မြန်မာနိုင်ငံ တစ်ပိုင်တစ်နိုင် အသေးစားနှင့်အလတ်စား စီးပွားရေးလုပ်ငန်း(ကုန်ထုတ်လုပ်မှု) စစ်တမ်း (၂၀၁၇) အစီရင်ခံစာ မိတ်ဆက်ပွဲ အခမ်းအနား ကျင်းပခြင်း

, , ,

         

စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် ဒိန်းမတ်နိုင်ငံအစိုးရတို့ ပူးပေါင်း ဆောင်ရွက်သည့် မြန်မာနိုင်ငံ တစ်ပိုင်တစ်နိုင်၊ အသေးစားနှင့် အလတ်စား စီးပွားရေးလုပ်ငန်း (ကုန်ထုတ်လုပ်မှု) စစ်တမ်း(၂၀၁၇) အစီရင်ခံစာ မိတ်ဆက်ပွဲ အခမ်းအနားကို ၂၀၁၈ခုနှစ်၊ မေလ(၂၉)ရက်နေ့၊ နံနက်(၁၀:၀၀)နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂)၊ အစည်းအဝေးခန်းမတွင် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ ဦးဆောင် ကျင်းပခဲ့ပါသည်။

အခမ်းအနားသို့ ဒိန်းမတ်နိုင်ငံသံအမတ်ကြီး H.E.Peter Lysholt Hansen၊ အပြည်ပြည် ဆိုင်ရာ သုတေသနမိတ်ဖက် အဖွဲ့အစည်းဖြစ်သည့် United Nations University World Institute for Development Economics Research (UNU-WIDER) မှ Director Prof. Finn Tarp နှင့် John Rand၊  သက်ဆိုင်ရာဌာနများမှ ညွန်ကြားရေးမှူးချုပ်များ၊ မိတ်ဖက် အဖွဲ့အစည်းများ၊ စာရင်းအင်းပညာဌာန(ရန်ကုန်စီးပွားရေးတက္ကသိုလ်၊ မုံရွာစီးပွားရေးတက္ကသိုလ်၊ မိတ္ထီလာစီးပွားရေးတက္ကသိုလ်)၊ သုတေသနအဖွဲ့များ၊ ဗဟိုစာရင်းအင်းအဖွဲ့ ပြည်နယ်နှင့် တိုင်းဒေသကြီး တာဝန်ခံများ၊ တာဝန်ရှိသူများအပါအဝင် စုစုပေါင်း(၁၀၀)ဦးခန့် တက်ရောက်ခဲ့ကြ ပါသည်။

ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားရာတွင် မြန်မာနိုင်ငံ၏စီးပွားရေးလုပ်ငန်းများ၏ ၉၈ ရာခိုင်နှုန်းသည် အသေးစားနှင့် အလတ်စား စီးပွားရေးလုပ်ငန်းများ ဖြစ်ပါကြောင်း၊  မြန်မာနိုင်ငံ၏ စီးပွားရေးဖွံ့ဖြိုး တိုးတက်မှု သည် အသေးစားနှင့်အလတ်စား စီးပွားရေးလုပ်ငန်းများအပေါ်များစွာ အခြေခံပါကြောင်း၊ လူမှု-စီးပွား စာရင်းအင်းများ တိကျမှန်ကန်မှသာ တိုင်းပြည်၏ အခြေအနေမှန်ကို လေ့လာသုံးသပ်ပြီး နိုင်ငံတော်၏ လူမှုစီးပွားဖွံ့ဖြိုးတိုးတက်ရေးအတွက် မူဝါဒများ၊ စီမံကိန်းများနှင့် အရေးကြီးသည့် အင်အားစုများအား သင့်တော်သလို စီမံခန့်ခွဲနိုင်မည်ဖြစ်ပါကြောင်း၊ နိုင်ငံတော်၏ စီးပွားရေး မူဝါဒ(၁၂)ရပ်တွင်လည်း နိုင်ငံတော်၏စီးပွားရေးတိုးတက်မှုကို အထောက်အကူပြုသည့် အသေးစားနှင့်အလတ်စား စီးပွားရေး လုပ်ငန်းများကိုပံ့ပိုးကူညီပေးရန် အချက်သည်လည်း တစ်ခု အပါအဝင်ဖြစ်ပါကြောင်း၊ သို့ဖြစ်ပါ၍ မြန်မာနိုင်ငံ တစ်ပိုင်တစ်နိုင်၊ အသေးစားနှင့် အလတ်စား စီးပွားရေးလုပ်ငန်း (ကုန်ထုတ်လုပ်မှု) စစ်တမ်း(၂၀၁၇) အစီရင်ခံစာတွင် ပါရှိသည့် တွေ့ရှိချက် များနှင့် ပတ်သက်၍  အကြံပြုချက်များ ပေးနိုင်ပါရန် ရှင်းလင်းပြောကြားခဲ့ပါသည်။

ဆက်လက်၍ ဒိန်းမတ်နိုင်ငံသံအမတ်ကြီး H.E.Peter Lysholt Hansen မှ နှုတ်ခွန်းဆက် အမှာစကား ပြောကြားခြင်း၊ UNU-WIDER မှ Director Prof. Finn Tarp နှင့် John Rand တို့မှ စစ်တမ်းရလဒ်နှင့် တွေ့ရှိချက်များ အပေါ်သုံးသပ်ဆွေးနွေးတင်ပြခြင်း၊  ဗဟိုစာရင်းအင်းအဖွဲ့မှ လက်ထောက် ညွှန်ကြားရေးမှူး ဒေါ်ဥမ္မာမြင့်မှ စစ်တမ်းကောက်ယူမှုလုပ်ငန်းစဉ်များနှင့် ပတ်သက်ပြီး ဆွေးနွေးပြောကြားခြင်းများ ပြုလုပ်ခဲ့ပြီး၊  တက်ရောက်လာသူများမှ သိလိုသည် များအား မေးမြန်းဆွေးနွေးခြင်းများ ပြုလုပ်ခဲ့ကြပါသည်။

ထို့နောက် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ ဆွေးနွေးချက်များ အပေါ် ပြန်လည် ရှင်းလင်းပြောကြားခဲ့ပြီး  အစည်းအဝေးကို နေ့လည် (၁၂:၃၀) နာရီ တွင် ရုပ်သိမ်းခဲ့ပါသည်။ (သတင်းစဉ်)

၂၀၁၈ ခုနှစ်၊ မေလ (၂၉) ရက်

နေပြည်တော်