ကချင်ပြည်နယ်၊ ဗဟိုစာရင်းအင်းအဖွဲ့၏ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲကို ၁၄-၃-၂၀၂၂ ရက်နေ့ နံနက်ပိုင်းတွင် ကချင်ပြည်နယ်၊ မြစ်ကြီးနားမြို့၊ မြို့တော်ခန်းမ၌ ကျင်းပခဲ့ရာ ဆွေးနွေးပွဲသို့ ကချင်ပြည်နယ်အစိုးရအဖွဲ့၊ ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများ၊ ဗဟိုစာရင်းအင်းအဖွဲ့မှ ဒုတိယညွှန်ကြားရေးမှူးချုပ်နှင့် တာဝန်ရှိသူများ၊ ဖိတ်ကြားထားသော ဌာနဆိုင်ရာများမှ ဌာနအကြီးအကဲများ တက်ရောက်ခဲ့ကြပါသည်။
ဆွေးနွေးပွဲတွင် ကချင်ပြည်နယ် အစိုးရအဖွဲ့၊ ဝန်ကြီးချုပ်ဦးခက်ထိန်နန်မှ အဖွင့်အမှာ စကားပြောကြားရာတွင် ဗဟိုစာရင်းအင်းအဖွဲ့မှပြဋ္ဌာန်းခဲ့သည့် စာရင်းအင်းဥပဒေနှင့် စာရင်းအင်းနည်းဥပဒေများ သက်ဝင်ကျင့်သုံးလာစေရေး၊ အမျိုးသားစာရင်းအင်းစနစ်တွင် ပါဝင်သည့်သက်ဆိုင်ရာဌာနများနှင့် ပုဂ္ဂလိကလုပ်ငန်းရှင်များအကြား ကျယ်ကျယ်ပြန့်ပြန့် သိရှိနားလည်လာစေရေးနှင့် ဥပဒေနှင့်အညီ ဆောင်ရွက်နိုင်စေရေးတို့ကို ရည်ရွယ်၍ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲကို  ကျင်းပရခြင်းဖြစ်ပါကြောင်း၊ နိုင်ငံတစ်နိုင်ငံ ဖွံ့ဖြိုးတိုးတက်လာစေရေးအတွက် နိုင်ငံ၏အမျိုးသားစာရင်းအင်းစနစ် ခိုင်မာအားကောင်းရန် လိုအပ်ပါကြောင်း၊ သို့မှသာ နိုင်ငံအတွက် လိုအပ်သည့်မူဝါဒများနှင့် စီမံကိန်းများရေးဆွဲရာတွင်လည်းကောင်း၊ သယံဇာတများ ခွဲဝေအသုံးပြုရာတွင်လည်းကောင်း၊ သုတေသနနှင့်ဖွံ့ဖြိုးရေးလုပ်ငန်းများ ဆောင်ရွက်ရာတွင်လည်းကောင်း ထိရောက်စွာ အထောက်အကူပြုနိုင်မည်ဖြစ်ပါကြောင်း၊  ဗဟိုစာရင်းအင်းအဖွဲ့သည် မြန်မာနိုင်ငံ၏ တစ်ခုတည်းသော စာရင်းအင်းအာဏာပိုင်အဖွဲ့အစည်း ဖြစ်သည်နှင့်အညီ တစ်နိုင်ငံလုံး၏ လူမှု၊ စီးပွားနှင့်သက်ဆိုင်သော စာရင်းအင်းအချက်အလက်များကို ထုတ်ပြန်လျက်ရှိပြီး စာရင်းအင်းများ ပြုစုထုတ်ပြန်ရာ၌ လိုက်နာရမည့် အခြေခံစည်းမျဉ်းများနှင့်အညီ ဆောင်ရွက်ခြင်း၊ အမျိုးသားစာရင်းအင်းစနစ် အရည်အသွေးပြည့်ဝရေးအတွက် ပေါင်းစပ်ညှိနှိုင်းမှုယန္တရားများ ဖွဲ့စည်းဆောင်ရွက်ခြင်း၊ စစ်တမ်းများကောက်ယူခြင်း၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာကို အကောင်အထည်ဖော်ခြင်းလုပ်ငန်းများအား သက်ဆိုင်ရာဌာန၊ အဖွဲ့အစည်းအားလုံး၏ ပူးပေါင်းပါဝင်မှုနှင့် ဆောင်ရွက်လျက်ရှိပါကြောင်း၊ ထို့ကြောင့် အစိုးရဌာနများအနေဖြင့် ဗဟိုစာရင်းအင်းအဖွဲ့မှ တောင်းခံလာသည့် စာရင်းအင်း အချက်အလက်များကို ပံ့ပိုးပေးရန်နှင့်ဌာနဆိုင်ရာများအနေဖြင့် စာရင်းအင်းလုပ်ငန်းများ ဆောင် ရွက်ရာတွင်  ဗဟိုစာရင်းအင်းအဖွဲ့နှင့်အတူ တက်တက်ကြွကြွ ပူးပေါင်းဆောင်ရွက်ပေးကြရန် တိုက်တွန်းပြောကြားခဲ့ပါသည်။
