စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း Virtual အစီအစဉ်ဖြင့်ပြုလုပ်သည့် အာဆီယံ+၃ ဘဏ္ဍာရေးနှင့် ဗဟိုဘဏ် ဒုတိယအကြီးအကဲများ အစည်းအဝေးတက်ရောက်

နေပြည်တော်၊ ဒီဇင်ဘာ ၂၀

တရုတ်ပြည်သူ့သမ္မတနိုင်ငံမှ Virtual အစီအစဉ်ဖြင့် အိမ်ရှင်အဖြစ် လက်ခံကျင်းပသော အာဆီယံ+၃ နိုင်ငံများ၏ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးအား ယနေ့နံနက် (၀၈:၃၀) နာရီမှ (၁၆:၄၅) နာရီထိ ကျင်းပရာ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ပါဝင်တက်ရောက်သည်။ အစည်းအဝေးအား အစီအစဉ် ၂ ရပ်ဖြင့် ကျင်းပရာ ပထမပိုင်း Informal Session တွင် အာဆီယံ+၃ ဒေသတွင်းနိုင်ငံများ၏ ၂၀၂၂ ခုနှစ်အတွက် စီးပွားရေးအခြေအနေလေ့လာသုံးသပ်မှုများအား အပြည်ပြည်ဆိုင်ရာငွေကြေးရန်ပုံငွေအဖွဲ့နှင့် အာဆီယံ+၃ မက်ခရိုစီးပွားရေးသုတေသနရုံး (ASEAN+3 Macroeconomic Research Office-AMRO) မှ လည်းကောင်း၊ ဒေသတွင်း ရေရှည်တည်တံ့ခိုင်မြဲသော ဖွံ့ဖြိုးတိုးတက်မှုရရှိစေရေး ဘဏ္ဍာရေးအစီအစဉ်များခေါင်းစဉ်ဖြင့် အာရှဖွံ့ဖြိုးရေးဘဏ်မှလည်းကောင်း ဆွေးနွေးတင်ပြရာ တက်ရောက်ကြသည့် ဒုတိယဝန်ကြီးများနှင့် ဗဟိုဘဏ်ဒုတိယဥက္ကဌများက အမြင်ချင်းဖလှယ်ဆွေးနွေးကြသည်။ အစီအစဉ် ဒုတိယပိုင်း Formal Session တွင် အာဆီယံ+၃ မက်ခရိုစီးပွားရေးသုတေသနရုံး မှ ဒေသတွင်းအဖွဲ့ဝင်နိုင်ငံများ၏ ဘဏ္ဍာရေးနှင့်စီးပွားရေးဆိုင်ရာ သတင်းအချက်အလက်များအား စုစည်းသုတေသနပြုမှုဆိုင်ရာ ဦးတည်ဆောင်ရွက်သွားမည့် နည်းဗျူဟာများ၊ ရုံးလုပ်ငန်းစဉ်များ၊ ၂၀၂၃ မှ ၂၀၂၅ ခုနှစ်အတွင်း ဆောင်ရွက်ရန်လျာထားသည့် ကာလလတ် အကောင်အထည်ဖော်ရေး စီမံချက်နှင့် ရှေ့ဆက်လက်ဆောင်ရွက်မည့် အစီအစဉ်များအား ဆွေးနွေးတင်ပြရာ တက်ရောက်သူများက ဝိုင်းဝန်းဆွေးနွေး အတည်ပြုခဲ့ပါသည်။ ဆက်လက်၍ ချင်းမိုင်အစီအစဉ်တွင် နိုင်ငံစုံပါဝင်လာစေရေး လုပ်ငန်းစဉ်သဘောတူညီချက်အရ ဒေသတွင်း အဖွဲ့ဝင်နိုင်ငံများတွင် ဘဏ္ဍာရေးဆိုင်ရာ၊ ငွေကြေးဆိုင်ရာ အခက်အခဲများ ဖြစ်ပေါ် ပါက ဖြေရှင်းထောက်ပံ့နိုင်မည့် နည်းလမ်းများနှင့်စပ်လျဉ်းသော လုပ်ငန်းဆောင်ရွက်မှုလက်စွဲအား ပြင်ဆင်ဖြည့်စွက်ခြင်း၊ လုပ်ငန်းစဉ်အဆင့်ဆင့်နှင့် အတိုးနှုန်းမူဘောင်သတ်မှတ်ခြင်းများအား