နေပြည်တော် ၊ နိုဝင်ဘာ ၁၃ 

စီမံကိန်းနှင့်ဘဏ္ဍာရေးဝန်ကြီးဌာန၊ ပြည်တွင်းအခွန်များဦးစီးဌာန၊ အလယ်အလတ်အဆင့် အရာထမ်းမွမ်းမံသင်တန်းအမှတ်စဉ်(၃/၂၀၂၃) ဖွင့်ပွဲအခမ်းအနားကို ယနေ့နံနက်ပိုင်းတွင် နေပြည်တော် ရုံးအမှတ်(၄၆)ရှိ ပြည်တွင်းအခွန်များဦးစီးဌာန၊ အစည်းအဝေးခန်းမ၌ ကျင်းပရာ စီမံကိန်းနှင့်ဘဏ္ဍာရေး ဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း တက်ရောက်အမှာစကားပြောကြားသည်။

သင်တန်းဖွင့်ပွဲတွင် ဒုတိယဝန်ကြီးက အမှာစကားပြောကြားရာ၌ နိုင်ငံတော်အတွက် ရသင့် ရထိုက်သည့်အခွန်ငွေများ ဥပဒေနှင့်အညီ အပြည့်အဝကောက်ခံရရှိနိုင်ရေးအတွက် အခွန်ဝန်ထမ်းများ ၏ လုပ်ငန်းစွမ်းဆောင်ရည် မြှင့်တင်ပေးရန်နှင့် စီမံခန့်ခွဲမှုအရည်အသွေး ပိုမိုတိုးတက်လာစေရန် ရည်ရွယ်ချက်ဖြင့် ယခုကဲ့သို့သော မွမ်းမံသင်တန်းများကို စဉ်ဆက်မပြတ်ဖွင့်လှစ် ပို့ချပေးနေခြင်း ဖြစ်ကြောင်း၊ ယခုသင်တန်းတွင် အခွန်ဝန်ထမ်းများအနေဖြင့် သိသင့်သိထိုက်သည့် အခွန်ဆိုင်ရာဥပဒေ၊ နည်းဥပဒေနှင့်စည်းမျဉ်းများ၊ ဘဏ္ဍာရေးနှင့် ငွေကြေးဆိုင်ရာလုပ်ထုံးလုပ်နည်းများ၊ အခွန်ဆိုင်ရာ သတင်းစာရင်းစုဆောင်းသည့် လုပ်ငန်းအတွေ့အကြုံများ၊ အခွန်ကောက်ခံမှုနှင့်ဆက်စပ်နေသော သွင်းကုန်/ ထုတ်ကုန်လုပ်ငန်းစဉ်မူဝါဒများ၊ အိမ်/ ခြံ/ မြေ ဝယ်ယူခြင်း/ ရောင်းချခြင်းများအပေါ် ဝင်ငွေရလမ်းစိစစ်ခြင်းဆိုင်ရာကိစ္စရပ်များကို စာတွေ့၊ လက်တွေ့ ဆွေးနွေးပို့ချပေးသွားမည်ဖြစ်ပါကြောင်း၊ အလယ်အလတ်အဆင့်အရာထမ်းများသည် အထက်အဆင့်နှင့် အောက်အဆင့်ကြားတွင် စီမံခန့်ခွဲမှုများ ဟန်ချက်ညီအောင် ထိန်းညှိဆောင်ရွက်ပေးရသော အရာထမ်းများဖြစ်ကြသဖြင့် လုပ်ငန်းရည်ရွယ်ချက် များ အောင်မြင်ရေးအတွက် ဆက်စပ်နေသည့် အခြားဝန်ကြီးဌာန/ အဖွဲ့အစည်းများနှင့်လည်း အပြန်အလှန်ဆက်သွယ်၍ ညှိနှိုင်းပေါင်းစပ်ဆောင်ရွက်ကြရန်လိုကြောင်း၊ မြို့နယ်အခွန်ဦးစီးဌာနမှူး များအဖြစ် တာဝန်ယူဆောင်ရွက်ကြရသူများဖြစ်ကြ၍ မိမိတာဝန်ယူဆောင်ရွက်ရသည့်လုပ်ငန်း နယ်ပယ်တွင် ကျွမ်းကျင်မှုရှိစေရေးအတွက် ခေတ်စနစ်နှင့်လျော်ညီသော အခွန်စီမံခန့်ခွဲမှုဆိုင်ရာ ကိစ္စရပ်များကို စဉ်ဆက်မပြတ် လေ့လာသင်ယူနေကြရန်လိုကြောင်း၊ ယခုသင်တန်းကို တာဝန်အရ တက်ရောက်သည်ဟု သဘောမထားဘဲ မိမိကိုယ်ကို အမြဲတမ်းလေ့လာသင်ယူလိုစိတ်၊ တိုးတက်အောင် ကြိုးစားချင်စိတ်နှင့် မိမိတာဝန်ထမ်းဆောင်နေသည့် ဌာနအဖွဲ့အစည်း ပိုမိုတိုးတက်ကောင်းမွန်အောင် ဆောင်ရွက်ပေးလိုစိတ်များဖြင့် သင်တန်းကာလတစ်လျှောက် အလေးအနက်ထားသင်ယူကြရန် လိုအပ်ကြောင်း ပြောကြားသည်။

သင်တန်းဖွင့်ပွဲသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း၊ ဌာနဆိုင်ရာအကြီးအကဲများ၊ အဆင့်မြင့်အရာရှိကြီးများ၊ သင်တန်းနည်းပြများ တက်ရောက်ကြသည်။ သင်တန်းတွင် သင်တန်းသား/ သင်တန်းသူ ဒုတိယညွှန်ကြားရေးမှူးနှင့် လက်ထောက်ညွှန်ကြားရေးမှူး စုစုပေါင်း (၄၂) ဦး ပါဝင်တက်ရောက်ကြပြီး၊ သင်တန်းကာလမှာ ရက်သတ္တပတ် (၂) ပတ်ဖြစ်ကြောင်း သိရသည်။