စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးဦးဝင်းရှိန် ရသုံးမှန်းခြေငွေစာရင်းဦးစီးဌာန တည်ထောင်ခြင်း နှစ် (၅၀) ပြည့်ရွှေရတုအထိမ်းအမှတ် အခမ်းအနား၊ ဂုဏ်ပြုညစာစားပွဲနှင့် ပျော်ပွဲရွှင်ပွဲသို့ တက်ရောက်


နေပြည်တော်၊ ဒီဇင်ဘာ ၁၁

စီမံကိန်းနှင့်ဘဏ္ဍာရေးဝန်ကြီးဌာန၊ ရသုံးမှန်းခြေငွေစာရင်းဦးစီးဌာန တည်ထောင်ခြင်း နှစ် (၅၀) ပြည့် ရွှေရတုအထိမ်းအမှတ် အခမ်းအနား၊ ဂုဏ်ပြုညစာစားပွဲနှင့် ပျော်ပွဲရွှင်ပွဲကို ဒီဇင်ဘာလ ၁၁ ရက်၊ ညနေပိုင်းတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ ရသုံး မှန်းခြေငွေစာရင်းဦးစီးဌာန၊ ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း၌ ကျင်းပခဲ့သည်။ အခမ်းအနားသို့ ပြည်ထောင်စုဝန်ကြီး ဦးဝင်းရှိန်၊ ဒုတိယဝန်ကြီးများနှင့် ဌာနဆိုင်ရာအကြီးအကဲများ၊ ညွှန်ကြားရေးမှူးချုပ်နှင့် အရာထမ်း၊ အမှုထမ်းများ၊ ရသုံးမှန်းခြေငွေစာရင်းဦးစီးဌာန၊ အငြိမ်းစားညွှန်ကြားရေးမှူးချုပ်များ၊ ဖိတ်ကြားထားသောဧည့်သည်တော်များ တက်ရောက်ကြသည်။ အခမ်းအနားတွင် ပြည်ထောင်စုဝန်ကြီးက ၁၉၇၂ ခုနှစ်၊ မတ်လ ၁၅ ရက်တွင် စတင်တည်ထောင်ခဲ့သည့် ရသုံးမှန်းခြေငွေစာရင်းဦးစီးဌာနသည် ၂၀၂၂ ခုနှစ်၊ မတ်လ ၁၅ ရက်နေ့တွင် နှစ် (၅၀) ပြည့်မြောက်ခဲ့ပြီဖြစ်ကြောင်း၊ ရသုံးမှန်းခြေငွေစာရင်းဦးစီးဌာနအနေဖြင့် နှစ်စဉ်အစိုးရ၏ အရအသုံးခန့်မှန်းခြေငွေစာရင်းများရေးဆွဲခြင်း၊ နိုင်ငံတော်၏ ဘဏ္ဍာရေးမူဝါဒများ ချမှတ်နိုင်ရန် ဆောင်ရွက်ခြင်းတို့ကို အဓိကတာဝန်ယူဆောင်ရွက်ရသည့် အဖွဲ့အစည်းဖြစ် ကြောင်း၊ ဌာန၏တာဝန်များကိုထမ်းဆောင်ရခြင်းအတွက် ဝမ်းမြောက်ဂုဏ်ယူကြစေလိုကြောင်း၊ ရသုံးမှန်းခြေငွေစာရင်းဦးစီးဌာနအနေဖြင့် ၂၀၁၄ ခုနှစ်မှစ၍ ပြည်သူ့ဘဏ္ဍာရေးစီမံခန့်ခွဲမှု ပြုပြင်ပြောင်းလဲရေးလုပ်ငန်းများနှင့် နိုင်ငံပိုင် စီးပွားရေးအဖွဲ့အစည်းများ၏ ပြုပြင်ပြောင်းလဲရေး လုပ်ငန်းများကို ဆောင်ရွက်နိုင်ခဲ့ကြောင်း၊ စတင်တည်ထောင်ခဲ့သည့်နှစ်မှစ၍ ရွှေရတုကာလတိုင်အောင် ခေတ်အဆက်ဆက် နိုင်ငံတော်က ပေးအပ်သောတာဝန်များအပြင် ပြည်သူ့ဘဏ္ဍာရေး စီမံခန့်ခွဲမှုစံနစ်ကို နိုင်ငံတကာစံနှုန်းများနှင့်အညီ ခေတ်မီဖွံ့ဖြိုးတိုးတက်အောင် ဆောင်ရွက်နိုင်ခဲ့ကြောင်း၊ သို့ဖြစ်ရာ ရသုံးမှန်းခြေငွေစာရင်းဦးစီးဌာနမှ ဝန်ထမ်းများအနေဖြင့် ဌာန၏ သမိုင်းအစဉ်အလာကောင်းများကို ဆက်လက်ထိန်းသိမ်းပြီး နောင်နှစ်ပေါင်းများစွာတိုင်အောင် နိုင်ငံနှင့်ပြည်သူ့အကျိုးကို စွမ်းစွမ်းတမံ သယ်ပိုးထမ်းဆောင်ကြရန် တိုက်တွန်းပြောကြားခဲ့သည်။ ဆက်လက်၍ ရသုံးမှန်းခြေငွေစာရင်းဦးစီးဌာနတွင် တာဝန်ထမ်းဆောင်ခဲ့ကြသည့် ညွှန်ကြားရေးမှူးချုပ်များဖြစ်ကြသော ဒုတိယဝန်ကြီး ဦးမောင်မောင်ဝင်း၊ ညွှန်ကြားရေးမှူးချုပ် (ငြိမ်း) ဒေါ်နွဲ့နွဲ့ဝင်းနှင့် လက်ရှိညွှန်ကြားရေးမှူးချုပ် ဒေါ်သီတာထွန်းတို့က ဌာန၏သမိုင်းကြောင်းနှင့် လုပ်ငန်းဆောင်ရွက်မှုများနှင့်စပ်လျဉ်း၍ ဂုဏ်ပြုအမှာစကားများ အသီးသီး ပြောကြားကြသည်။ အခမ်းအနားအပြီးတွင် ပြည်ထောင်စုဝန်ကြီး၊ ဒုတိယဝန်ကြီးများသည် ရသုံးမှန်းခြေငွေ စာရင်းဦးစီးဌာနဝန်ထမ်းများ၊ ဖိတ်ကြားထားသည့် ဧည့်သည်တော်များနှင့်အတူ ဂုဏ်ပြုညစာကို ရင်းနှီးပျော်ရွှင်စွာ အတူတကွသုံးဆောင်ခဲ့ကြပြီး၊ ဝန်ထမ်းများက နှစ် (၅၀) ပြည့်ရွှေရတုအထိမ်း အမှတ်အဖြစ် တေးသီချင်းများ သီဆိုကပြဖျော်ဖြေခြင်းနှင့် ဗလာမပါကံစမ်းမဲများ ဖွင့်လှစ်ခြင်းတို့ကို ဆောင်ရွက်ခဲ့ကြကြောင်း သတင်းရရှိသည်။ (သတင်းစဉ်)