နိုင်ငံပိုင်ကဏ္ဍအတွက် နိုင်ငံတကာစာရင်းစံများ၊ ငွေသားအခြေခံအပိုင်း(၁) ဆင့်ပွားသင်တန်း အမှတ်စဉ်(၁) သင်တန်းဆင်းပွဲ အခမ်းအနားကျင်းပ

နေပြည်တော်၊ ဇန်နဝါရီ ၂၃

နိုင်ငံပိုင်ကဏ္ဍအတွက် နိုင်ငံတကာစာရင်းစံများ၊ ငွေသားအခြေခံအပိုင်း(၁) (International Public Sector Accounting Standards – IPSAS, Part 1 of Cash-Basis ) ဆင့်ပွားသင်တန်းအမှတ်စဉ်(၁) သင်တန်းဆင်းပွဲအခမ်းအနားကို ယနေ့နံနက် (၉:၀၀) နာရီတွင် နေပြည်တော်ရှိ စီမံကိန်းနှင့် ဘဏ္ဍာရေး ဝန်ကြီးဌာန၊ စုပေါင်းခန်းမ၌ ကျင်းပသည်။

အခမ်းအနားတွင် ငွေတိုက်ဦးစီးဌာန၊ ညွှန်ကြားရေးမှူးချုပ်က နိုင်ငံပိုင်ကဏ္ဍ (Public Sector) အတွက် စာရင်းထားနည်းများကို နိုင်ငံတကာတွင် ကျင့်သုံးသည့် ဘဏ္ဍာရေးရှင်းတမ်းပုံစံများ (Financial Statements) နှင့် ကိုက်ညီအောင် ဆောင်ရွက်နိုင်ရန်၊ မြန်မာနိုင်ငံ၏ ဘဏ္ဍာရေးအစီရင်ခံစာများ ပိုမိုတိုးတက်ဖွံ့ဖြိုးစေရန်နှင့် စာရင်းကိုင်စနစ် ပိုမိုတိုးတက်ကောင်းမွန်စေရန်တို့အတွက် ရည်ရွယ်ပြီး နိုင်ငံပိုင်ကဏ္ဍအတွက် နိုင်ငံတကာစာရင်းစံများ၊ ငွေသားအခြေခံ အပိုင်း(၁) ဆင့်ပွားသင်တန်း အမှတ်စဉ် (၁) ကို ဖွင့်လှစ်ခဲ့ခြင်းဖြစ်ကြောင်း ငွေတိုက်ဦးစီးဌာနအနေဖြင့် IPSAS အား အဓိကတာဝန်ယူဆောင်ရွက်ရမည် ဖြစ်ပါသဖြင့် ဝန်ထမ်းများအားလုံးမဖြစ်မနေ သိရှိနားလည်ရန် ရည်ရွယ်၍ ဖွင့်လှစ်ခြင်းဖြစ်ကြောင်း၊ ယခုသင်တန်းတွင် IPSAS အကြောင်းမိတ်ဆက်ခြင်း (Introduction to IPSAS) ၊ အယူအဆအပေါ်အခြေတည်သောမူဘောင် (IPSAS the Conceptual Frameworks) နှင့် IPSAS 1 - ဘဏ္ဍာရေးရှင်းတမ်းများ ရေးဆွဲတင်ပြခြင်း (IPSAS 1-Presentation of Financial Statements) တို့ကို အပိုင်း(၃) ပိုင်းခွဲ၍ သင်ကြားပို့ချပေးခဲ့ကြောင်း၊ IPSAS ကို အကောင်အထည်ဖော်ဆောင်ရွက်ရာမှာ ဌာန၊ အဖွဲ့အစည်းများအနေဖြင့် မိမိတို့၏ ဌာန၊ အဖွဲ့အစည်း တစ်ခုချင်းစီအတွက် Financial Statement ကို ရေးဆွဲပြီး ဝန်ကြီးဌာနများက မိမိတို့၏ ဝန်ကြီးဌာန စုပေါင်းဘဏ္ဍာရေးရှင်းတမ်းလို့ခေါ်သည့် Consolidated Financial Statement ကို ရေးဆွဲရမည်ဖြစ်ပါကြောင်း၊ ငွေတိုက်ဦးစီးဌာနအနေဖြင့် ဝန်ကြီးဌာနများက ပေးပို့လာသည့် ဝန်ကြီးဌာနများ၏ စုပေါင်းဘဏ္ဍာရေးရှင်းတမ်းများကို စုစည်းပေါင်းချုပ်ပြီး အစိုးရ၏စုပေါင်းဘဏ္ဍာရေးရှင်းတမ်းကို ရေးဆွဲရမည်ဖြစ်ကြောင်း ကနဦး Pilot အနေဖြင့် ၂၀၁၈-၂၀၁၉ ဘဏ္ဍာရေးနှစ်အတွက် Statement of Cash