ဆက်လက်၍ ကချင်ပြည်နယ်အစိုးရအဖွဲ့၊  စီးပွားရေးရာဝန်ကြီး ဉီးမျိုးဆွေမှ နှုတ်ခွန်းဆက်အမှာစကားပြောကြားရာတွင် စာရင်းအင်းဥပဒေ၊ နည်းဥပဒေများကို အသစ်ရေးဆွဲထုတ် ပြန်လိုက်သည့်အတွက် စာရင်းအင်းအချက်အလက်များသည် ပိုမိုခိုင်မာအားကောင်းလာပြီး အချိန်နှင့်တစ်ပြေးညီ ထုတ်ပြန်နိုင်မည်ဖြစ်ပါကြောင်း၊ ပြည်နယ်ဗဟိုစာရင်းအင်းအဖွဲ့သည်လည်း ပြည်နယ်ဖွံ့ဖြိုးတိုးတက်ရေးအတွက် စားသုံးသူစျေးဆနှုန်းကိန်း၊ ငွေကြေးဖောင်းပွမှုနှုန်းများ တွက်ချက်ရန် စျေးနှုန်းစာရင်းအင်းများ ကောက်ယူခြင်း၊ မွေးဖွားမှုနှင့် သေဆုံးမှုဆိုင်ရာစာရင်းများ စုစည်းတင်ပြခြင်း၊ ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှု လျှော့ချရေးဆိုင်ရာ အညွှန်းကိန်းများ၊ လူမှုစီးပွားဆိုင်ရာစာရင်းအင်းများ စုစည်းတင်ပြခြင်း၊ စီးပွားရေးဆိုင်ရာ မှတ်ပုံတင်ခြင်းလုပ်ငန်းများ ဆောင်ရွက်ခြင်း၊ သဘာဝဘေးအန္တရာယ်ဆိုင်ရာစစ်တမ်း ကောက်ယူခြင်းနှင့် အခါအားလျော်စွာ စစ်တမ်းများကောက်ယူခြင်း လုပ်ငန်းများကို ဆောင်ရွက်လျက် ရှိပါကြောင်း၊  လာမည့် ၂၀၂၂ - ၂၀၂၃ ဘဏ္ဍာနှစ်တွင်လည်း မြန်မာနိုင်ငံကလေးအလုပ်သမားပပျောက်ရေးဆိုင်ရာ အမျိုးသားကော်မတီ၏ လမ်းညွှန်ချက်အရ ကချင်ပြည်နယ် ကလေးလုပ်သားစစ်တမ်းကို  စတင်ကောက်ယူမည်ဖြစ်ပြီး စစ်တမ်းအောင်မြင်စွာ ကောက်ယူနိုင်ရန်အတွက် ပြည်နယ်စာရင်းကောက်ယူရေး လုပ်ငန်းကော်မတီအဖွဲ့ဝင်များနှင့် သက်ဆိုင်ရာဌာနဆိုင်ရာများမှ ပူးပေါင်းပါဝင်ပေးကြပါရန် ပြောကြားလိုပါကြောင်း၊  ကချင်ပြည်နယ်တွင်ရှိသည့် ဌာနဆိုင်ရာများအားလုံးမှ ပြည်နယ်၏ စာရင်းအင်းအချက်အလက်များမှန်ကန်ရေးအတွက် စာရင်းအင်းလုပ်ငန်းများ လုပ်ကိုင်ဆောင်ရွက်ကြသည့်နေရာမှာ ဗဟိုစာရင်းအင်းအဖွဲ့နှင့်အတူ ပူးပေါင်းလုပ်ကိုင်ဆောင်ရွက်ပေးကြရန် တိုက်တွန်းပြောကြား ခဲ့ပါသည်။
ထို့နောက် ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ် ဦးကျော်ဆန်းဦးက စာရင်းအင်းဥပဒေနှင့် နည်းဥပဒေများတွင် ပြဋ္ဌာန်းထားသည့် အကြောင်းအရာများနှင့် စပ်လျဉ်း၍ ရှင်းလင်းပြောကြားရာ တက်ရောက်လာသည့် ဌာနဆိုင်ရာများမှ တာဝန်ရှိသူများက မေးမြန်းဆွေးနွေးခဲ့မှုများအပေါ် ဒုတိယညွှန်ကြားရေးမှူးချုပ်မှ ပြန်လည်ရှင်းလင်းဆွေးနွေးခဲ့ပါသည်။