စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ရန်ကုန်မြို့တွင် လုပ်ငန်းများစစ်ဆေး

နေပြည်တော် ၊ ဒီဇင်ဘာ ၂၇


စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းသည် ဒီဇင်ဘာလ ၂၂ ရက်မှ ၂၅ ရက်အထိ ရန်ကုန်မြို့၊ အကောက်ခွန်ဦးစီးဌာနရုံးချုပ်၊ မြန်မာ့အာမခံလုပ်ငန်း ရုံးချုပ်၊ မြန်မာ့လယ်ယာဖွံ့ဖြိုးရေးဘဏ်ရုံးချုပ်၊ မြန်မာ့နိုင်ငံခြားကုန်သွယ်မှုဘဏ် (ရုံးချုပ်) နှင့် မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ် (ရုံးချုပ်) တို့သို့ သွားရောက်၍ ဌာန ဆိုင်ရာလုပ်ငန်းများဆောင်ရွက်နေမှုကို ကြည့်ရှုစစ်ဆေးပြီး ဝန်ထမ်းများနှင့်တွေ့ဆုံ၍ လိုအပ် သည်များ ဆွေးနွေးမှာကြားခဲ့သည်။

ဒုတိယဝန်ကြီးသည် ဒီဇင်ဘာလ ၂၂ ရက်တွင် မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များအသင်းချုပ် နှစ်ပတ်လည်အစည်းအဝေးသို့ ပါဝင်တက်ရောက်ခဲ့သည်။ ဒီဇင်ဘာ လ ၂၃ ရက်၊ နံနက်ပိုင်းတွင် အကောက်ခွန်ဦးစီးဌာနရုံးချုပ်၌ တင်ဒါလုပ်ငန်းဆိုင်ရာကိစ္စရပ်များ၊ ဌာနဆိုင်ရာစုံစမ်းစစ်ဆေးရေး ခုံရုံးလုပ်ငန်းဆိုင်ရာကိစ္စရပ်များ၊ ဌာန၏လုပ်ငန်းဆောင်ရွက်မှုများ ကို ကြည့်ရှုစစ်ဆေးခဲ့ပြီး၊ ဝန်ထမ်းများနှင့်တွေ့ဆုံသည်။ နေ့လယ်ပိုင်းတွင် အေးရှားဝါးလ် အပြည်ပြည်ဆိုင်ရာဆိပ်ကမ်းသို့ ရောက်ရှိစစ်ဆေးရာ အကောက်ခွန်ဦးစီးဌာနနှင့် အေးရှားဝါးလ် ဆိပ်ကမ်းမှ တာဝန်ရှိသူများက ရှင်းလင်းတင်ပြသည်။ ညနေပိုင်းတွင် မြန်မာ့အာမခံလုပ်ငန်းသို့ ရောက်ရှိရာ ဦးဆောင်ညွှန်ကြားရေးမှူးက လုပ်ငန်းဆိုင်ရာများ ရှင်းလင်းတင်ပြ၍ ဝန်ထမ်းများ နှင့် တွေ့ဆုံသည်။

ဒီဇင်ဘာလ ၂၄ ရက်၊ နံနက်ပိုင်းတွင် မြန်မာ့လယ်ယာဖွံ့ဖြိုးရေးဘဏ်ရုံးချုပ်၌ ဘဏ်၏ ပထမလေးလပတ်နှင့် ဒုတိယလေးလပတ်လုပ်ငန်းညှိနှိုင်းအစည်းအဝေးသို့ တက်ရောက်ကြီး ကြပ်ခဲ့ပြီး၊ ဦးဆောင်ညွှန်ကြားရေးမှူးနှင့် တာဝန်ရှိသူများအား စိုက်ပျိုးရေး၊ မွေးမြူရေးဆိုင်ရာ ချေးငွေကိစ္စများအား အသေးစိတ်ဆွေးနွေးမှာကြားခဲ့သည်။ နေ့လယ်ပိုင်းတွင် မြန်မာ့နိုင်ငံခြား ကုန်သွယ်မှုဘဏ်နှင့် မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ်တို့သို့ သွားရောက်၍ ဦးဆောင်ညွှန်ကြားရေးမှူးများနှင့် တာဝန်ရှိသူများအား တွေ့ဆုံ၍ လုပ်ငန်းဆိုင်ရာရှင်းလင်း တင်ပြမှုများအပေါ် လိုအပ်သည်များပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။ (သတင်းစဉ်)