နေပြည်တော်၊ စက်တင်ဘာ ၂၁

တရုတ်ပြည်သူ့သမ္မတနိုင်ငံ၊ ပေကျင်းမြို့၌ ၂၀၂၃ ခုနှစ်၊ ဇွန်လ ၁၄ ရက်နေ့မှ ၂၇ ရက်နေ့အထိ ကျင်းပပြုလုပ်ခဲ့သည့် Seminar on International Development Cooperation for Developing Countries (Myanmar) သို့တက်ရောက်ခဲ့သည့် လက်ထောက်ညွှန်ကြားရေးမှူး ဒေါ်သျှားသက်ချိုက ဆွေးနွေးပွဲမှ ရရှိခဲ့သည့်အတွေ့အကြုံဗဟုသုတများအား ပြန်လည်မျှဝေခြင်း အခမ်းအနားကို စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၄)၊ အစည်းအဝေးခန်းမ၌ ၂၁−၉−၂၀၂၃ ရက်နေ့ နေ့လယ်(၁:၀၀)နာရီတွင် ကျင်းပပြုလုပ်ခဲ့ပါသည်။ အဆိုပါအခမ်းအနားသို့ ညွှန်ကြားရေးမှူးချုပ် ဒေါ်စီစီပြုံး၊ ညွှန်ကြားရေးမှူးများနှင့် အရာထမ်း၊ အမှုထမ်း (၃၅) ဦး တက်ရောက်ခဲ့ကြပါသည်။

အဆိုပါအခမ်းအနားတွင် တရုတ်နိုင်ငံပြည်သူများ၏ နေထိုင်မှုအခြေအနေ၊ ဝင်ငွေအခြေအနေ၊ လူမှုအာမခံစနစ် (Social Security System) တို့နှင့်စပ်လျဉ်း၍ ပြုပြင်ပြောင်းလဲရေးဆောင်ရွက်ခဲ့ခြင်းများ၊ တရုတ်နိုင်ငံ၏ ပြည်ပအကူအညီပေးမှုနှင့် နိုင်ငံတကာဖွံ့ဖြိုးရေးတို့တွင် ပူးပေါင်းဆောင်ရွက်မှုများနှင့်စပ်လျဉ်း၍ ဆွေးနွေးပွဲမှ ရရှိခဲ့သည့်ဗဟုသုတများကို မျှဝေခဲ့ရာ တက်ရောက်လာသူများက သိလိုသည်များ မေးမြန်းခြင်း၊ ဗဟုသုတဖလှယ်ခြင်းများ ပြုလုပ်ခဲ့ပါသည်။ အခမ်းအနားကို နေ့လယ် (၂:၃၀) နာရီတွင် ရုပ်သိမ်းခဲ့ပါသည်။