အစည်းအဝေး အစီအစဉ်အတိုင်း ဆက်လက်ဆွေးနွေးဆုံးဖြတ်ကြသည်။ ဒုတိယဝန်ကြီးမှ ပါဝင်ဆွေးနွေးပြောကြားရာတွင် COVID-19 ရောဂါပျံ့နှံ့မှုများ၊ စွမ်းအင်ဆိုင်ရာ ရေနံနှင့် လောင်စာဆီအခက်အခဲများ၊ မြင့်တက်လာသော ကုန်စည်ဈေးနှုန်းများနှင့် ငွေဖောင်းပွမှုများကြောင့် ကမ္ဘာလုံးဆိုင်ရာစီးပွားရေးဖွံ့ဖြိုးတိုးတက်မှုများအတွက် စိန်ခေါ်မှုများစွာ ရင်ဆိုင်ခဲ့ရကြောင်း၊ မြန်မာနိုင်ငံအနေဖြင့်လည်း COVID-19 ကာလအလွန် နိုင်ငံ့စီးပွားရေး ပြန်လည်ကောင်းမွန်လာစေရန် ကြိုးပမ်းဆောင်ရွက်လျက်ရှိပြီး ၂၀၂၂-၂၀၂၃ ဘဏ္ဍာရေးနှစ်အတွက် စီးပွားရေးတိုးတက်မှုနှုန်းကို ၃.၇% ရရှိရန်မျှော်မှန်းထားပါကြောင်း ယခု ၂၀၂၂ ခုနှစ် ပထမ (၆) လအပြီးတွင် စီးပွားရေးတိုးတက်မှုနှုန်း ၃.၄% ရရှိခဲ့ပါကြောင်း၊ စိုက်ပျိုးရေးနှင့်မွေးမြူရေးကဏ္ဍဖွံ့ဖြိုးတိုးတက်ရေးကို ဦးစားပေးဆောင်ရွက်လျက်ရှိပြီး အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်စေရန်နှင့် ပြည်တွင်းကုန်ထုတ်လုပ်မှုလုပ်ငန်းများ တိုးတက်လာစေရန်  အားပေးမြှင့်တင်သွားမည်ဖြစ်ကြောင်း၊ မြန်မာနိုင်ငံအနေဖြင့် ခိုင်မာအားကောင်းပြီး အားလုံးပါဝင်သော စီးပွားရေးတိုးတက်မှုတွင်ပါဝင်နိုင်ရန် ကြိုးပမ်းလျက်ရှိပြီး နိုင်ငံတကာ အသိုက်အဝန်းတွင် အခြားအဖွဲ့ဝင်နိုင်ငံများနှင့်အတူ တာဝန်ကျေပွန်သော နိုင်ငံတစ်နိုင်ငံအဖြစ် ရပ်တည်ဆောင်ရွက်သွားမည်ဖြစ်ကြောင်း ဆွေးနွေးပြောကြားပါသည်။ အာဆီယံ+၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးအား  အာဆီယံနိုင်ငံများနှင့် အပေါင်းသုံးနိုင်ငံများဖြစ်ကြသည့် တရုတ်၊ ဂျပန်နှင့် ကိုရီးယားသမ္မတနိုင်ငံ များတွင် အလှည့်ကျပူးတွဲအိမ်ရှင်အဖြစ် ကျင်းပလျက်ရှိရာ ယခုနှစ်အတွက် အိမ်ရှင်အဖြစ် အာဆီယံနိုင်ငံများဖက်မှ ကမ္ဘာဒီးယားနိုင်ငံနှင့် အပေါင်းသုံးနိုင်ငံများဖက်မှ တရုတ်ပြည်သူ့သမ္မတနိုင်ငံတို့က Co-Chairs များအဖြစ် လက်ခံကျင်းပခြင်းဖြစ်ပါသည်။ ယခုအစည်းအဝေးသို့ အာဆီယံ+၃ နိုင်ငံများ၏ ဘဏ္ဍာရေးဝန်ကြီးဌာနများနှင့် ဗဟိုဘဏ်များမှ ဒုတိယဝန်ကြီးများနှင့် ဒုတိယဥက္ကဌများ စုံညီစွာတက်ရောက်ခဲ့ကြကြောင်း သတင်းရရှိပါသည်။ (သတင်းစဉ်)