နိုင်ငံတော်ပြတင်းတစ်ပေါက်စနစ် အကောင်အထည်ဖော်ရေး ဦးဆောင်ကော်မတီ၏ ပထမအကြိမ် လုပ်ငန်းညှိနှိုင်းအစည်းအဝေး ကျင်းပ

နေပြည်တော် ၊ နိုဝင်ဘာ  ၂၅ 

နိုင်ငံတော်ပြတင်းတစ်ပေါက်စနစ်အကောင်အထည်ဖော်ရေးဦးဆောင်ကော်မတီ၏ပထမအကြိမ်လုပ်ငန်းညှိနှိုင်းအစည်းအဝေးကို ယနေ့၊ နံနက် (၁၀:၀၀) နာရီတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ အစည်းအဝေးခန်းမ၌ကျင်းပပါသည်။ အစည်းအဝေးသို့ ကော်မတီဥက္ကဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်၊ ကော်မတီဒုတိယဥက္ကဋ္ဌများဖြစ်ကြသော စီမံကိန်းနှင့်ဘဏ္ဍာရေးဝန်ကြီးဌာနနှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနတို့မှ ဒုတိယဝန်ကြီးများနှင့် ကော်မတီဝင်မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌ၊ သက်ဆိုင်ရာဝန်ကြီးဌာနများမှ ညွှန်ကြားရေးမှူးချုပ်နှင့် ဦးဆောင်ညွှန်ကြားရေးမှူးများ  စုံညီစွာ တက်ရောက်ပါသည်။

အစည်းအဝေးတွင် ပြည်ထောင်စုဝန်ကြီး ဦးဝင်းရှိန်က အမှာစကားပြောကြားရာ၌ နိုင်ငံတကာနှင့် အာဆီယံဒေသတွင်း တိုးတက်များပြားလာသည့် ကုန်သွယ်မှုလုပ်ငန်းများလုပ်ဆာင်ရာတွင် လွယ်ကူအဆင်ပြေချောမွေ့စေရေးအတွက်လည်းကောင်း၊ ကမ္ဘာ့အကောက်ခွန်အဖွဲ့၏ ပြန်လည်သုံးသပ်ပြင်ဆင်ထားသော ကျိုတိုသဘောတူညီချက်၊ အထွေထွေနောက်ဆက်တွဲပါ ပြဋ္ဌာန်းချက်များအရလည်းကောင်း၊ ကမ္ဘာ့ကုန်သွယ်ရေးအဖွဲ့၏ ကုန်သွယ်မှုလွယ်ကူချောမွေ့စေရေးသဘောတူညီချက်အရနှင့် အာဆီယံကုန်စည်ကုန်သွယ်ရေးသဘောတူညီချက်အရလည်းကောင်း မြန်မာနိုင်ငံအနေဖြင့် နိုင်ငံတော်ပြတင်းတစ်ပေါက်စနစ်အား အကောင်အထည်ဖော် ဆောင်ရွက်သွားရမည်ဖြစ်ကြောင်း၊ 

နိုင်ငံတော်ပြတင်းတစ်ပေါက်စနစ်သည် ကုန်ပစ္စည်းရှင်းလင်းထုတ်ယူခြင်းနှင့် ကုန်သွယ်မှုလုပ်ငန်းစဉ်များတွင် အချိန်နှင့်ကုန်ကျစရိတ်များသက်သာစွာဖြင့် လျင်မြန်စွာဆောင်ရွက်နိုင်စေရန် ရည်ရွယ်အကောင်အထည်ဖော်သည့်စနစ်တစ်ခုဖြစ်ကြောင်း၊ တစ်ဖက်တွင်လည်း ကုန်သွယ်မှုလုပ်ငန်းများကို ဥပဒေလုပ်ထုံးလုပ်နည်းများနှင့်အညီဆောင်ရွက်သော ထိရောက်မှုရှိသည့် ခေတ်မီကုန်စည်ရှင်းလင်းရေးစနစ်ဖြစ်၍ ယင်းလုပ်ငန်းစဉ်တွင် ကုန်သွယ်မှုဆက်စပ်ဌာနများ၊ ပုဂ္ဂလိကကဏ္ဍများအားလုံး ထိရောက်စွာ ပူးပေါင်းပါဝင်ဆောင်ရွက်ရသည့်စနစ်ဖြစ်ကြောင်း၊ သို့ဖြစ်ရာ နိုင်ငံတော်ပြတင်းတစ်ပေါက်စနစ်အကောင်အထည်ဖော်ရေးလုပ်ငန်းများကို အောင်မြင်စွာ ဆောင်ရွက်နိုင်ရေးအတွက် “နိုင်ငံတော်ပြတင်း တစ်ပေါက်စနစ် အကောင်အထည်ဖော် ရေး ဦးဆောင်ကော်မတီ” ကို နိုင်ငံတော် စီမံအုပ်ချုပ်ရေးကောင်စီ၏ ၂၀၂၂ ခုနှစ်၊ အောက်တိုဘာလ ၈ ရက်တွင် အမိန့်ကြော်ငြာစာအမှတ်၊ ၁၇၇/ ၂၀၂၂ ဖြင့် ဖွဲ့စည်းခဲ့ကြောင်း၊  