Receipts and Payments နဲ့ Statement of Comparison of Budget and Actual Amount တို့ကို စာရင်းပေါင်းချုပ်ပြုစုရေးနှင့် အစီရင်ခံရေးဌာနခွဲရှိ ဌာန၊ အဖွဲ့အစည်းများ၏ စာရင်း များဖြင့် ရေးဆွဲခဲ့ပြီးဖြစ်ပါကြောင်း၊ ယခုအခါ ၂၀၁၉-၂၀၂၀ ဘဏ္ဍာရေးနှစ်အတွက် ယခင်နှစ် Statement များအပေါ် လိုအပ်ချက်များကို ထည့်သွင်းရေးဆွဲလျက်ရှိပါကြောင်း၊ ဆက်လက်ဆောင်ရွက်ရမည့် ကိစ္စရပ်အနေဖြင့် စာရင်းကိုင်မူဝါဒ (Accounting Policy) မှာ Disclosure အနေဖြင့် မှတ်စုများ ဖော်ပြဖို့အတွက် လိုအပ်သည့် ညွှန်ကြားချက်များ ထုတ်ပြန်ပေးရမည် ဖြစ်ပါကြောင်း၊ သင်တန်းသား/ သင်တန်းသူများကလည်း သင်တန်းတွင် ပို့ချပေးခဲ့သည်များကို ကောင်းစွာလေ့လာမှတ်သားခဲ့ပြီး လက်တွေ့ ပြန်လည်အသုံးချနိုင်အောင် ဆောင်ရွက်ဖို့လိုအပ်ပါကြောင်း၊ IPSAS ကို အကောင်အထည်ဖော်ဆောင်ရွက်ရာမှာ ဝန်ထမ်းများအနေဖြင့် IPSASနှင့်ပတ်သက်သည့် အကြောင်းအရာများကို ကိုယ်တိုင်လေ့လာသင်ယူခြင်း (Self Study) ဖြင့် စဉ်ဆက်မပြတ် ထပ်မံလေ့လာပြီး မိမိကိုယ်ကိုယ်မိမိ ပိုမိုတိုးတက်မှုရှိအောင် လုပ်ဆောင်စေလိုပါကြောင်း၊ သင်တန်းသား/ သင်တန်းသူများက သင်ယူတတ်မြောက်မှု၊ သိနားလည်မှုများကို ဆန်းစစ်နိုင်ရန်အတွက် သင်တန်းပြီးဆုံးချိန်တွင်လည်း သင်တန်းဆင်း အရည်အချင်းစစ်စာမေးပွဲကို စစ်ဆေးခဲ့ပြီးဖြစ်ပါကြောင်း၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် ဌာနနှင့်သက်ဆိုင်သည့်သင်တန်းများကိုလည်း ဆက်လက်ပို့ချသွားမည်ဖြစ်ပါကြောင်း၊ ဝန်ထမ်းများအနေဖြင့် မိမိတို့ဌာနခွဲအလိုက် သက်ဆိုင်ရာလုပ်ငန်းတာဝန်များကို ကျွမ်းကျင်ပိုင်နိုင်စွာ ဆောင်ရွက်နိုင်ပြီး နိုင်ငံတော်အတွက်၊ မိမိဌာနအတွက် အားကိုးအားထားပြုရတဲ့ နိုင်ငံ့ဝန်ထမ်းကောင်းများဖြစ်လာစေရန် ဆန္ဒပြုပါကြောင်း ပြောကြားခဲ့ ပါသည်။

ထို့နောက် ညွှန်ကြားရေးမှူးချုပ်က သင်တန်းတွင် ပထမဆု၊ ဒုတိယဆုနှင့် တတိယဆု ရရှိသူ သင်တန်းသူများကို ဆုချီးမြှင့်ခဲ့ပြီး သင်တန်းဆင်းလက်မှတ်များကို ပေးအပ်ခဲ့ပါသည်။ သင်တန်းဆင်းပွဲအခမ်းအနားသို့ ငွေတိုက်ဉီးစီးဌာနမှ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွန်ကြားရေးမှူးများ၊ ဒုတိယညွှန်ကြားရေးမှူးများ၊ သင်တန်းဆရာမများနှင့် သင်တန်းသား/ သင်တန်းသူ (၄၀) ဦး တက်ရောက်ခဲ့ကြပြီး သင်တန်းကာလမှာ ၂၀၂၂ ခုနှစ် နိုဝင်ဘာလ ၁၄ ရက်နေ့မှ ၂၀၂၃ ခုနှစ် ဇန်နဝါရီလ ၃ ရက်နေ့အထိ ရက်သတ္တ (၇)ပတ် ကြာမြင့်ခဲ့ပါသည်။