စာရင်းအင်းကဏ္ဍ ဆိုင်ရာ ပေါင်းစပ်ညှိနှိုင်းရေးအဖွဲ့ အစည်းအဝေး (Consultation Meeting for Statistics Sector Coordination Group (SSCG Meeting ) ကျင်းပ

, ,

စီမံကိန်းနှင့် ဘဏ္ဍာရေးဝန်ကြီးဌာန၊  ဗဟိုစာရင်းအင်းအဖွဲ့နှင့် စာရင်းအင်းကဏ္ဍ ဆိုင်ရာ ပေါင်းစပ်ညှိနှိုင်းရေးအဖွဲ့ တို့၏ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာအရ စာရင်းအင်းအရည်အသွေး ဖွံ့ဖြိုးတိုးတက်ရေးအတွက်  ညှိနှိုင်းအစည်းအဝေးကို ၂၀၁၈ခုနှစ် မေလ (၉)ရက်နေ့၊ နံနက်(၉:၃၀)နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂)၊ အစည်းအဝေးခန်းမတွင် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ ဦးဆောင် ကျင်းပခဲ့ပါသည်။

အခမ်းအနားသို့  NSDS Cluster အဖွဲ့ခေါင်းဆောင်များနှင့် အဖွဲ့ဝင်များ၊ ဖွံ့ဖြိုးမှု မိတ်ဖက်များ၊ ပုဂ္ဂလိက အဖွဲ့အစည်းများ၊ ဌာနဆိုင်ရာ အဖွဲ့အစည်းများ၊ ဗဟိုစာရင်းအင်းအဖွဲ့မှ ညွှန်ကြားရေးမှူးချုပ်၊ ညွှန်ကြားရေးမှူးအဖွဲ့နှင့် တာဝန်ရှိသူများ အပါအဝင် စုစုပေါင်း(၈၀) ဦးခန့် တက်ရောက်ခဲ့ကြ ပါသည်။

ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားရာတွင်  စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာအရ စာရင်းအင်း အရည်အသွေး ဖွံ့ဖြိုးတိုးတက်ရေးအတွက် နိုင်ငံတော်၏အတိုင်ပင်ခံပုဂ္ဂိုလ် ဦးဆောင်သည့် ဖွံ့ဖြိုးမှုအကူအညီများ ညှိနှိုင်းရေးအဖွဲ့၏ လမ်းညွှန်မှုအရ စာရင်းအင်းအရည်အသွေးပြည့်ဝရေး လုပ်ငန်းအဖွဲ့ကို စာရင်းအင်းကဏ္ဍ ဆိုင်ရာ ပေါင်းစပ်ညှိနှိုင်းရေးအဖွဲ့ (SSCG) အဖြစ် ၂၀၁၇ ခုနှစ် ဒီဇင်ဘာလ (၂၂) ရက်နေ့တွင် ပြောင်းလဲ ဖွဲ့စည်းခဲ့ပါကြောင်း၊

အမျိုးသားစာရင်းအင်းစနစ် ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်ရေး ကော်မတီနှင့် ဖွံ့ဖြိုးမှုမိတ်ဖက်များ၏ အကူအညီဖြင့် မြန်မာနိုင်ငံ၏ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာကို အောင်မြင်စွာ အကောင်အထည်ဖော်ဆောင်ရွက်လျက်ရှိရာ  အကောင်အထည်ဖော်မှု  အောင်မြင်ရန်အတွက် ဖွံ့ဖြိုးမှုမိတ်ဖက်များ၏ အကြံပြုချက်များနှင့် အကူအညီ အထောက်အပံ့များ လိုအပ်လျက်ရှိပါကြောင်း၊  စာရင်းအင်းဥပဒေအရ စာရင်းအင်း အချက်အလက်မှန်ကန်ရေးနှင့် အရည်အသွေးပြည့်ဝရေး ကော်မတီကို ပြန်လည်ဖွဲ့စည်းပြီး အစည်းအဝေးကို မကြာမီကျင်းပရန်ရှိ ပါကြောင်း၊

          ဗဟိုစာရင်းအင်းအဖွဲ့သည် အမျိုးသားစာရင်းအင်းစနစ် ညှိနှိုင်းရေးမှူးအဖြစ် အစိုးရ အဖွဲ့အစည်းများ၊ ဖွံ့ဖြိုးမှုမိတ်ဖက်များဖြင့် ပူးပေါင်း၍ စာရင်းအင်းအချက်အလက်များကို ဝန်ဆောင်မှုပေးလျက်ရှိပါကြောင်း၊ အရေးကြီးလုပ်ငန်း တစ်ခုအနေဖြင့် ကောက်ယူလျက်ရှိသော စစ်တမ်းများကို နိုင်ငံတကာ စာရင်းအင်းစံနှုန်းများနှင့် ကိုက်ညီစေရန် ပြန်လည်ဆန်းစစ် အကဲဖြတ်ဆောင်ရွက်သွားမည် ဖြစ်ပါကြောင်း၊  ဗဟိုစာရင်းအင်းအဖွဲ့ သာမက အခြားသော ဝန်ကြီးဌာနများမှ စာရင်းအင်းလုပ်ငန်းကို တာဝန်ယူဆောင်ရွက်နေရသော ဝန်ထမ်းများ၏ စွမ်းဆောင်ရည် မြှင့်တင်ပေးရန် လိုအပ်လျက်ရှိပါကြောင်း၊

          ယခုကျင်းပသည့် အစည်းအဝေးမှာလည်း အမျိုးသားစာရင်းအင်းစနစ် အရည်အသွေး ပြည့်ဝရေးအတွက် စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ အကောင်အထည် ဖော်ရန် ဖွံ့ဖြိုးမှုမိတ်ဖက်များ၏ အကြံပေးမှုများအပါအဝင် ငွေကြေးထောက်ပံ့မှုများ၊ နည်းပညာ အကူအညီများကို စနစ်တကျ အဆိုပြု ဆောင်ရွက်နိုင်ရန်အတွက် ရည်ရွယ်၍ ကျင်းပရခြင်း ဖြစ်ပါကြောင်း၊ ယခုအစည်းအဝေးတွင် စာရင်းအင်းကဏ္ဍ တိုးတက်ရေးအတွက် ဆောင်ရွက်ပြီး ဆောင်ရွက်ဆဲ လုပ်ငန်းများ ဆွေးနွေးကြမည်ဖြစ်ပြီး ၄င်းမှတဆင့် ရှေ့ဆက်ဆောင်ရွက်ရန် စီမံချက်များအား ဆွေးနွေးရန်ဖြစ်ပါကြောင်း ပြောကြားပါသည်။

ဆက်လက်၍ ဖွံ့ဖြိုးမှုမိတ်ဖက်များကိုယ်စား UNFPA ဌာနကိုယ်စားလှယ် Ms.Janet Jackson မှ အမှာစကားပြောကြားပါသည်။

ထို့နောက် စာရင်းအင်းကဏ္ဍ ဆိုင်ရာ ပေါင်းစပ်ညှိနှိုင်းရေးအဖွဲ့ (SSCG)နှင့် အစည်းအဝေး တက်ရောက်လာကြသူများမှ ညှိနှိုင်းဆွေးနွေးကြပြီး ညွှန်ကြားရေးမှူးချုပ်မှ နိဂုံးချုပ် အမှာစကား ပြောကြားကာ  အစည်းအဝေးကို ရုပ်သိမ်းခဲ့ပါသည်။

          (သတင်းစဉ်)