ယနေ့အစည်းအဝေးတွင် ဦးဆောင်ကော်မတီ၏ သတ်မှတ်တာဝန်နှင့် လုပ်ပိုင်ခွင့် (Terms of Reference - TOR)၊ စနစ်တည်ထောင်ခြင်းအတွက် လမ်းပြမြေပုံ (Road Map) တို့ကို အတည်ပြုထုတ်ပြန်နိုင်ရေး၊ နည်းပညာလုပ်ငန်းအဖွဲ့နှင့် ဥပဒေလုပ်ငန်းအဖွဲ့များ ဖွဲ့စည်းတာဝန်ပေးနိုင်ရေးနှင့် ဆက်လက်ဆောင်ရွက်သွားရမည့်လုပ်ငန်းစဉ်များ ချမှတ်နိုင်ရေးတို့အတွက် ဆွေးနွေးကြရန်ဖြစ်ကြောင်း၊ ထို့အပြင် နိုင်ငံတော်ပြတင်းတစ်ပေါက်စနစ် အကောင်အထည်ဖော်မည့် နည်းပညာပုံစံနှင့်လုပ်ငန်းအစီအမံများကို အတည်ပြုချမှတ်ခြင်း၊ သက်ဆိုင်ရာ အစိုးရဌာနများမှ ပူးပေါင်းပါဝင်ညှိနှိုင်းဆောင်ရွက်နိုင်ရန် တွန်းအားပေးကြပ်မတ်ခြင်း၊ စနစ်အကောင် အထည်ဖော်ရေးအတွက် သက်ဆိုင်ရာလုပ်ငန်းအဖွဲ့များ၏ လုပ်ငန်းတိုးတက်မှုအခြေအနေများအား ‌စောင့်ကြည့်သုံးသပ်၍ လိုအပ်သောလမ်းညွှန်မှုများချမှတ်ခြင်း၊ နိုင်ငံတော်ပြတင်းတစ်ပေါက်စနစ်တည်ထောင်နိုင်ရေးအတွက် လိုအပ်သောရန်ပုံငွေတွက်ချက်ခြင်းနှင့် အကောင်အထည်ဖော်‌ဆောင်ရွက်မှုအခြေအနေများအား နိုင်ငံတော်စီမံအုပ်ချုပ်ရေးကောင်စီရုံးသို့ အစီရင်ခံတင်ပြခြင်း စသည်တို့ကို ဆောင်ရွက်သွားကြရန်ဖြစ်ကြောင်း ပြောကြားပါသည်။ 

ထို့နောက် အစည်းအဝေးသို့တက်ရောက်လာကြသော ကော်မတီဒုတိယဥက္ကဋ္ဌများနှင့် ကော်မတီအဖွဲ့ဝင်များက သက်ဆိုင်ရာကဏ္ဍအလိုက် ဝိုင်းဝန်းအကြံပြုဆွေးနွေးကြရာ ကော်မတီဥက္ကဌ ပြည်ထောင်စုဝန်ကြီးက ညှိနှိုင်းပေါင်းစပ်ဆောင်ရွက်ပေးခဲ့ပြီး အစည်းအဝေးအောင်မြင်စွာ ပြီးစီးခဲ့ကြောင်း သတင်းရရှိသည်။

(သတင်းစဉ်)