော်ဝါရီလ ၂၃ ရက်နေ့မှ မတ်လ ၂၁ ရက်နေ့အထိ ဖွင့်လှစ်ပို့ချမည်ဖြစ်ပါသည်။